އެސްޓީއޯގެ ޑިރެކްޓަރުންގެ ބޯޑުގައި އާންމު ހިއްސާދާރުންގެ ފަރާތުން ތަމްސީލުރާ ޑިރެކްޓަރުގެ މަޤާމަށް ކުރިމަތިލުމުގެ ފުރުސަތު އެކުންފުނިން ހުޅުވާލައިފިއެވެ.
އެސްޓީއޯގެ ޑިރެކްޓަރުންގެ ބޯޑަށް ސަރުކާރުގެ ފަރާތުން ކަނޑައަޅާ 6 ޑިރެކްޓަރުންނާއެކު އާންމު ހިއްސާދާރުންގެ ފަރާތުން ޑިރެކްޓަރަކު ކަނޑައަޅައެވެ. އެސްޓީއޯއިން މިއަދު ނެރެފައިވާ އިއުލާނުގައި ވަނީ ކުރިމަތިލާ ޑިރެކްޓަރުންގެ ކިބައިގައި ހުންނަންޖެހޭ ޝަރުތުތައް ބަޔާންކޮށްފައެވެ.
އެގޮތުން ޑިރެކްޓަރަކަށް އެދި ހުށަހަޅާ މީހަކީ އުމުރުން 30 އަހަރު ފުރިފައިވާ މީހެއްކަމަށް ވުމާއި، ކުންފުނީގެ ހިއްސާދާރަކަށް ވުމުގެ އިތުރުން، ކެޕިޓަލް މާކެޓް ޑިވެލޮޕްމަންޓް އޮތޯރިޓީ، ސީއެމްޑީއޭއިން ކަނޑައަޅާފައިވާ ޝަރުތުތައް ފުރިހަމަވާން ޖެހެއެވެ.
މީގެ އިތުރުން ވިޔަފާރިއާ ގުޅުންހުރި ދާއިރާއަކުން ޑިގްރީއެއް ހާސިލްކުރުމާއެކު ފަސް އަހަރުގެ އަމަލީ ތަޖުރިބާ ހުންނަން ޖެހެއެވެ. ޑިޕްލޮމާ ފެންވަރުނަމަ، 10 އަހަރުގެ އަމަލީ ތަޖުރިބާ ހުންނަން ޖެހެއެވެ. މީގެ އިތުރުން ކުންފުނީގެ ވިޔަފާރި އާއި ވިޔަފާރީގެ ދާއިރާތަކަށް އަހުލުވެރިވުމާއި، މާލީ ރިޕޯޓްތައް އެނަލައިޒް ކުރުމުގެ ގާބިލްކަން ހުންނަން ޖެހެއެވެ.
އެސްޓިއޯއިން ބުނީ ކުންފުނީގެ ޑިރެކްޓަރުކަމަށް އެދޭ ފަރާތްތަކުން އަންނަ ފެބުރުއަރީމަހުގެ 25 ވަނަ ދުވަހުގެ 15:00 ގެ ކުރިން ހުށަހަޅަންޖެހޭނޭކަމަށެވެ.
Advertisement
This content is created and paid for by advertisers and does not involve Voice Journalists
