ވައި ނުސާފުވެ، ދުރު ފެންނަ މިންވަރު މިއަދު ދެ ކިލޯ މީޓަރަށް ވުރެ ދަށްވެފައިވާ ކަމަށަށް މޫސުމާ ބެހޭ ގައުމީ އިދާރާ، މެޓުން ހާމަކޮށްފިއެވެ.
މިދިޔަ ހަތް ދުވަހަށް ބަލާއިރުވެސް އެންމެ ބޮޑަށް ދުންފުހުގެ އަސަރު ކޮށްފައި ވަނީ މިއަދު ކަމަށާ އެ އިދާރާއިން މައުލޫމާތުދެއެވެ.
މި ދުވަސްވަރު ރާއްޖޭގެ އެކި ހިސާބުތަކަށް ދުންފުހުގެ އަސަރު ކުރަމުން އަންނާތީ، ކުރިއަށް އޮތް ދެދުވަހުވެސް ވައި ނުސާފުވާނެކަމަށް މެޓުން މައުލޫމާތުދީފައިވެއެވެ. އެހެންކަމުން، އެ ކަމަށް ސަމާލުވާން އެ އިދާރާއިން ވަނީ އިލްތިމާޒްކޮށްފައެވެ.
ވައިގެ ކޮލިޓީ ދައްކައިދޭ އައިކިއު އެއާއިން ދައްކާ ގޮތުގައި، މާލެ ސަރަހައްދުގައި މި ވަގުތު ވައިގެ ކޮލިޓީ ހުރީ 164ގައެވެ. އެއާއިއެކު ނުރައްކަލުގެ ރަތް ސަމާލު މިހާރުވަނީ ނެރެފައެވެ.
މީގެ އިތުރުން، ކުޅުދުއްފުށީގައި ވައިގެ ސާފުމިން ހުރީ 157ގައެވެ. އައްޑޫގައި ހުރީ 122ގައެވެ. އަދި ފުވައްމުލަކުގައި އެ އަދަދު ހުރީ 147ގައެވެ. މިއީ ނުރައްކަލުގެ އޮރެންޖު ސަމާލެވެ.
މިއާއިއެކު، ބޭރަށޤ ނިކުތުމުގެ ކުރިން މާސްކު އެޅުމަށާއި، ނުސާފު ވައި ވަނަ ނުދިނުމަށްޓަކައި ދޮރުތައް ލައްޕައިފައި ބެހެއްޓުމަށާއި، ކުޅިވަރުކުޅުމާއި ކަސްރަތުކުރުން މަޑުޖައްސާލަން ސިއްހީ މާހިރުން އިލްތިމާސްކުރެއެވެ.
Advertisement
This content is created and paid for by advertisers and does not involve Voice Journalists
