ހައްޖު ކޯޕަރޭޝަންގެ ފަރާތުން މިއަހަރުގެ ހައްޖު ދަތުރަށް ވާންޖެހޭ ތައްޔާރީތަކުގެ ބޮޑުބައެއް މިހާރު ވަނީ ނިމިފައި ކަމަށް އެ ކޯފަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.

ޝަކީލް މިހެން ވިދާޅުވެފައިވަނީ ދައުލަތުގެ މިޑިއާގެ ޕްރޮގުރާމެއްގައި ވާހަކަފުޅު ދައްކަވަމުންނެވެ.

އޭނާ ވިދާޅުވިގޮތުގައި، ހައްޖު ކޯޕަރޭޝަންގެ ފަރާތުން ހައްޖަށް އަދި އުމްރާއަށް ދާ ފަރާތްތަކަށް ހެޔޮ އަގުގައި ފެންވަރު ރަނގަޅު ހިދުމަތްތަކެއް ދިނުމަށް އެ ކޯޕަރޭޝަނުން މުހިންމު މަސައްކަތްތަކެއް އަންނަނީ ކުރަމުންނެވެ. އަދި މި ތައްޔާރީތަކުގެ ބޮޑުބައެއް ނިމިފައިވާކަމަށްވެސް އޭނާ މައުލޫމާތުދެއްވިއެވެ. 

އެގޮތުން، މިއަހަރުގެ ހައްޖުވެރިން ތިބުމަށް ހަމަޖެހިފައިވާ ހޮޓްލަތަކަށް ފައިސާ ދައްކާ، މީގެ ކުރިން 2 ސްޓަރ ފެންވަރުގެ ހޮޓެލްތައް މިހާރު 4 ސްޓަރ ފެންވަރަށް ހެދުމުގެ މަސައްކަތްވެސް ކޮށް، މައްކާއާއި މަދީނާގެ އެކޮމޮޑޭޝަން ގެ ހުރިހާ ކަމެއް މިހާރު ވަނީ ނިމިފައިކަމަށް ޝަކީލް ވިދާޅުވިއެވެ.  

އޭނާ ވިދާޅުވީ ކުރިން އަހަރެކޭވެސް އެއްގޮތަށް މިއަހަރުވެސް ހައްޖުވެރިން އަރަފާތުގައި ތިބެން ހަމަޖެހިފައިވަނީ ދިވެހި ރައްޔިތުންނަށް ހާއްސަ ސަރަހައްދެއްގައި ކަމަށާއި، އެ ޓެންޓުތަށް ހަމަޖެއއްސުމުގެ މަސައްކަތްވެސް މިހާރު ނިމިފައިވާކަމަށެވެ. 

އަދި މޯލްޑިވިއަން އާއި ސައުދީ އެއާ މެދުވެރިކޮށް ފުރިހަމަ ކުރަންޖެހޭ ހުރިހާ އިންތިޒާމްތަކަކާއި އެކު ދަތުރުފަތުރުގެ ހިދުމަތް ދޭ ފަރާތްތަކާއި އެކު ހަދަންޖެހޭ އެގްރިމެންޓުތަށްވެސް މިހާރު ވަނީ ހަދާަފައިކަމަށް ޝަކީލް މައުލުމާތުދެއްވިއެވެ. 

މީގެ އިތުރުން، ކާބޯތަކެތި ފޯރުކޮށްދޭ ފަރާތްތަކާއި އެކުވެސް އެއްބަސްވުންތައް އެކުލަވާލެވި، ދިވެހި ރަހަތަކަށްވެސް ހާއްސަ ކާނާ މިފަަރު ލިބޭނެ ކަމަށް އެ ކޯޕަރޭސަނުން މައުލުމާތު ދެއެވެ. 

