މިލަދުންމަޑުލު ދެކުނުބުރީ ވިހަފަރުގައި އެއާޕޯޓު ތަރައްގީ ކުރުމަށް ބޭނުންވާ ބިންހިއްކުމުގެ އަމަލީ މަސައްކަތް ފަށައިފި އެވެ.

އެ މަސައްކަތް ފެށުމަށް އެ ސަރަހައްދުގައި މިއަދު މެންދުރުފަހު ބޭއްވި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ.

މިއަދުގެ ރަސްމިއްޔާތުގައި ޢަމަލީ ގޮތުން މިމަޝްރޫޢު ފައްޓަވައިދެއްވީ މިނިސްޓާ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުޙައްމަދު ސަޢީދާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑްގެ މެނޭޖިން ޑިރެކްޓަރު އިބްރާހީމް ޝަރީފް މުޙައްމަދެވެ.

ވިހަފަރުގައި އެއާޕޯޓު ތަރައްގީކުރަން ބިން ހިއްކަން ފެށުން

ނ. ވިހަފަރުގައި އެއާޕޯޓެއް ތަރައްގީ ކުރުމަށް ރައީސުލްޖުމްހޫރިއްޔާގެ ގަރާރަކުން ކަނޑައަޅުއްވައި، އިއުލާންކުރެއްވީ 2024 ވަނަ އަހަރުގެ މާރޗް މަހުގަ އެވެ. އަދި 2025 ވަނަ އަހަރުގެ ޖުލައި މަހުގެ ތެރޭގައި، މިލަދުންމަޑުލު ދެކުނުބުރީގެ ރައްޔިތުންނާ ބައްދަލުކުރައްވައި އެމަނިކުފާނު ވަނީ 2026 ވަނަ އަހަރުގެ ކުރީކޮޅު، މިކަމުގެ އަމަލީ މަސައްކަތް ފެށޭނެ ކަމުގެ ޔަގީންކަން ދެއްވާފައެވެ.

ވިހަފަރުގައި އެއާޕޯޓު ތަރައްގީކުރަން ބިން ހިއްކަން ފެށުން

މާފަރުގައި ވައިގެބަނދަރެއް އޮތްކަމުގައި ވިޔަސް، އެ އަތޮޅު ހޮޅުދޫ، ވެލިދޫ އަދި ފޮއްދޫ ހިމެނޭ ސަރަހައްދުގައި އިތުރު ވައިގެބަނދަރެއް އޮތުން މުހިންމުކަމަށް ރައީސުލްޖުމްހޫރިއްޔާ ދެކެވަޑައިގަންނަވާ ކަމަަށް ސަރުކާރުން ބުނެ އެވެ. ވަކިން ހާއްސަކޮށް ފަތުރުވެރިކަމުގެ ގޮތުން ކުރިއަރާފައިވާ، އަދި ކުރިއަރަމުންދާ އަތޮޅެއްގެ ގޮތުންނާއި، އިގްތިސާދު ސިންދަފާތުކުރުމުގެ ބޮޑެތި މަޝްރޫއުތައް ހިނގާނޭ އަތޮޅެއްގެ ގޮތުން، މި ވައިގެ ބަނދަރު އޮތުމުން ދުރު ރާސްތާގައި ލުއިފަސޭހައާއި ފައިދާ ލިބޭނޭކަމުގައިވެސް އެމަނިކުފާނު ގަބޫލުފުޅު ކުރައްވައެވެ.

ވިހަފަރުގައި އެއާޕޯޓު ތަރައްގީކުރަން ބިން ހިއްކަން ފެށުން

ވިހަފަރުގައި އެއާޕޯޓެއް ތަރައްގީ ކުރުމަށް ބިންހިއްކުމުގެ އަމަލީ މަސައްކަތް މިއަދު ފަށާފައިވާއިރު، މި މަޝްރޫޢުގެ ދަށުން، 40 ހެކްޓަރަށްވުރެ ބޮޑު ސަރަޙައްދެއް، 1.6 މީޓަރުގެ އުސްމިނުގައި ހިއްކާނެ އެވެ.