ރަމަޟާންމަހަށް ރޯދަ ހަދިޔާގެ ގޮތުގައި ގޭބީސީތަކަށް ދޫކުރާ މަސްދަޅު ކޭސް އަތޮޅުތަކަށް ފޮނުވުމުގެ މަސައްކަތް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާއިން ފަށައިފިއެވެ. 

މިނިސްޓްރީއިން މި މަސައްކަތް ކުރިއަށް ގެންދަނީ ސްޓޭޓް ޓްރެޑިންގ އޯގަނައިޒޭޝަން (އެސްޓީއޯ) މެދުވެރިކޮށެވެ. 

މިނިސްޓްރީއިން މައުލުމާތުދޭގޮތުގައި، އަތޮޅުތަކުގައި މަސްދަޅު ކޭސްތައް ބެހުމަށް ފަހިވާ ގޮތަށް މިހާރުވެސް ހުރީ އެކި ސަރަޙައްދުތަކުގައި ގުދަން ކުރެވޭނެ އިންތިޒާމްތައް ހަމަޖެހިފައެވެ. އަދި ކޮންމެ ރަށެއްގައިވެސް ރޯދަ ހަދިޔާ ބެހުމުގެ މަސައްކަތް ކުރިއަށް ގެންދާނީ އެ ރަށެއްގެ ކައުންސިލުގެ ބެލުމުގެ ދަށުންނެވެ. އަދި މި މަސައްތަކަތް ވަރަށް އަވަހަށް ފެށިގެންދާނެކަމަށްވެސް މިނިސްޓްރީއިން މައުލުމާތުދެއެވެ.  

މަސްދަޅު ބެހުމުގެ މަސައްކަތް މާލެ ސަރަޙައްދުގައި ފަށާފައި ވަނީ މި މަހުގެ 24 ވަނަ ދުވަހެވެ. މި މަސައްކަތް ކުރިއަށް ދަނީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާއާއި ސަރުކާރު ހިއްސާވާ ބައެއް ކުންފުނިތަކުގެ އިތުރުން ދިވެހި ސިފައިންނާ، ފުލުހުންގެ ވެސް އެހީތެރިކަމާއެކުއެވެ. މި އަހަރުގެ ރޯދަ ހަދިޔާގެ ގޮތުގައި ޖުމުލަ 118,673 މަސްދަޅު ކޭސް ބެހުމަށް ހަމަޖެހިފައިވެއެވެ.