ދިރާގް ދިވެހި ޕްރިމިއާ ލީގްގައި މިރޭ މާޒިޔާ ސްޕޯޓްސް ކްލަބާއި ނިއުރޭޑިއަންޓް ސްޕޯޓްސް ކްލަބް ބައްދަލުކުރިމެޗް ފަހަތުން އަރައި ނިއުރޭޑިއަންޓް ކާމިޔާބުކޮށްފިއެވެ.

ގަލޮޅު ދަނޑުގައި ކުޅުނު މިމެޗް، މާޒިޔާގެ މައްޗަށް ނިއު ކުރި ހޯދީ 3-2 ގެ ނަތީޖާއިންނެވެ. މެޗްގައި އެންމެ ފުރަތަމަ ލަނޑެއް ޖެހީވެސް ނިއުރޭޑިއަންޓުންނެވެ. ނަމަވެސް ނިއުގެ ސިލްވާ ޖެހި އެ ގޯލް ރެފްރީ ނިންމީ އޯފްސައިޑް ލަނޑެއްގެ ގޮތުގައެވެ. 

މާޒިޔާ އަތުން މޮޅުވުމަށް ނިކުތް ނިއުރޭޑިއަންޓަށް އިތުރު ނުތަނަވަސްކަމެއް ކުރިމަތިލާންޖެހުނީ މާޒިޔާގެ އިބްރާހީމް އައިސަމް ޖެހި ގޯލުންނެވެ. އެ ގޯލާއެކު ނިއުއިން ހިތްވަރުކޮށް ފުރަތަމަ ހާފް ނިމުމުގެ ކުރިން މެޗްގެ ނަތީޖާ ވަނީ ހަމަހަމަކޮށްފައެވެ. މި ލަނޑު ޖަހައިދިނީ ޑޯރީ ތަނަވަސްކޮށްދިން ފުރުސަތެއްގައި ރާއިފްއެވެ.

މެޗްގެ މޮޅުކުޅުންތެރިޔާގެ މަގާމް ހޯދި ޑޯރީ... ފޮޓޯ: ދިވެހި ޕްރިމިއާ ލީގް

ދެވަނަ ހާފްގެ ކުޅުން ފަށައިގެން މާޒިޔާއިން ވަނީ ދެވަނަ ފަހަރަށް ލީޑް ނަގާފައެވެ. މި ލަނޑު ޖަހައިދިނީ 62 ވަނަ މިނެޓްތެރޭގައި އައިސަމެވެ. ނިއުއިން ދެވަނަ ފަހަރަށް އެއްވަރުކުރީ މާޒިޔާއިން ލަނޑުޖެހިތާ ފަސްމިނެޓް ފަހުން ބަދަލު ކުޅުންތެރިއެއްގެ ގޮތުގައި ކުޅެން އެރި ތަޖުރިބާކާރު ފޯވަޑް އަލީ ފާސިރު (ސެންޓޭ) އެވެ. މެޗުން ނިއު މޮޅުކޮށްދިން ލަނޑު ޖަހައިދިނީ، މި ސީޒަނުގައި ނިއުއަށް އެންމެ ގިނަ ލަނޑު ޖަހަދިން ބްރެޒިލްގެ ޑޯރީއެވެ. 

މި މެޗުން ނިއުއަށް ލިބުނު މޮޅަކީ މި ސީޒަނުގައި އެޓީމަށް މާޒިޔާ އަތުން ލިބުނު ފުރަތަމަ މޮޅެވެ.