މ.މަލީޝާގެ އެއްވަނަ ފަންގިފިލާގައި ހުރި ކޮޓަރިއެއްގައި ރޯވެ ބޮޑެތި ގެއްލުންތަކެއް ލިބިއްޖެއެވެ.
މި ހާދިސާ ހިނގިކަމުގެ ރިޕޯޓް އެމްއެންޑީއެފަށް ލިބުނީ މިއަދު މެންދުރުފަހު 14:54 ހާއިރުއެވެ. ހާދިސާގެ ރިޕޯޓް ލިބުމާއެކު އެމްއެންޑީއެފް ފަޔަރ އެންޑް ރެސްކިޔު ސަރވިސް، މާލޭ ފަޔަރ ސްޓޭޝަނުން ވަނީ އެ ސަރަހައްދަށްގޮސް ރޯވި އަލިފާންގަނޑު ނިއްވާލާފައެވެ.
https://x.com/MNDF_Official
އަލިފާނުގެ ހާދިސާ ހިނގި ސަރަހައްދަށް އެއްވެފައިތިބި ބައެއް އާއްމުން..
އެމްއެންޑީއެފުން ބުނީ، ރޯވި އަލިފާންގަނޑު ނިއްވާލެވުނީ 15:24 ހާއިރުކަމަށެވެ. މި ހާދިސާގައި އެއްވެސް މީހަކަށް އަނިޔާއެއް ވިކަމުގެ ރިޕޯޓު ލިބިފައެއްނުވެއެވެ.
އަލިފާނުގެ ހާދިސާ ހިނގި ކޮޓަރިތެރެ.. ފޮޓޯ: އެމްއެންޑީއެފް
ވޮއިސްއަށް މައުލޫމާތު ހިއްސާކުރަމުން އެ ހިސާބުގައި ދިރިއުޅޭ މީހަކު ބުނީ ރޯވިތަނަކީ، ގިނަ އަދަދެއްގެ ބިދޭސީން އުޅެމުންދާ ތަނެއްކަމަށެވެ. އެމްއެންޑީއެފުން ހިއްސާކޮށްފައިވާ ފޮޓޯތަކަށް ބަލާއިރު، އަލިފާނުގެ ހާދިސާގައި އެތަނުގައި ދިރިއުޅެމުންދިޔަ މީހުންގެ އަންނައުނާއި، ހިފާގެންގުޅޭތަކެތި ވަނީ ވަރަށްބޮޑަށް އަލިފާނުގެ އަސަރުކޮށްފައެވެ.
މި ހާދިސާ ފުލުހުން ދަނީ ތަހްގީގްކުރަމުންނެވެ.
Advertisement
This content is created and paid for by advertisers and does not involve Voice Journalists
