ކެންސަރަކީ ހަމައެކަނި ބައްޔެއް ނޫނެވެ. އެއީ އިންސާނާގެ ހަށިގަނޑާއި ނަފްސު ހަލާކުކޮށްލާ ވަރުގަދަ ތޫފާނެކެވެ. އެ ތޫފާނުގައި ލިބޭ ވޭނާއި ކެކުޅުން އެނގޭނީ އެކަމާ ކުރިމަތިލާ މީހަކަށް އެކަންޏެވެ. ދެން އޭނާއާ އެންމެ ގާތުގައި ތިބޭ މީހުންނަށެވެ. ދަރިންނާއި، މައިންބަފައިންނާއި، އާއިލާގެ މީހުންނާއި ރަޙުމަތްތެރިންނެވެ. 

މިއީވެސް ދަރިއަކު އޭނާގެ ބައްޕަ މި ތޫފާނުގައި ތަޙައްމަލްކުރަމުންދާ ވޭނާއި ކެކުޅުން ބަޔާންކޮށް ކިޔައިދިން ވާހަކައެކެވެ. ދަރިފުޅަށް އެ ވޭން ނޭޅި ނަމަވެސް، ބައްޕަގެ ވޭން އޭނާ ދުށީ ނުހަނު ގާތުންނެވެ. އޭނާއަށްވެސް ބައްޕަގެ ވޭން އިޙްސާސް ކުރެވޭ ފަދައެވެ.

ބައްޕަގެ ކެންސަރުގެ ދަތުރުން ކުޑަ މިންވަރެއް އާއްމުންނާ ޙިއްސާކޮށް މުޙައްމަދު މާހިދު މީސްމީޑިއާގައި ކޮށްފައިވާ ޕޯސްޓުގައިވާގޮތުން، އޭނާގެ ބައްޕަ އެ ބަލީގައި ދިރިއުޅެމުންދާތާ މިހާރު އަށް އަހަރުވެއްޖެއެވެ. ބައްޕަގެ ދުލުން ބޭރުނުވާ ވޭނާއި، ހިތުގެ ކެކުޅުންތައް އޭނާ ކިޔައިދީފައިވަނީ، އެ މަންޒަރުތައް ލޮލުން ދެކެ، އެ ހިތްދަތިކަން އިހުސާސްކުރާ ދަރިއެއްގެ ހައިސިއްޔަތުންނެވެ.

އެގޮތުން އޭނާ ބުނީ 2017 ވަނަ އަހަރު ކެންސަރުގެ ސަބަބުން ބައްޕަގެ ކަތުރު ކަށިގަނޑުން ނެގި ތިން އިންޗީގެ ކަށިކޮޅުގެ ސަބަބުން ކެއުމާއި ބުއިމަށް ކުރިމަތިވި ހުރަސްތައް ނައްތާލުމަށް، އަނގައަށް ޕްލެޓް ފޮއްޗެއް ލައްވައިގެން ކަތުރު ކަށިގަނޑު އަލުން ބިނާކުރެވުނު ކަމަށެވެ. ނަމަވެސް، އުންމީދު ކުރި އުފާވެރިކަން ދެމިގެން ދިޔައީ ކުޑަ ދުވަސްކޮޅަކަށެވެ.

އޮޕަރޭޝަނަށްފަހު އެއްމަސް ވަންދެން އަނގައިގެ ފާރުގަނޑު ނުހިކި އޮތުމަށްފަހު، އަލުން އޮޕަރޭޝަންކޮށް އަނގަ ފަހަން ޖެހުނެވެ. ކެއުމަށް ކޮންމެވެސް ވަރެއްގެ ލުއިކަމެއް ލިބުނު ނަމަވެސް، ތިން މަސް ފަހުން އަނގަޔަށް ލެއްވި ޕްލެޓް ފޮތި ބޭރަށް ނިކުންނަން ފެށުމާއި، ލޭ އައުމުގެ މައްސަލަތައް ކުރިމަތިވިއެވެ. އިންފެކްޝަނެއްގެ ބިރުވެރިކަން އޮތުމުން، ޢާއިލާއިން އަވަސްވެގަތީ ބައްޕަގެ ފަރުވާ ހޯދަމުންދާ އިންޑިއާގެ ކޮޗިންގައި ހުންނަ ހޮސްޕިޓަލަށް ދިއުމަށެވެ.

ކޮޗިންނަށް ދިޔަ ދުވަހު ޑޮކްޓަރުގެ ބުރަކަމުން ބައްދަލުނުވި ނަމަވެސް، ޖެހިގެން އައި ދުވަހު ނެގި އެކްސްރޭއިން ލިބުނީ ހިތްފަޅައިގެންދާ ފަދަ ޚަބަރެކެވެ. އަނގައަށް ކުރިން ލައްވާފައިވާ ކަށިތައް އެކްސްޕޯސް ވެފައިވާ ކަމަށް ޑޮކްޓަރު ބުންޏެވެ. 

