ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ބެލުމުގެ ދަށުގައިވާ ފްލެޓްތަކުގެ ކޮރިޑޯތަކާއި އާންމު ސަރަހައްދުތަކުގައި ބަހައްޓާފައިވާ ތަކެތި ނެގުމަށް އެ ކޯޕަރޭޝަނުން މިއަދު އަންގައިފިއެވެ.
އެޗްޑީސީން ނެރުނު އިއުލާނެއްގައި ބުނީ، ފްލެޓްތަކުގެ ކޮރިޑޯއާއި އާންމު ސަރަހައްދުތަކުގައި އާންމުންނަށް ދަތިވާ ގޮތަށް ފަރުނީޗަރާއި، ބައިސްކަލާއި، ފައިވާން ހަރު ފަދަ ތަކެތި ބަހައްޓާފައި ހުންނަކަން ފާހަގަކުރެވިފައިވާ ކަމަށެވެ. މިގޮތަށް ތަކެތި ބެހެއްޓުމުގެ ސަބަބުން އެހެން މީހުންނަށް އާންމު ބައިތައް ބޭނުންކުރުމުގައި ދަތިވާ ކަމުގެ ޝަކުވާ ލިބެމުންދާ ކަމަށްވެސް އެ ކޯޕަރޭޝަނުން ބުނެފައިވެއެވެ.
މީގެ އިތުރުން، އާންމު ސަރަހައްދުތަކުގައި ތަކެތި ބެހެއްޓުމަކީ އިމާރާތުގެ ސާފުތާހިރުކަމާއި، ސަލާމަތާއި ރައްކާތެރިކަން ބެލެހެއްޓުމަށް ހުރަސްއެޅޭ ކަމެއްގެ ގޮތުގައި އެޗްޑީސީން ވަނީ ފާހަގަކޮށްފައެވެ. އަދި މިއީ ފްލެޓްތަކުގެ އާންމު ބައިތަކާއި ވަސީލަތްތައް ބޭނުންކުރުމުގެ އުސޫލާވެސް ހިލާފު ކަމެކެވެ.
އެހެންކަމުން، އާންމު ސަރަހައްދުތަކުގައި ބަހައްޓާފައިވާ މިފަދަ ތަކެތި މިއަދުން ފެށިގެން 02 (ދޭއް) ދުވަހުގެ ތެރޭގައި ނެގުމަށް އެޗްޑީސީން ވަނީ އަންގާފައެވެ. އެ މުއްދަތުގެ ތެރޭގައި ނުނަގާ ހުންނަ ތަކެތި އެ ކޯޕަރޭޝަނުން ނަގާނެ ކަމަށާއި، އެ މަސައްކަތުގެ ތެރެއިން މުދަލަށް ލިބޭ އެއްވެސް ގެއްލުމަކަށް އެޗްޑީސީން ޒިންމާ ނުވާނެ ކަމަށްވެސް އެ އިއުލާނުގައި ބުނެފައިވެއެވެ.
އެޗްޑީސީން ވަނީ މިފަދަ ކަންކަމުގައި އާންމުންގެ ފަރާތުން ލިބޭ އެއްބާރުލުމަށް ޝުކުރު އަދާކޮށްފައެވެ.
Advertisement
This content is created and paid for by advertisers and does not involve Voice Journalists