ޝަކީލް ވިދާޅުވީ ހައްޖާޖީންގެ ރައްކާތެރިކަން ކަށަވަރުކުރުމަށްޓަކާވެސް މުހިންމު އެތައް ފިޔަވަޅެއް އެ ކޮޕަރޭޝަނުން އަޅާފައިވާކަމަށެވެ. އެގޮތުން، ފަސްޓްު އެއިޑް އާއި އޮކްސިޖަން ނެގުމަށް ބޭނުންވާ މެޝިންތަކާއި އޮކްސިޖަން ސިލިންޑަރު ކަހަލަ ހުރިހާ ތަކެއްޗެއް ދަތުުރުފަތުރުކުރާއިރު ބަހުގައިވެސް ހުންނާނެކަމަށާއި، މި ވަގުތު ރާއްޖޭގައި  ރާއްޖޭގައި އެންމެ ފެންވަރުގެ ތަމްރީނު ލިބިފައިވާ އެ ކޯޕަރޭޝަންގެ މުވައްޒަފުންނާއި ޑޮކްޓަރުންނާއި ނަރުހުންނަށް ކޮންމެ ތަނެއްގައިވެސް ސިއްހީ ހިދުމަތް ފޯރުކޮށްދެވޭނެކަމަށާއި، ސިއްހީ ރައްކާތެރިކަން ކަށަވަރު ކުރުމަށްޓަކައި ސައުދީ އަރަބިއާގެ ނެޝަނަލް ހޮސްޕިޓަލްގެ ދަށުން ހިންގާ އަބީރު ހޮސްޕިޓަލާއި އެކުވެސް އެއްބަސްވުމެއް ހެދިފައިވާކަމަށް އޭނާ ވިދާޅުވިއެވެ. 

މީގެ އިތުރުން، ހައްޖުވެރިންގެ ކަރުގައި އަޅާފައި އޮންނަ ފާހާއި އެކު އިލެކްޓްރޮނިކް ޓްރެކިންގ ޑިވައިސްއެއް އޮންނާނެ ކަމަށާއި، މި ޑިވައިސް މެދުވެރިކޮށް ހައްޖުވެރިން އަދި އުމްރާވެރިން އުޅުއްވާ ހުރިހާ ހިސާބެއް 24 ބެލޭނެކަމަށްވެސް މައުލޫމާތުދެއްވިއެވެ. 

ޝަކީލް ވިދާޅުވިގޮތުގައި، އެ ކޯޕަރޭޝަންއިން މިވަގުތު ކުރަމުންދާ މަސައްކަތަކީ ހައްޖަށް ވަޑައިގަންނަވާ ފަރާތްތަކުގެ ވިސާ ދޫކުރުމުގެ މަސައްކަތެވެ. އަދި ކުރިއަށް އޮތް 2 ހަފްތާގެ ތެރޭގައި ހުރިހާ ވިސާއެއް ދޫކުރުމުގެ މަސައްކަތްވެސް ނިމޭނެކަމަށާއި، މިހާރު އިދާރީގޮތުން ކުރަންޖެހޭ ހުރިހާ ކަމެއް ނިމިފައިވާ ކަމަށް އޭނާ ވިދާޅުވިއެވެ. 

އަދި ރައީސުލްޖުމްހޫރިއްޔާގެ ލަފައާއި އެއްކޮށް، ކުރިން އަހަރުގެ ހައްޖުތަކުން ތަޖުރިބާ ލިބިގަނެ، އަހަރަކުން އަހަރަކަށް ރަނގަޅުކުރަން ޖެހޭ ކަންކަން ރަނގަޅުކޮށް، މިދިޔަ އަހަރު ދެވުނު ހިދުމަތާއި އެއްފެންވަރެއް ނުވަތަ އެއަށްވުރެވެސް ރަނގަޅު ހިދުމަތެއް ދިނުމަށް ވާންޖެހޭ ހުރިހާ ތައްޔާރީތަކެއް އަންނަނީ ވަމުންކަމަށް ޝަކީލް ވިދާލުވިއެވެ.