އެމްއެންޑީއެފް އިން, ރާއްޖޭގެ ކަނޑުގެ ސަލާމަތާއި ރައްކާތެރިކަން ކަށަވަރުކުރުމަށް ކުރަމުންދާ މަސައްކަތްތަކަށާއި، ކަނޑުއަޑީގެ އޮޕަރޭޝަންތައް ކުރިއަށްގެންދިއުމަށް އެހީތެރިވުމުގެ ގޮތުން، އުރީދޫ މޯލްޑިވްސްއިން، ކަނޑުއަޑީގައި ބޭނުންކުރާ ޚާއްސަ އިކުއިޕްމަންޓްތަކެއް އެމްއެންޑީއެފަށް ހަދިޔާކޮށްފިއެވެ.

މި ތަކެތި ރަސްމީކޮށް އެމްއެންޑީއެފަށް ހަވާލުކޮށްދެއްވީ ބަންޑާރަކޮށީގައި ބޭއްވި ރަސްމިއްޔާތުގައި، އުރީދޫ މޯލްޑިވްސްގެ މެނޭޖިންގ ޑައިރެކްޓަރ އަދި ސީއީއޯ، ޚާލިދު އަލް ހަމާދީއެވެ. އެމްއެންޑީއެފް ގެ ފަރާތުން މި ތަކެއްޗާ ހަވާލުވެވަޑައިގެންނެވީ ދިފާޢީ ވަޒީރު، މުޙައްމަދު ޣައްސާން މައުމޫނެވެ.

އުރިދޫއިން ހަދިޔާ ކުރި ސާމާނުގެ ތެރޭގައި ހިމެނެނީ 1 އޯޝަން ރީފް އެމް 105 ޑިޖިޓަލް ޑުއަލް ޗެނަލް ކޮމިއުނިކޭޝަން އިކުއިޕްމަންޓަކާއި، 1 ލޫބެލް ލެބް އަންޑަރ ވޯޓަރ ލައުޑްސްޕީކަރާއި، 3 އޯޝަން ރީފް ފުލް ފޭސް އަދި ފޭސް 2 ޑައިވިންގ މާސްކެވެ. 

އުރީދޫއިން އެމްއެންޑީއެފަށް ހަދިޔާކުރި އިކުއިޕްމަންޓްތައް-- ފޮޓޯ/ އެމްއެންޑީއެފް

އެމްއެންޑީއެފުން ބުނާގޮތުގައި، މި އިކުއިޕްމެންޓްތަކަކީ ކަނޑުއަޑީގައި މުއާމަލާތްކުރުމަށާއި، ޑައިވަރުންގެ ސަލާމަތާއި ރައްކާތެރިކަމުގެ އިތުރުން އޮޕަރޭޝަންތަކުގެ ފެންވަރު ރަނގަޅު ކުރުމަށް ފަރުމާކޮށްފައިވާ ތަކެއްޗެވެ. އެހެންކަމުން މިތަކެތީގެ ސަބަބުން އެމްއެންޑީއެފް ކޯސްޓްގާޑުން ރާއްޖޭގެ ކަނޑުގެ ސަރަހައްދުގައި ހިންގާ ސަލާމަތީ އަދި މީހުން ސަލާމަތްކުރުމުގެ އޮޕަރޭޝަންތަކަށް ބޮޑު އެހީތެރިކަމެއް ލިބިގެންދާނެ ކަމަށްވެސް އެމްއެންޑީއެފުން މައުލުމާތުދެއެވެ. 

މިކަމަށްޓަކާ  ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީ ވަނީ އުރީދޫ މޯލްޑިވްސްއިން ދެއްވި ދީލަތި އެހީއަށްޓަކައި ޝުކުރު ދަންނަވާފައެވެ. 

މިކަމާއިގުޅުވާ އުރީދޫ މޯލްޑިވްސްގެ ސީއީއޯ ޚާލިދު އަލް ހަމާދީ ވިދާޅުވީ ޑައިވަރުންގެ ސަލާމަތާއި ކަނޑުއަޑީގެ އޮޕަރޭޝަންތަކަށް އެހީތެރިވުމަށް މިތަކެތި ހަދިޔާކުރެވުމަކީ އުރީދޫން ފަޚުރުވެރިވާ ކަމެއް ކަމަށެވެ. އަދި އުރީދޫގެ އަމާޒަކީ މުޖުތަމަޢުއަށް ފައިދާހުރި، ދެމެހެއްޓެނިވި އެހީތެރިކަން ފޯރުކޮށްދިނުންކަމަށެވެ.