ކާބޯތަކެތީގެ ހިދުމަތް ފޯރުކޮށްދޭ ތަންތަނުން ނަގަމުން އަންނަ ފީތައް އެމްއެފްޑީއޭއިން ކުޑަކޮށްފިއެވެ.

މިކަމާ ގުޅޭގޮތުން މޯލްޑިވްސް ފުޑް އެންޑް ޑްރަގް އޮތޯރިޓީން ބުނެފައިވަނީ، ކާބޯތަކެތީގެ  ހިދުމަތްދޭ ތަންތަނަށް ހުއްދަ ދޫކުރުމަށް އަމަލުކުރަމުންގެންދާ ޤަވާއިދުގެ ދަށުން ކާބޯތަކެތީގެ ހިދުމަތްދޭ ތަންތަން ރަޖިސްޓްރީކުރުމުގައި އެ އިދާރާއިން ނަގަމުންގެންދާ ރަޖިސްޓްރޭޝަން ފީ އާއި ކެޓަގަރީ ފީ ކުޑަކުރުމަށް ނިންމާފައިވާކަމަށެވެ. 

އެމްއެފްޑީއޭއިން މި ފީތައް ކުޑަކުރުމަށް ނިންމާފައިވަނީ ދެ އަހަރުދުވަހުގެ ނިޔަލަށެވެ. ފީތައް ކުޑަކޮށްފައިވަނީ، ހިދުމަތްދޭ ތަންތަނުގެ ރަޖިސްޓްރޭޝަން ފީ އާއި ކެޓަގަރީ ފީގެ 50 އިންސައްތައެވެ.

ވިޔަފާރީގެ އުސޫލުން ކާބޯތަކެތީގެ ހިދުމަތްދޭ ތަންތަނުގެ ރަޖިސްޓްރޭޝަން ފީއެއްގެ ގޮތުގައި މިހާތަނަށް ނަގަމުން އައިސްފައިވަނީ،  500 ރުފިޔާއެވެ. މި ފީ ނަގަނީ އަހަރަކު އެއްފަހަރެވެ. ކާބޯތަކެތީގެ ހިދުމަތްދޭ ތަންތަނާއި ފަރާތްތަކަށް ލއިސަންސް ދިނުމަށް ނަގާ އަހަރީ ފީތަކަށް ބަލާއިރު، ބަދިގެއާއެކު ސަރވިން އޭރިއާއަށް 2،000 ރުފިޔާގެ ފީއެއް ނަގައެވެ. އަދި ސީޓިން 50 ގޮނޑިއަށްވުރެ އިތުރުވާނަމަ ކޮންމެ 50 ގޮނޑިއަކަށް 100 ރުފިޔާގެ ފީއެއް ނަގައެވެ. 

- ބަތްޕާރުސަލް ހަދައިގެން ވިއްކާ ތަންތަން/ޓޭކްއަވޭ: 2،000 ރުފިޔާ

- ވިޔަފާރީގެ އުސޫލުން ކާބޯތަކެތި ހަދާ ބަދިގެތައް: 2،000 ރުފިޔާ

- ހެދިކާ ހަދާ ތަންތަން: 2،000 ރުފިޔާ

- ޖޫސްފަދަ ޑްރިންކްސް ވިއްކާ ތަންތަން: 2،000 ރުފިޔާ

- މަގުމަތީ ކާނާ ވިއްކާ ގާޑިއާ ފަދަ ތަންތަން: 500 ރުފިޔާ

މީގެ އިތުރުން ހުއްދަ ދީފައިވާ ތަންތަނުން ކުރެ ތަނެއްގެ ލައިސަންސް ގެއްލިއްޖެނަމަ އައު ލައިސަންސެއް އަލުން ހެއްދުމާއި އަދި ހަލާކުވެގެން އައު ކުރާނަމަ ގަވާއިދުގައި އޮންނަގޮތުން ލައިސަންސް ފީގެ 50 އިންސައްތަ ނަގައެވެ.