ދިވެހިރާއްޖެއާ އޮމާން އާ ދެޤައުމުގެ މެދުގައި އިގްތިސާދީ، ވިޔަފާރީގެ މުހިންމު މުއާމަލާތްތަކެއް ކޮށްފިއެވެ.

މާލީ ވަޒީރު، މޫސާ ޒަމީރު އޮމާނަށް ކުރައްވަމުން ގެންދަވާ ރަސްމީ ދަތުރުފުޅުގައި، މިއަދު ވަނީ އެ ޤައުމުގެ މާލީ ވަޒީރު ސުލްޠާން ބިން ސާލިމް ބިން ސައީދު އަލް ހަބްސީއާ މިއަދު ރަސްމީ ބައްދަލުވުމެއް ބާއްވަވާފައެވެ. 

ފިނޭންސް މިނިސްޓްރީން ބުނީ ދެ ބޭފުޅުންގެ މި ބައްދަލުވުމުގައި ދެ ޤައުމުގެ ދެމެދުގައި އޮތް ވިޔަފާރީގެ ގުޅުން އިތުރަށް ވަރުގަދަކޮށް، އިޤްތިޞާދީ އެއްބާރުލުން ފުޅާކުރެވިދާނެ ގޮތްތަކާ ގުޅޭގޮތުން ދެ ވަޒީރުން މަޝްވަރާ ކުރެއްވި ކަމަށެވެ. މިގޮތުން، ވިޔަފާރީގެ މުޢާމަލާތްތައް އިތުރުކުރުމާއި، ކަނޑުގެ ވަސީލަތްތަކާއި މަސްވެރިކަމުގެ ސިނާޢަތުގައި ހުރި ފުރުޞަތުތަކުގެ ބޭނުން އެންމެ އެދެވޭ ގޮތުގައި ހިފުމާ ގުޅޭގޮތުން މަޝްވަރާ ކުރެއްވިއެވެ. މީގެ ތެރޭގައި ކަނޑުދަތުރުފަތުރުގެ ޚިދުމަތްތަކާއި، ވެލިއު ޗެއިން އަދި އެއާ ގުޅުންހުރި ވިޔަފާރީގެ ހަރަކާތްތަކުން ލިބެންހުރި ފުރުޞަތުތައް ހިމެނޭކަމަށް މާލީ ވުޒާރާއިން ބުންޏެވެ.

މީގެ އިތުރުން، މި ބައްދަލުވުމުގައި ވަނީ ރާއްޖޭގައި ކުރިއަށްގެންދާ ހަކަތައާ ގުޅޭ މަޝްރޫޢުތަކުގައި ދެ ފަރާތް ގުޅިގެން މަސައްކަތް ކުރެވިދާނެ ދާއިރާތަކާ ބެހޭގޮތުންނާއި، ރާއްޖޭގެ ތަރައްޤީގެ އަމާޒުތަކަށް އެހީތެރިކަން ފޯރުކޮށްދިނުމާ ގުޅޭގޮތުން ވެސް މަޝްވަރާކޮށްފައެވެ.

ރާއްޖޭގެ އިގްތިސާދުގައި އޮމާންއަކީ ވަރަށް މުހިންމު ބައިވެރިއެކެވެ. އެގޮތުން އޮމާނަކީ ރާއްޖެއަށް އެންމެ ގިނައިން ތެޔޮ އެތެރެކުރާ ޤައުމަށް ވުމާއެކު، އެ ޤައުމަކީ ރާއްޖޭގެ އެންމެ ބޮޑު ވިޔަފާރި ބައިވެރިޔާ ކަމަށް މާލީ ވުޒާރާއިން ބުންޏެވެ.  އެހެންކަމުން، މި ޒަމާންވީ އިޤްތިޞާދީ ގުޅުން ދެމެހެއްޓުމާއި އިތުރަށް ތަރައްޤީކުރުމުގެ މުހިންމުކަން މި ބައްދަލުވުމުގައި ފާހަގަކުރެއްވިކަމަށް މާލީ ވުޒާރާއިން ވަނީ ބުނެފައެވެ.

މާލީ ވުޒާރާއިން ބުނީ،  ޤައުމުން އިސްކަންދޭ މުހިންމު ކަންކަމުގައި ކުރިއެރުން ހޯދުމަށާއި، ވިޔަފާރިއާއި އިންވެސްޓްމަންޓް އަދި އެކި މަޝްރޫޢުތަކުގައި އެއްބާރުލުން އިތުރަށް ހަރުދަނާކުރުމަށްޓަކައި، ދިވެހި ސަރުކާރާއި އޮމާންއިން ކުރަމުންދާ މަސައްކަތްތައް ކުރިއަށް ގެންދާނޭ ކަމަށެވެ.