ޑިވެލޮޕްމަންޓް ބޭންކަށް، ބޭންކިން ވިޔަފާރި ފެށުމުގެ ހުއްދަ ދީފި
އިގްތިސާދީ އަދި އިޖުތިމާއީ ތަރައްގީއަށް އިންވެސްޓު ކުރުމާއި އުމްރާނީ ތަރައްގީއަށް ބޭނުންވާ ފައިސާ ހޯދުމުގެ މަގްސަދުގައި، ރައީސުލްޖުމްހޫރިއްޔާއަށް ލިބިވަޑައިގަންނަވާފައިވާ ބާރުގެ ދަށުން އުފެއްދި، ޑިވެލޮޕްމަންޓް ބޭންކަށް ބޭންކިންގ ވިޔަފާރި ފެށުމުގެ ހުއްދަ ދީފިއެވެ.
މިކަމާ ގުޅޭގޮތުން މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ބުނީ ޑިވެލޮޕްމަންޓް ބޭންކަށް ވިޔަފާރި ފެށުމުގެ ހުއްދަ ދީފައިވަނީ އިއްޔެ ކަމަށެވެ. ޑީބީއެމަށް ބޭންކެއް ހުޅުވުމަށް ބޭނުންވާ ބޭންކިންގ ލައިސަންސް ދީފައިވަނީ، 2024 ވަނަ އަހަރުގެ އޮކްޓޯބަރުމަހުގެ 13 ވަނަ ދުވަހުއެވެ. މި ބޭންކަކީ ސައްތައިންސައްތަ ދިވެހި ސަރުކާރު ހިއްސާވާ ބޭންކްއެކެވެ.
މަރުކަޒީ ބޭންކުން ބުނީ ޑިވެލޮޕްމަންޓް ބޭންކްގެ ޚިދުމަތް ފެށުމުން، ދިގުމުއްދަތުގެ މާލީ އެހީތެރިކަން ހޯދުމަށް މަގުފަހިވެ، ރާއްޖޭގެ އިޤްތިޞާދު ދެމެހެއްޓެނިވި ގޮތެއްގައި ކުރިއެރުވުމަށް ބޮޑު އެހީތެރިކަމެއް ލިބިގެންދާނޭކަމަށެވެ. އަދި މިއީ ދިވެހިރާއްޖޭގެ މާލީ ދާއިރާ ފުޅާކޮށް ހަރުދަނާކުރުމަށް ކުރެވޭ މަސައްކަތްތަކަށް ލިބުނު މުހިންމު ކުރިއެރުމެއް ކަމުގައިވެސް އެ އޮތޯރިޓީން ވަނީ ފާހަގަކޮށްފައެވެ.
ޑީބީއެމް އުފެއްދުމާ ގުޅޭގޮތުން ރައީސުލްޖުމްހޫރިއްޔާގެ އޮފީހުން ބުނެފައިވަނީ މި ބޭންކު އުފެއްދުމުގެ މައިގަނޑު މަގްސަދަކީ، ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި ގޮތެއްގައި އިގްތިސާދީ އަދި އުމްރާނީ ތަރައްޤީގެ ކަންކަމަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުން ކަމަށެވެ.
Advertisement
This content is created and paid for by advertisers and does not involve Voice Journalists
