ދެކުނު ކޮރެއާގެ ކުރީގެ ރައީސް ޔޫން ސުކް ޔޯލްގެ އަނބިކަނބަލުން ކިމް ކެއޮން-ހީ، ރިޝްވަތު ހިފުމުގެ ކުށުގައި 1 އަހަރާއި 8 މަސްދުވަހަށް ޖަލަށްލުމަށް ސޯލްގެ ކޯޓަކުން ޙުކުމްކޮށްފިއެވެ.

ސޯލް ސެންޓްރަލް ޑިސްޓްރިކްޓް ކޯޓުން މިއަދު ކުރި މި ޙުކުމުގައި ބަޔާންކޮށްފައިވަނީ، މަޤާމުން ވަކިކޮށްފައިވާ ކުރީގެ ރައީސް ޔޫންގެ އަނބިކަނބަލުން، "ޔުނިފިކޭޝަން ޗާޗް" ގެ އޮފިޝަލުންގެ އަތުން އަގުބޮޑު ހަދިޔާތައް ހޯއްދަވައި، ސިޔާސީ ނުފޫޒު ބޭނުންކުރައްވާފައިވާކަން ސާބިތުވާ ކަމަށެވެ. 

ކިމް އާއި ދެކޮޅަށް ޕްރޮސެކިއުޓަރުން އެދިފައިވަނީ ހުރިހާ ދަޢުވާތަކަކަށް ޖުމްލަ 15 އަހަރުގެ ޖަލު ޙުކުމަކާއި ބޮޑު ޖޫރިމަނާއެއް ކަނޑައެޅުމަށެވެ. ނަމަވެސް، ކޯޓުން ޙުކުމް ކުރީ ހަމައެކަނި ރިޝްވަތުގެ މައްސަލައިގައެވެ. ސަބަބަކީ ޑިޒައިނަރ ބްރޭންޑްތަކުގެ މުދަލާއި އެހެނިހެން އަގުބޮޑު ތަކެތި ކިމް ބައްލަވައިގެންފައިވާކަން ސާބިތުވި ނަމަވެސް، ޕްރޮސެކިއުޓަރުން ހުށަހެޅި އެހެން ބައެއް ދަޢުވާތައް ސާބިތުވާވަރަށް ހެކި ލިބިފައިނުވާތީކަމަށް އެގައުމުގެ ކޯޓުން ބުނެއެވެ. އެގޮތުން، ހިއްސާގެ ބާޒާރުގެ އަގުތަކަށް ނުފޫޒު ފޯރުވުމާއި، ސިޔާސީ ފަންޑުތަކާ ގުޅޭ ޤާނޫނުތަކާ ޚިލާފުވި ކަމަށް ބުނާ ދަޢުވާތަކުން އެކަމަނާ ވަނީ ބަރީއަކޮށްފައެވެ.

މި މައްސަލައަކީ ކުރީގެ ރައީސް ޔޫންގެ ދައުރުގައާއި އޭގެ ފަހުން އެ ދެމަފިރިންނަށް އަމާޒުވި ކޮރަޕްޝަންގެ ތުހުމަތުތަކުގެ ތެރެއިން އެއް މައްސަލައެވެ. 2024 ވަނަ އަހަރުގެ ޑިސެމްބަރު މަހު އަސްކަރީ ޤާނޫނު ހިންގަން އުޅެ ނާކާމިޔާބުވުމާ ގުޅިގެން، 2025 ވަނަ އަހަރު ޔޫން ވަނީ މަޤާމުން ވަކިކޮށްފައެވެ. އަދި އެކަމާ ގުޅުންހުރި މައްސަލަތަކުގައި އޭނާގެ މައްޗަށް މިހާރުވެސް ފަސް އަހަރުގެ ޖަލު ޙުކުމެއް އިއްވާފައިވާއިރު، އިތުރު މައްސަލަތަކުގެ ޝަރީޢަތްތައް ވެސް ދަނީ ހިނގަމުންނެވެ.