މިއަހަރު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ އިންތިޚާބަށް ކުރިމަތިލުމަށް އިތުރު 10 ދުވަހުގެ މުއްދަތެއް ދޭން އިދިކޮޅު އެމްޑީޕީން އެދިއްޖެއެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ދިއްދޫ ދާއިރާގެ ކުރީގެ މެންބަރު އަދި އިންތިޚާބުގެ ކެންޕެއިން ތަރުޖަމާނު އަބްދުالله ވަހީދު (ވައްޑޭ) ވިދާޅުވީ، އިންތިޚާބަށް ކުށުގެ ރިކޯޑު ސާފުކުރުމުގެ ކަންކަން ކުރިއަށް ގެންދިޔުމުގައި ވަރަށް ބޮޑަށް ލަސްތަކާ ކުރިމަތިލާންޖެހޭ ކަމަށެވެ.

ވައްޑޭ އިތުރަށް ވިދާޅުވީ، ކުށުގެ ރިކޯޑް ސާފުކުރުމަށް ދިމާވާ ލަސްތަކުގެ އިތުރުން، އީފާސް މެދުވެރިކޮށް އިލެކްޝަން ކޮމިޝަނަށް ހުށަހެޅުމުގައިވެސް ދަތިތަކާ ކުރިމަތިވަމުންދާ ކަމަށެވެ. އޭގެ ސަބަބުން ފޯމު ރިޖެކްޓްވެ، ކަނޑައެޅިފައިވާ މުއްދަތުގައި ފޯމު ހުށަހަޅަން ދަތިވާކަމަށް އޭނާ ވިދާޅުވިއެވެ.

ވައްޑޭ ވިދާޅުވީ، އިންތިޚާބަށް ވާދަކުރަން ފޯމު ހުށަހަޅަން ދީފައިވަނީ ވަރަށް ކުރު މުއްދަތެއް ކަމަށެވެ. އަދި އެ މުއްދަތުގައި އޮންލައިންކޮށް ފޯމު ހުށަހެޅޭގޮތަށް އޮތުމަކީ ގިނަ ކެންޑިޑޭޓުން ތަކެއްގެ އިންތިޚާބީ ހައްގު ނިގުޅައިގަނެވޭނެ ކަމެއް ކަމަށްވެސް އޭނާ ވިދާޅުވިއެވެ. 

”އެހެންވީމާ، އަޅުގަނޑުމެން ވަރަށް އިޚްލާސްތެރި ކަމާއެކު އިލެކްޝަނަށް ދަންނަވަން އޮތީ، އިންތިހާބަށް ކުރިމަތިލުމަށްޓަކައި، އިލެކްޝަންގެ ފަރާތުން އިތުރު 10 ދުވަހުގެ މުއްދަތެއް ދިނުމަށް. އެހެން ނޫނިއްޔާ އަޅުގަނޑުމެންނަށް ޖެހޭނީ އަޅުގަނޑުމެންގެ ހުރި އެހެން ވަސީލަތްތައް ބޭނުންކޮށްގެން އެ ހައްގު ހޯދަން މަސައްކަތް ކުރަން“ ވައްޑޭ ވިދާޅުވިއެވެ. 

މިއަދުގެ ނޫސްވެރިންގެ ބައްދަލުވުމުގައިވެސް ވައްޑޭ ވަނީ އިލެކްޝަންސް ކޮމިޝަނުން ސަރުކާރުގެ ކެންޑިޑޭޓުންނަށް ފޯމު ހުށަހެޅުމަށް ލުއިފަސޭހަ ކޮށްދީ ތަފާތުކުރުންތައް ގެންގުޅޭ ކަމުގެ ތުހުމަތުތައް ކޮށްފައެވެ.