ދަރީން މަދަރުސާއަށް ފޮނުވުމުން ބެލެނިވެރިންގެ ޒިންމާ ނިމުނީ ކަމަށް ނުދެކުމަށް މިއަދުގެ ހުކުރު ޚުތުބާގައި އެދިއްޖެއެވެ. 

ދިރާސީ އައު އަހަރުގެ ކިޔެވުން ފެށުނު ހަފުތާއާ ގުޅުވައިގެން، މިއަދު ރާއްޖޭގެ މިސްކިތްތަކުގައި އިއްވި ހުކުރު ޚުތުބާ ޚާއްޞަކޮށްފައިވަނީ "ވަށައިޖެހޭ ތަޢުލީމުގެ މަތީގައި އުންމަތް ބިނާކުރާށެވެ!" މި މައުޟޫޢަށެވެ.

ޚުތުބާގައި ބަޔާންކޮށްފައިވާ ގޮތުގައި، ދަރިވަރުންނަކީ މާތް الله އަހަރެމެންނާ ޙަވާލުކުރައްވައިފައިވާ އަގުބޮޑު އަމާނާތެކެވެ. އިސްލާމްދީނުގައި ތަޢުލީމަކީ ހަމައެކަނި ދުންޔަވީ ވަޒީފާއަކަށް ތައްޔާރުވުމެއް ނޫންކަން ފާހަގަކުރަމުން، އެ ތަޢުލީމާއި ތަރުބިޔަތު ވާންޖެހޭނީ ކުދީންގެ ބުއްދިއާއި އަޚުލާޤަށް ފުރިހަމަކަން ގެނެސްދޭ، ޞާލިޙު އިންސާނަކު ބިނާކުރުމަށް ފޯރުކޮށްދެވޭ ވަށައިޖެހޭ ތަޢުލީމަކަށް ކަމަށް ޚުތުބާގައި ބުންޏެވެ.

މުދައްރިސުންނަށް މުޚާޠަބުކޮށް ޚުތުބާގައި ބުނީ، މުދައްރިސުންނަކީ ޢިލްމާއި މަޢުރިފާގެ ނޫރުން ދަރިވަރުންގެ ހިތްތައް އަލިކޮށްދޭ ދަންމަރުތަކެއް ކަމަށެވެ. ކޮންމެ މާއްދާއެއް ކިޔަވައިދިން ކަމުގައި ވިޔަސް، އިސްލާމްދީނުގެ އަޞްލުތަކާއި ތަރަހައިގެ ތެރެއަށް ފެއްތުމަކީ މުދައްރިސުންގެ ބޮޑު މަސްއޫލިއްޔަތެއް ކަމުގައި ޚުތުބާގައި ހަނދާންކޮށްދިނެވެ. އަދި ހެޔޮކަން އުނގަންނައިދޭ މީހާއަށް މާތް اللهގެ ރަޙުމަތާއި މަލާއިކަތުންގެ ހެޔޮ ދުޢާ ލިބޭނެކަން ޙަދީޘްފުޅުތަކުގެ އަލީގައި ބަޔާންކުރިއެވެ.

ދަރިވަރުންނަށް ދިން ނަސޭހަތުގައި، ތަޢުލީމު އުނގެނުމަކީ ސުވަރުގެއަށް މަގު ފަހިކޮށްދޭ އަޖުރު މަތިވެރި ޖިހާދެއްގެ ގޮތުގައި ސިފަކޮށްފައިވެއެވެ. މުދައްރިސުންނަށް އިޙުތިރާމުކުރުމަށާއި، ވަގުތުގެ ބޭނުން ހެޔޮގޮތުގައި ހިފުމަށް ދަރިވަރުންނަށް އިލްތިމާސްކުރިއެވެ.

ބެލެނިވެރިންގެ ޒިންމާއާ ގުޅޭގޮތުން ޚުތުބާގައި ބުނީ، ދަރީން މަދަރުސާއަށް ފޮނުވުމުން ޒިންމާ ނިމުނީ ކަމަށް ނުދެކުމަށެވެ. އެ ކުދީންގެ ޖިސްމާނީ އަދި ނަފުސާނީ ބަދަލުތަކަށް ހޭލުންތެރިވެ، އާއިލީ ނުތަނަވަސްކަމުން ދަރީން ރައްކާތެރިކޮށްދޭ އައްޑަނައަކަށް ބެލެނިވެރިން ވާންޖެހޭނެ ކަމަށް ބުންޏެވެ.

މީގެ އިތުރުން، ތަޢުލީމީ ދާއިރާގެ ސިޔާސަތުތައް ކަނޑައަޅުއްވާ ފަރާތްތަކަށް އަމާޒުކޮށް ޚުތުބާގައި ވަނީ، ތަޢުލީމީ މަންހަޖުތަކާއި މުޤައްރަރުތައް އިލާހީ މަންހަޖާ އެއްގޮތަށް، ދުރު ރާސްތާގެ ސާބިތު އަމާޒުތަކެއްގެ މައްޗަށް ބިނާކުރުމަށް ގޮވާލާފައެވެ.

ޚުތުބާގައި އިތުރަށް ބުނީ، މިއަދު އުންމަތް ބޭނުންވަނީ ދީނީ އަދި ދުންޔަވީ ޢިލްމަށް ފަރިތަ، އިޚުލާޞްތެރި އަދި ޤައުމީ މަޞްލަޙަތު އިސްކުރާ ޖީލެއް ކަމަށެވެ. މިފަދަ ޖީލެއް ބިނާކުރުމަށްޓަކައި އެންމެހައި ފަރާތްތަކުން ގުޅިގެން މަސައްކަތް ކުރުމަށް މިއަދުގެ ހުކުރު ޚުތުބާގައި ވަނީ ބާރުއަޅާފައެވެ.