މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިސްނަގައިގެން ބްލަޑް ބޭންކަށް ލޭ ހަދިޔާކުރުމުގެ ބޮޑު ޕްރޮގްރާމެއް ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ފަށަން ނިންމައިފިއެވެ.

މޯލްޑިވްސް ބްލަޑް ސާވިސް (އެމްބީއެސް) އާ ގުޅިގެން ކުރިއަށް ގެންދާ މި ޕްރޮގްރާމް އޮންނާނީ މި މަހުގެ 31 އަދި ފެބްރުއަރީ 1 ވަނަ ދުވަހުއެވެ. މި ހަރަކާތް ކުރިއަށް ދަނީ ވެލާނާ އިންޓަނޭޝަނަލް އެއާޕޯޓުގެ އެއާޕޯޓް ރެކްރިއޭޝަން ސެންޓަރު (އޭއާރުސީ) ގައެވެ.

އެމްއޭސީއެލް އިން ބުނީ މިއީ ކޮންމެ އަހަރަކުވެސް އެ ކުންފުނީގެ މުވައްޒަފުންނަށް ހުޅުވާލައިގެން ކުރިއަށް ގެންދާ ޕްރޮގްރާމެއް ނަމަވެސް، މި އަހަރުގެ ހަރަކާތް ވަރަށް ބޮޑަށް ފުޅާކޮށްފައިވާ ކަމަށެވެ. އެގޮތުން، އެހެން އަހަރުތަކާ ހިލާފަށް މި އަހަރު މި ޕްރޮގްރާމްގައި ބައިވެރިވުމުގެ ފުރުސަތު ވީއައިއޭގައި މަސައްކަތްކުރާ ދައުލަތުގެ އިދާރާތަކާއި، މުއައްސަސާތަކާއި، އެކި ކުންފުނިތަކުގެ އިތުރުން ރިސޯޓް މުވައްޒަފުންނަށްވެސް ވަނީ ހުޅުވާލާފައެވެ.

މި ޕްރޮގްރާމް މިގޮތަށް ބަދަލުކުރުމުގެ މައިގަނޑު މަގުސަދަކީ، މި ދުވަސްވަރު ލޭ ލިބުން ދަތިވެ، އެމްބީއެސް އިން އާންމުންގެ އެހީތެރިކަމަށް އެދިފައިވާތީ އެކަމަށް އެހީތެރިވުމެވެ. އަދި ކޮންމެ އަހަރެއްގެވެސް ރޯދަ މަހަކީ ލޭ ލިބުން އާދަޔާ ހިލާފަށް ދަތިވާ ދުވަސްވަރަކަށް ވާތީ، ރޯދަ މަހުގެ ކުރިން ބްލަޑް ބޭންކް ރިޒާވް އިތުރުކުރުމަށް އެހީތެރިވުމަކީވެސް މި ހަރަކާތުގެ ބޭނުމެއް ކަމަށް އެ ކުންފުނިން މައުލޫމާތުދެއެވެ.

މި ޕްރޮގްރާމްގައި ބައިވެރިވެ ލޭ ހަދިޔާކުރަން ބޭނުންވާ ފަރާތްތަކުން https://tinyurl.com/46y3p7m7 މެދުވެރިކޮށް ރަޖިސްޓްރީވުމަށް އެމްއޭސީއެލް އިން އެދެއެވެ.