އިންޑިއާގައި ނުރައްކާތެރި ނިޕާ ވައިރަސް ފެތުރެނީ
އިންޑިއާގެ އިރުމަތީ ސްޓޭޓެއް ކަމަށްވާ ވެސްޓް ބެންގާލްގައި ނިޕާ ވައިރަސް ފެތުރެމުންދާކަން އެ ޤައުމުގެ ސިއްޙީ އިދާރާތަކުން ކަށަވަރުކޮށްދީފިއެވެ.
މިހާތަނަށް ލެބޯޓްރީ ތަހުލީލުތަކުން ފަސް މީހަކު މި ބައްޔަށް ޕޮޒިޓިވްވެފައިވާއިރު، އޭގެ ތެރޭގައި ބަރަސާތުގެ މެޑިކަލް ފެސިލިޓީއެއްގައި މަސައްކަތްކުރާ ޑޮކްޓަރުންނާއި ނަރުހުންގެ އިތުރުން ހޮސްޕިޓަލުގެ އެހެނިހެން މުވައްޒަފުން ވެސް ހިމެނެއެވެ. އެހެންކަމުން، ބަލި އިތުރަށް ފެތުރުނަ ނުދީ ހިފެހެއްޓުމަށްޓަކައި ކަމާބެހޭ ފަރާތްތަކުން ދަނީ ބަލިޖެހުނު މީހުންނާ ބައްދަލުވި ފަރާތްތައް އެކަހެރިކޮށް، ރައްކާތެރިކަމުގެ ފިޔަވަޅުތައް ވަރުގަދަކުރަމުންނެވެ. އެގޮތުން، ބަލިޖެހުނު މީހުންނާ ގާތުން ބައްދަލުވި ގާތްގަނޑަކަށް 100 އެއްހާ މީހުން މިހާރު ތިބީ ސިއްޙީ އިދާރާތަކުގެ ބެލުމުގެ ދަށުން ގޭގައި އެކަހެރިކޮށްފައެވެ.
ނިޕާ ވައިރަހަކީ ވާލުގެ ޒަރީއާއިން ޖަނަވާރުންގެ ފަރާތުން އިންސާނުންގެ ގަޔަށް އަރާ ނުރައްކާތެރި ވައިރަހެކެވެ. މި ބަލި އިންސާނުންނަށް ޖެހެނީ ބަލިޖެހިފައިވާ ޖަނަވާރަކާ ކޮންޓެކްޓްވުމުން، ނުވަތަ ބަލި ހުރި ކާނާއެއް ބޭނުންކުރުމުން، ނުވަތަ ބަލިޖެހިފައިވާ މީހެއްގެ ފަރާތުން ސީދާ ގޮތެއްގައެވެ. ބަލީގެ އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ނޭވާލާން އުނދަގޫވުމުގެ އިތުރުން ސިކުނޑިއަށް އަސަރުކޮށް، ފުރާނައަށް ނުރައްކާވާ ފަދަ ސިއްޙީ މައްސަލަތައް ކުރިމަތިވުން ހިމެނެއެވެ.
ސިއްޙީ މާހިރުން ފާހަގަކުރާ ގޮތުގައި، ނިޕާ ވައިރަހަށް ޚާއްޞަ ވެކްސިނެއް ނުވަތަ ފަރުވާއެއް އަދި ހޯދިފައެއް ނުވެއެވެ. އެހެންކަމުން، މި ބައްޔަށް ދެވޭ ފަރުވާ ބިނާވެފައިވަނީ ބަލީގެ އަލާމާތްތަކަށް ދެވޭ ލުއިތަކުގެ މައްޗަށާއި ބަލި އިތުރަށް ފެތުރުނަނުދީ ކޮންޓްރޯލް ކުރުމުގެ މައްޗަށެވެ. މީގެ ކުރިންވެސް އިންޑިއާގެ ވެސްޓް ބެންގާލް އަދި ކެރަލާ އިން މި ބަލި ފެނިފައިވާތީ، އެ ސަރަޙައްދުތަކުގައި ބަލިތައް މޮނިޓަރކޮށް، ތައްޔާރީ ހާލަތުގައި އޮތުމަށް ސިއްޙީ އިދާރާތަކުން އިސްކަންދެއެވެ.
ވެސްޓް ބެންގާލްގައި ބަލި ފެތުރެން ފެށުމާ ގުޅިގެން، ސަރަޙައްދީ ބައެއް ޤައުމުތަކުން ވަނީ ބައިނަލްއަޤުވާމީ އެއާޕޯޓްތަކުގައި ކޮވިޑް-19 ގެ ދުވަސްވަރު ކުރިއަށްގެންދިޔަ ފަދަ ސިއްޙީ ސްކްރީނިންގްތައް އަލުން ފަށާފައެވެ. މީގެ ބޭނުމަކީ ބަލި ފެނިފައިވާ ސަރަޙައްދުތަކުން އަންނަ ދަތުރުވެރިންގެ ތެރެއިން ބަލީގެ އަލާމާތްތައް ހުރި މީހުން އަވަހަށް ދެނެގަނެ، އެކަހެރިކުރުމެވެ.
ނިޕާ ވައިރަހަކީ މަރުވާ މީހުންގެ ނިސްބަތް މަތި އަދި އެކަކު އަނެކެއްގެ ގަޔަށް ފަސޭހައިން އަރާ ބައްޔަކަށް ވާތީ، ސިއްޙީ އިދާރާތަކުން އިލްތިމާސްކުރަނީ މިކަމަށް ސަމާލުވުމަށެވެ. އަދި ސިއްޙީ ރައްކާތެރިކަމުގެ އިރުޝާދުތަކަށް ބޯލަނބައި، ބަލީގެ އަލާމާތްތައް ދެނެގަތުމަށް އިސްކަންދިނުމަށް ވަނީ އެދިފައެވެ. ބަލިޖެހިފައިވާ މީހަކާ ބައްދަލުވުމަށްފަހު ހުން އައުން، ކެއްސުން، ބޮލުގައި ރިއްސުން ނުވަތަ އާދަޔާ ޚިލާފަށް ވަރުބަލިވުން ފަދަ އަލާމާތެއް ފެނިއްޖެނަމަ، ލަސްނުކޮށް ސިއްޙީ އެހީތެރިކަން ހޯދުމަށް އިދާރާތަކުން ވަނީ ނަސޭހަތްތެރިވެފައެވެ.
Advertisement
This content is created and paid for by advertisers and does not involve Voice Journalists
