ދިވެހިން އިހްތިރާމް ކުރަނީ ވައްކަން ކުރާ މީހުންނަށް ކަމަށް ކުރީގެ ރައީސް އަބްދުالله ޔާމީން އަބްދުލްޤައްޔޫމް ވިދާޅުވެއްޖެއެވެ. 

ރޭގެ ޕީއެންއެފް ބައްދަލުވުމުގައި ވާހަކަދައްކަވަމުން ޔާމީން ވިދާޅުވީ، ދިވެހިރާއްޖޭގެ ޖިނާޢީ އަދުލުގެ ނިޒާމް ބައްޓަންވެފައި އޮންނަ ގޮތާމެދު ލަދުވެތިވާ ކަމަށެވެ. 

އެހެން ވިދާޅުވި ސަބަބު ހާމަކުރައްވަމުން ޔާމީން ވަނީ އެމްއެމްޕީއާރްސީ މައްސަލާގައި އެންމެ ބޮޑެތި ތުހުމަތުތަކެއް ކުރެވޭ ކުރީގެ ނާއިބު ރައީސް އަހުމަދު އަދީބު އާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު މިނިވަންކަމާއެކު ދޫކޮށްލާފައި ހުރިކަން ފާހަގަކުރައްވާފައެވެ.

ކަންމިހެން ހުރުމުން ރާއްޖޭގައި ވައްކަމެއް ކުރާ ނަމަ ކުރަންޖެހޭނީ ބޮޑު އަދަދަކުން ކަމަށާ، ކުޑަ އަދަދަކުން ވައްކަން ކޮށްފި ނަމަ އެ ކުށުގެ ހުކުމް ތަންފީޒުކޮށް ނިންމާނެ ކަމަށް ޔާމީން ވިދާޅުވިއެވެ. 

ޔާމީން ވިދާޅުވީ، ރާއްޖޭގައި ސަރުކާރުގެ ފައިސާ ނަގާމީހުންނާ ކޮރަޕްޝަން ހިންގާ މީހުންނަށް ޖަލުހުކުމެއް އަޔަސް އެ ތަންފީޒު ނުކުރާނެ ކަމަށާ، ރާއްޖޭގެ ޖިނާއީ ނިޒާމަކީވެސް ކޮރަޕްޝަންގެ ނިޒާމެއް ކަމަށެވެ. 

މިއާއެކު ޔާމީން ވިދާޅުވީ، ރާއްޖޭގައި ހިމާޔަތް ލިބެނީވެސް ވައްކަން ކުރާ މީހުންނަށް ކަމަށާ ރައްޔިތުން އިހްތިރާމްވެސް ކުރަނީ ވައްކަން ކުރާ މީހުންނަށް ކަމަށެވެ. 

މީގެ އިތުރުންވެސް ޔާމީން ވަނީ މާލެ ސިޓީ ކައުންސިލްގެ ކޮރަޕްޝަނާއި ސަރުކާރުގެ ތެރޭގައި ހިންގަމުންދާ ކޮރަޕްޝަނުގެ ވާހަކަތައް ދައްކަވާފައެވެ.