"ދެން ކިހިނެއް ހަދަންޖެހޭނީ؟" މާހިދު ދުލުން މި ސުވާލު ނުކުތީ ބޭއިހްތިޔާރުގައެވެ. ޑޮކްޓަރު ބުނީ އަނގަޔަށް ލެއްވި ޕްލެޓް ފޮތި ނައްޓާލަން ޖެހޭ ކަމަށެވެ. ކުރި ހުރިހާ މަސައްކަތެއް ބޭކާރުވީއެވެ.

”އިމްޕްލާންޓް ކުރި އެތީގެ އެއްވެސް ބޭނުމެއް ނުކުރެވޭކަމަށް ޑޮކްޓަރު ބުންޏެވެ. ސުބުހާނަالله. ހިތާ ހިތާ ބުނެވުނެވެ. އެއީ ހާދަ ވޭނެކެވެ. ލޯމަތިން 6 ފަހަރު އެ މަންޒަރު ފެނިއްޖެއެވެ. އުފުލި ވޭނާއި ރުއި ރުއިން އަހަރެން އަޑު އެހީމެވެ. އަމިއްލައަށް މަރުވާންވެސް އުޅުނެވެ. އަހަރެންގެ ކުރިމަތީގައެވެ. އެ މަންޒަރަށް ކެތްނުވެގެން އަހަރެންގެ ހިތްވެެސް ފަޅައިގެން ގޮސްދާނެހެން ހީވާ ފަހަރު އާދެއެވެ. އެކަމަކު ކުރާނީ ކީއްހެއްޔެވެ.؟ ކެތްތެރިވުން ނޫން ގޮތެއް ނެތެވެ.“ މާހިދު ފޭސްބުކުގައި ލިޔެފައިވެއެވެ. 

ޑޮކްޓަރުގެ އެދުމާ އެއްގޮތަށް އާއިލާއިން އޮޕަރޭޝަނަށް އެއްބަސްވިއެވެ. އީ.ސީ.ޖީ އާއި އެކްސްރޭ އާއި ލޭގެ ސާމްޕަލް ނެގުމަށްފަހު ހޭނައްތާ ޑޮކްޓަރަށް ދައްކާ އެޑްމިޓް ކުރުމަށް ވާންޖެހޭ ހުރިހާ ކަމެެއް ކޮށް ނިންމުމަށްފަހު އޮޕަރޭޝަން ކުރީ 27 ޖެނުއަރީ 2026 ވަނަ ދުވަހު ހެނދުނެވެ. 9:30 ގައި ވެއްދި އޮޕަރޭޝަން ނިންމާލީ މެންދުރުފަހު 3:45 ގައެވެ. ޕްލެޓް ފޮތި ނެގުމަށްފަހު އެތަން ފިލްކުރުމަށް މޭމަތިން ނުވަތަ ފަލަ މަސްގަނޑުން މަސް ނަގަންޖެހިދާނެކަމަށް ޑޮކްޓަރު އޮތީ ބުނެފައެވެ.

އޮޕަރޭޝަނަށްފަހު 7 ދުވަސް ވަންދެން އަނގަ އެއްވެސް ވަރަކަށް ނުހުޅުވަން ޑޮކްޓަރު އެދުނު ކަމަށާ، އެ އޮޕަރޭޝަން ކުރުމަށް ބައްޕަގެ އަނގަ މިޔަކަނިން ފެށިގެ ކަންފަތް ފޫޅާ ހަމައަށް ކަފާލަން ޖެހުނު ކަމަށް އޭނާ ބުންޏެވެ. ބައްޕަގެ ހާލު ބަލާލުމަށް އައި.ސީ.ޔޫއަށް ވަތްއިރު ރަނގަޅަށް ހޭނާރައެވެ. އޮތީ ވެންޓިލޭޓަރުގައެވެ.

މާހިދު ހުރިހާވެސް ދުޢާއަކީ އޭނާގެ ބައްޕައަށް އަވަސް ޝިފާއެއް މިންވަރު ކުރެއްވުމަށެވެ. އެ ބައްޕަގެ ވޭން ތަކަށް ލުއި ލިބުމެވެ. އޭނާގެ ފޭސްބުކު ޕޯސްޓު ނިންމާލާފައިވެސް ވަނީ ބައްޕައަށް އަވަސް ޝިފާއެެއް މޮންވަރުކުރެއްވުން އެދި ދުޢާ ކުރާ ހާލުގައެވެ.