ޗައިނާގެ އިޤްތިޞާދީ ދުވެލި މަޑުޖެހުމާއި، ރިއަލް އެސްޓޭޓް ދާއިރާއަށް ކުރިމަތިވެފައިވާ ގޮންޖެހުންތަކުން އަރައިގަތުމަށް ސަރުކާރުން ކުރާ ޚަރަދުތައް އިތުރުކުރުމާ ގުޅިގެން، އެ ޤައުމުގެ ދަރަނި ވަރަށް ބޮޑަށް އުފުލިއްޖެއެވެ.

2025 ވަނަ އަހަރަށް ޗައިނާގެ ސަރުކާރުން ކަނޑައަޅާފައިވާ ބަޖެޓް ޑެފިސިޓަކީ ޖީ.ޑީ.ޕީގެ ގާތްގަނޑަކަށް 4 އިންސައްތައެވެ. މިއީ ފަހުގެ ތާރީޚެއްގައި ބަޖެޓް ޑެފިސިޓް މިހާ މަތިވި ފުރަތަމަ ފަހަރެވެ. މި ޑެފިސިޓް ފޫބެއްދުމަށްޓަކައި ޗައިނާ ސަރުކާރުން ވަނީ ގާތްގަނޑަކަށް 11.9 ޓްރިލިއަން ޔުއާން (1.7 ޓްރިލިއަން އެމެރިކާ ޑޮލަރު) ގެ ބޮންޑު ބާޒާރަށް ނެރެފައެވެ. މިއީ އޭގެ ކުރީ އަހަރާ އަޅާބަލާއިރު 3 ޓްރިލިއަން ޔުއާން އިތުރު އަދަދެކެވެ. މި ފައިސާ މައިގަނޑު ގޮތެއްގައި ހޭދަކުރަނީ އުމްރާނީ ތަރައްޤީގެ މަޝްރޫޢުތަކަށާއި، އިޖުތިމާޢީ ރައްކާތެރިކަމުގެ ޕްރޮގްރާމްތަކުގެ އިތުރުން ލޯކަލް ގަވަރންމަންޓްތަކުގެ ބޭނުންތަކަށެވެ.

ޗައިނާގެ ދަރަނި އިތުރުވުމުގެ މައިގަނޑު އެއް ސަބަބަކީ މަގުތަކާއި، ސުކޫލުތަކާއި، ހޮސްޕިޓަލްތަކުގެ އިތުރުން ސިޓީތަކުގެ އުމްރާނީ ތަރައްޤީއަށް ލޯކަލް ގަވަރންމަންޓްތަކުން ނަގާ ލޯނުތައް އިތުރުވުމެވެ. މީގެ ތެރެއިން ގިނަ ލޯނުތަކަކީ ރަސްމީ ބަޖެޓުން ބޭރުން ނަގާފައިވާ ލޯނުތަކަށް ވުމުން، ރަސްމީ ތަފާސްހިސާބުތަކުން ފެންނަން ހުރި މިންވަރަށްވުރެ ލޯކަލް ގަވަރންމަންޓްތަކުގެ ހަގީގީ ދަރަނި މާ ބޮޑުވާނެ ކަމަށް މާހިރުން ލަފާކުރެއެވެ. އިޤްތިޞާދީ ދުވެލި އިތުރަށް މަޑުޖެހި، ދަރަނި ދެއްކުމަށް ދަތިވެއްޖެނަމަ، މިއީ ދިގު މުއްދަތުގައި މާލީ ނުރައްކަލަކަށް ވެދާނެ ކަމުގެ އިންޒާރު އިޤްތިޞާދީ މާހިރުން ދީފައިވެއެވެ. 

މީގެ އިތުރުން، ޗައިނާގެ ލޯކަލް ގަވަރންމަންޓްތަކަށް އާމްދަނީ ހޯދުމަށް ބޭނުންކުރާ މައިގަނޑު ވަސީލަތެއް ކަމަށްވާ ބިން ވިއްކައިގެން ލިބޭ އާމްދަނީ، ރިއަލް އެސްޓޭޓް މާކެޓް ދަށްވުމުގެ ސަބަބުން ވަނީ ވަރަށް ބޮޑަށް ކުޑަވެފައެވެ. މީގެ ސަބަބުން ޚަރަދުތައް ހަމަޖެއްސުމަށްޓަކައި ލޯނު ނެގުމަށް އެ ފަރާތްތަކަށް ވަނީ މަޖުބޫރުވެފައެވެ. މި މައްސަލައަށް ހައްލެއް ހޯދުމުގެ ގޮތުން، މަރުކަޒީ ސަރުކާރުން ވަނީ ލޯކަލް ގަވަރންމަންޓްތަކަށް ލޯނު ނެގޭނެ މިންވަރު އިތުރުކޮށްދީ، ބަޖެޓުން ބޭރުން ނަގާފައިވާ ދަރަނިތައް ރަސްމީ ބޮންޑުތަކަށް ބަދަލުކުރުމުގެ މަސައްކަތް ފަށާފައެވެ.

ޗައިނާގެ ދަރަނި ހުރި މިންވަރަކީ ޖީ.ޑީ.ޕީގެ 68.7 އިންސައްތަ ކަމަށްވާއިރު، މިއީ ކުރިއަރާފައިވާ އެހެން ބައެއް ޤައުމުތަކާ އަޅާބަލާއިރު ދަށް އަދަދެކެވެ. ނަމަވެސް، ދަރަނި އިތުރުވަމުންދާ ހަލުވިމިނަކީ މާލީ ހަމަޖެހުމަށް އޮތް ގޮންޖެހުމެއް ކަމަށް ތަޖުރިބާކާރުން ފާހަގަކުރެއެވެ.

ދުނިޔޭގެ އިޤްތިޞާދުގެ މައިގަނޑު އެއް ބާރަކީ ޗައިނާ ކަމަށްވުމުން، އެ ޤައުމުގެ މާލީ ހާލަތަށް އަންނަ ބަދަލުތަކުގެ އަސަރު މުޅި ދުނިޔޭގެ ބާޒާރުތަކަށް ކުރާނެއެވެ. އެހެންކަމުން، އިޤްތިޞާދީ ކުރިއެރުމަށް ބޭނުންވާ އެހީތެރިކަން ފޯރުކޮށްދިނުމާއި، އިތުރުވަމުންދާ ދަރަނި ކޮންޓްރޯލްކުރުމާ ދެމެދު ޗައިނާ ސަރުކާރުން ގެންގުޅޭނެ ސިޔާސަތުތަކަށް ދުނިޔޭގެ ނަޒަރު ވަނީ ހުއްޓިފައެވެ.