އަވައްޓެރި އިންޑިއާއިން ނިޕާ ވައިރަހަށް ޕޮޒިޓިވް މީހުންތަކެއް ފެނުނު ނަމަވެސް އެ ވައިރަހުގެ ނުރައްކާ ރާއްޖެއަށް އަދި ކުޑަކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އިންޑިއާގެ ވެސްޓް ބެންގޯލުން ނިޕާ ވައިރަހަށް ޕޮޒިޓިވްވި 3 މީހަކު ވަނީ ފެނިފައެވެ. މިކަމާ ގުޅޭގޮތުން އެޗްޕީއޭއިން ނެރުނު ބަޔާނެއްގައި ބުނީ ވެސްޓް ބެންގޯލުން ނިޕާ ވައިރަހަށް ޕޮޒިޓިވްވި މީހުންނާ ދމާވި 180 އަށްވުރެ ގިނަ މީހުން ދެނެގަނެވި އެމީހުން މިހާރު ކަރެންޓީނު ކުރެވިފައިވާ ކަަމަށެވެ. އެމީހުންގެ ހާލު އިންޑިއާގެ ކަމާބެހޭ ފަރާތްތަކުން ބަލަމުންދާއިރު، މި ބަލި ޖެހިގެން އިތުރު ބަޔަކު އެއްވެސް ސަރަހައްދަކުން އަދި އެއްވެސް ޤައުމަކުން މިހާތަނަށް ފެނިފައިވާކަމުގެ ރިޕޯޓެއް ލިބިފައި ނުވާކަމަށް އެޗްޕީއޭއިން ބުންޏެވެ.
އެޗްޕީއޭއިން ބުނީ މިވަގުތު މި ބަލީގެ ނުރައްކާ އޮތް މިންވަރު ކުޑަނަމަވެސް ހާލަތު ބަލައި މޮނިޓަރ ކުރަމުންދާކަމަށެވެ. އަދި މި ބައްޔާ ގުޅޭގޮތުން އެއްވެސް ކޭސްއެއް އަދި ކޮންޓެކްޓްވި އެއްވެސް ފަރާތެއް އެޗްޕީއޭއަށް ރިޕޯޓްކޮށްފައިނުވާކަމަށެވެ. އެ އިދާރާއިން ވަނީ ވެސްޓް ބެންގޯލް ސަރަހައްދަށް ދަތުރުކުރާ ފަރާތްތަކުން އެކަމަށް ސަމާލުވުމަށް އެދިފައެވެ. އަދި އާއްމު ސިއްހަތު ރައްކާތެރިކުރުމަށް އަޅަންޖެހޭ ފިޔަވަޅުތައް އަޅަންޖެހިއްޖެ ހާލަތެއްގައި އެޅުމަށް ކަމާބެހޭ އިދާރާތަކާއި ސިއްހީ ހިދުމަތްތައްދޭ ތަންތަނާއި ގުޅިގެން މަސައްކަތްކުރަމުން އަންނަކަމަށެވެ.
ވެސްޓްބެންގާލް ސްޓޭޓުން ނިޕާ ވައިރަހުގެ ކޭސްތައް ފެނުމާ ގުޅިގެން އެ ސަރަހައްދުން އަންނަ މީހުން ޗެކްކުރުމުގެ މަސައްކަތް ބައެއް އެއާޕޯޓްތަކުން ވަނީ ފަށާފައެވެ. މީގެ ތެރޭގައި ނޭޕާލް، ތައިެލންޑް، ޓައިވާން، ހޮންކޮން އެއާޕޯޓް ހިމެނެއެވެެ
Advertisement
This content is created and paid for by advertisers and does not involve Voice Journalists
