ދެކުނުގެ އަތޮޅުތައް ގުޅާލުމުގައި އެންމެ އިސްކަމެއް ދީފައިވާނޯ ރައްޔިތުންނަށް ލުއި ފަސޭހަވާނެގޮތަށް ހެޔޮ އަގުގައި އެ ޚިދުމަތް ދިނުމަށް ކަމަށް އައިލެންޑް އެވިއޭޝަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވެއްޖެއެވެ. 

ދެކުނުގެ ގުޅުން އިފްތިތާޙް ކުރުމަށް މިއަދު ގަން އިންޓަރނޭޝަނަލް އެއަރޕޯޓުގައި ބޭއްވި ޚާއްޞަ ރަސްމިއްޔާތެއްގައި ވާހަކަދައްކަވަމުން އިޔާސް ވިދާޅުވީ، ދެކުނުގެ އަތޮޅުތައް ގުޅާލުމާއެކު ފެށިގެން ދިޔައީ އައު ބާބެއް ކަމަށެވެ. އަދި އެ ކަމުގެ ސަބަބުން އެ ސަރަޙައްދުގައި ފަތުރުވެރިކަން އިތުރަށް ކުރިއަރައިގެންދާނެ ކަމަށްވެސް އޭނާ ވިދާޅުވިއެވެ. 

"މޯލްޑިވިއަންއިން މިހާރުވެސް ހަފްތާއަކު 2 ދުވަހު ގަން މާލެއަށް ދަތުރުކުރޭ. މި އިފްތިތާޙުކުރެވޭ ޚިދުމަތާއެކު ދެކުނުގެ ހުރިހާ އަތޮޅުތަކެއް ގުޅާލެވިގެންދާނެ. މި ސަރަޙައްދުގެ ރައްޔިތުންގެ ގުޅުން ބަދަހިވެ، އިޖުތިމާޢީ ގޮތުން ކުރިއެރުން އަންނާނެ. މި ސަރަޙައްދަކީ ފަތުރުވެރިކަމުގައިވެސް ފާހަގަކޮށްލެވޭ ސަރަޙައްދަކަށް ވުމާއެކު މި ދަތުރުތަކާއެކު މި ސަރަޙައްދަށް ފަތުރުވެރިކަން އިތުރަށް ކުރިއަރާނެ" އިޔާސް ވިދާޅުވިއެވެ. 

މިއާއެކު އިޔާސް ވިދާޅުވީ، ދެކުނުގެ އަތޮޅުތަކުގެ ދަތުރުތައް ކޮންމެ ދުވަހަކުވެސް ކުރިއަށްދާނެ ކަމަށާ، އެއީ އެ އަތޮޅުތަކުގެ ރައްޔިތުންގެ އެދުމުގެ މަތީން ރައީސުލްޖުމްހޫރިއްޔާ ނިންމެވި ނިންމުމެއް ކަމަށެވެ. އެހެންކަމުން ސަރުކާރާއި މޯލްޑިވިއަނުންވެސް އެ ދަތުރުތަކަށް ކަނޑައަޅާފައިވާނީ ރައްޔިތުންނަށް ލުއި ފަސޭހަ، ހެޔޮ އަގުތަކެއް ކަމަށް އޭނާ ވިދާޅުވިއެވެ. 

މި އޮޕަރޭޝަންގެ ބޭސްއަކަށް ގަން އިންޓަރނޭޝަނަލް އެއާޕޯޓް ހަމަޖައްސާފައިވާއިރު، އެ އެއާޕޯޓްވެގެން ގޮސްފައިވަނީ އައިލެންޑު އޭވިއޭޝަންގެ ތާރީޚުގައި ވެލާނާ އިންޓަރނޭޝަނަލް އެއާޕޯޓު ފިޔަވައި އިތުރު އޮޕަރޭޝަން ބޭސްއެއްގެ ގޮތުގައި ކަނޑައެޅިގެން ދިޔަ ފުރަތަމަ އެއާޕޯޓަށެވެ.

މޯލްޑިވިއަނުން މި ދަތުރުތައް ކުރަން ހަމަޖެހިފައިވަނީ، 5 ސެކްޓަރ އަށް ބަހާލައިގެންނެވެ. އެއީ، 

- އައްޑޫ ގަމުން، ކާޑެއްދޫ، ކޫއްޑޫ އެއާޕޯޓު އަދި ފުވައްމުލަކަށް 

- ފުވައްމުލަކުން ކާޑެއްދޫ އަދި ކޫއްޑޫއަށް

• ގަން - ފުވައްމުލައް - 500ރ

• ފުވައްމުލައް - ކޫއްޑޫ - 650ރ

• ފުވައްމުލައް - ކާޑެއްދޫ - 650ރ

• ގަން - ކާޑެއްދޫ - 900ރ

• ގަން - ކޫއްޑޫ - 900ރ

މި ދަތުރުތައް ކުރުމަށް ހަމަޖެހިފައިވަނީ، މޯލްޑިވިއަންގެ އެންމެ ކުދި ސީޕްލޭން ދަތުރުތަކުގައި ބޭނުންކުރާ ޓްވިން އޮޓަރ މަރުކާގެ ބޯޓުތަކުގައެވެ. މިއީ، 15 މީހުންގެ ޖާގައިގެ ކުދި ބޯޓުތަކެކެވެ.