ކިޔެވުމުގައި އެންމެ ކުރީ ސަފަށް އެރުމަކީ ހަމައެކަނި ޚާއްޞަ ވިސްނުމެއް ނުވަތަ "ނެޗުރަލް ސްމާޓް" ކަމެއް ހުރެގެން ވާނެ ކަމެއް ނޫން ކަމަށާއި، އެއީ ކޮންމެ ކުއްޖަކަށްވެސް ހާސިލްކުރެވޭނެ ކަމެއް ކަމަށް މަޝްހޫރު ޕްރޮފެސަރު ޙަސަން އުގައިލް ވިދާޅުވެއްޖެއެވެ.

ޕްރޮފެސަރު އުގައިލްގެ ފޭސްބުކް މެދުވެރިކުރައްވައި ދަރިވަރުންނަށް ދެއްވި މި އިރުޝާދުތަކުގައި ފާހަގަކުރައްވާފައިވަނީ، ކިޔެވުމަކީ ކުޅިވަރެއްގެ ގޮތުގައި ދެކި، އޭގެ އުސޫލުތައް ދަސްކޮށް، އެއްގޮތުގައި ހުއްޓުމެއްނެތި ކުރިއަށްދާނަމަ، ކޮންމެ ކުއްޖަކަށްވެސް ކާމިޔާބު ދަރިވަރަކަށް ވެވިދާނެ ކަމަށެވެ. މިގޮތުން ކިޔެވުމުގައި އެންމެ މޮޅު ނަތީޖާ ހޯދުމަށް ކުރެވިދާނެ ފަސް ކަމެއް އޭނާ ވަނީ ހިއްސާކުރައްވާފައެވެ.

ރޭވުމެއް ނުވަތަ ޕްލޭނެއް ނެތި ކިޔަވާނަމަ، ދުވަސްތައް ބޭކާރުވެ، ކުރިއެރުމެއް ނުލިބި ވަގުތުތަކެއް ހިނގައިދާނެއެވެ. އެހެންކަމުން، އެންމެ މުހިންމީ ކޮން ކަމެއްކަމާއި ވަގުތުގެ ބޭނުން އެންމެ ރަނގަޅު ގޮތުގައި ހިފާނެ ގޮތުގެ ރަނގަޅު ޕްލޭނެއް އޮތުމަކީ މަސައްކަތަށް ސަމާލުކަން ދިނުމަށް އެހީތެރިވެދޭނެ ކަމެކެވެ.

ކަންކަން ފަސްކުރުމަކީ ދަރިވަރުން ސްޓްރެސްވުމަށް ދިމާވާ އެންމެ ބޮޑު ސަބަބެވެ. މިއަދު ކުރަންޖެހޭ މަސައްކަތެއް މިއަދު ނިންމާލުމުން ބުރަކަން ކުޑަވެގެންދާނެއެވެ. ބޮޑެތި މަސައްކަތްތައް ކުދި ބައިތަކަށް ބަހާލައިގެން ފެށުމަކީ މަސައްކަތް ނިންމުމަށް ފަސޭހަވާނެ ގޮތެކެވެ.

ގިނަ ކަންތައްތަކެއް އެއްފަހަރާ ކުރަން އުޅުމަކީ (މަލްޓިޓާސްކިންގް އަކީ) އޭގެ ސަބަބުން ނަތީޖާ ގޯސްވާ ކަމެކެވެ. އެންމެ ކާމިޔާބު ދަރިވަރުންނަކީ އެއްވަގުތެއްގައި އެއް މަސައްކަތަކަށް ފުރިހަމަ ސަމާލުކަންދޭ ކުދިންނެވެ. އޭރުން މަސައްކަތުގެ ފެންވަރު ރަނގަޅުވެ، އަވަހަށް ނިންމާލެވޭނެއެވެ.

ތިމާ ވަގުތު ހޭދަކުރާ މީހުންގެ ސަބަބުން ތިމާގެ އާދަތަކަށް ބޮޑު ނުފޫޒެއް ފޯރައެވެ. ކިޔަވަން ޝައުގުވެރިވާ، އަޚްލާޤު ރަނގަޅު ކުދިންނާއެކު ވަގުތު ހޭދަކުރުމަކީ ކިޔެވުމަށް ލިބޭ ހިތްވަރެކެވެ. އަދި އެކަކު އަނެކަކަށް ކިޔަވައިދިނުމަކީ އުގެނުން އިތުރަށް ހަރުދަނާވާނެ ކަމެކެވެ.

ކިޔެވުމަކީ މުޅި ދިރިއުޅުން ކަމުގައި ނުހަދައި، އެއީ ދިރިއުޅުމުގެ ބައެއްގެ ގޮތުގައި ހަދަންޖެހެއެވެ. ރަނގަޅު ކާނާ ކެއުމާއި، ފުރިހަމައަށް ނިދުމާއި، ކަސްރަތު ކުރުމުގެ އިތުރުން ހިތްހަމަޖެހޭ ފަދަ ކަންކަމަށް ވަގުތު ހުސްކުރުމަކީ ކިޔެވުމުގައި ދެމިހުރުމަށް ވަރަށް މުހިންމު ކަމެކެވެ.

ޕްރޮފެސަރު އުގައިލް އިތުރަށް ވިދާޅުވީ، ކާމިޔާބު ދަރިވަރަކަށް ވުމުގެ ސިއްރަކީ މަސައްކަތުގައި ސާބިތުކަމާއެކު ދެމިހުރުމާއި، އަމިއްލަ ނަފްސަށް ބަލައިގެން ރޭވުންތެރިކަމާއެކު ކުރިއަށް ދިއުން ކަމަށެވެ.