މައްކާގެ ކައުބަތުالله ގެފުޅުގެ އުރަކޮޅުގެ (ކިސްވާ) ބައިތަކެއް ޔުނައިޓެޑް އެރަބް އެމިރޭޓްސް (ޔޫއޭއީ) އާ ގުޅުންހުރި ފަރާތްތަކެއް މެދުވެރިކޮށް އެމެރިކާގައި ހުރި ޖެފްރީ އެޕްސްޓީންއަށް ފޮނުވާފައިވާކަން، މިފަހުން އާއްމުވެފައިވާ  އެޕްސްޓީން ލިޔެކިޔުންތަކުން ހާމަވެއްޖެއެވެ.

އެގޮތުން އާއްމު ވެފައިވާ، 2017 ވަނަ އަހަރުގެ ފެބްރުއަރީ އަދި މާރިޗު މަހުގެ އީމެއިލްތަކުން އެނގޭގޮތުގައި، ޔޫއޭއީގައި ހަރަކާތްތެރިވާ ވިޔަފާރިވެރިއެއް ކަމަށްވާ އަޒީޒާ އަލް އަޙްމަދީ އާއި އަބްދުالله އަލް މާރީ ނަމަކަށް ކިޔާ މީހަކާ ގުޅިގެން ވަނީ ކިސްވާގެ ތިން ބައެއް އެޕްސްޓީންއަށް ފޮނުވުމުގެ މަސައްކަތް ކޮށްފައެވެ.

ކައުބަތުالله ގެފުޅުގެ އުރަކޮޅު ކޮންމެ އަހަރަކު ބަދަލުކުރާއިރު، ބާލާ އުރަކޮޅުގެ ބައިތަކަކީ ވަރަށް އަގުބޮޑު އާސާރީ ތަކެތީގެ ގޮތުގައި ބެލެވޭ ތަކެއްޗެވެ.

މި ތަކެތި ސައުދީ އަރަބިއްޔާއިން ބްރިޓިޝް އެއާވޭޒް މެދުވެރިކޮށް ފްލޮރިޑާއަށް ފޮނުވާފައިވަނީ އާޓްވޯކް ނުވަތަ ކުރެހުމުގެ ބާވަތްތަކުގެ ގޮތުގައި ކަމަށް އީމެއިލްތަކުން ހާމަވެއެވެ. އޭގެ ތެރޭގައި ހިމެނެނީ ގެފުޅުގެ އެތެރޭގައި ބޭނުންކޮށްފައިވާ ފޮތިގަނޑަކާއި، ބޭރުގައި ބޭނުންކޮށްފައިވާ އުރަކޮޅުގެ ބައެއްގެ އިތުރުން، އުރަކޮޅު ތައްޔާރުކުރާ ސާމާނުން ހަދާފައިވާ ނަމަވެސް ބޭނުންނުކުރާ ފޮތިގަނޑެކެވެ. މި ތަކެތި އެޕްސްޓީންގެ ގެއަށް ފޯރާފައިވަނީ 2017 ވަނަ އަހަރުގެ މާރިޗު މަހުގައެވެ.

އަޒީޒާ އަލް އަޙްމަދީ އެޕްސްޓީންއަށް ފޮނުވި އީމެއިލެއްގައި ބުނެފައިވަނީ، އެ ފޮތިގަނޑަކީ މަދުވެގެން 10 މިލިއަން މުސްލިމުން ބީހި، އެމީހުންގެ ދުއާ އާއި އުންމީދުތައް އޭގައި ”ރައްކާކުރެވިފައިވާ“ އެއްޗެއް ކަމަށެވެ.

ނަމަވެސް، ކުޑަކުދިންނަށް ޖިންސީ ގޯނާކުރުމުގެ ކުށް ސާބިތުވެފައިވާ އެޕްސްޓީންއާ އަޒީޒާއާ އޮތީ ކޮން ކަހަލަ ގުޅުމެއްކަމެއް އަދި މި ތަކެތި އޭނާއަށް ފޮނުވީ ކީއްވެގެން ކަމެއް ލިޔެކިޔުންތަކުން ސާފެއް ނުވެއެވެ.

މީގެ އިތުރުން، 2017 ވަނަ އަހަރު އެމެރިކާ ސަރަހައްދަށް އެރި ތޫފާން އިރްމާގައި އެޕްސްޓީންގެ އަމިއްލަ ރަށަށް ލިބުނު ގެއްލުންތަކާ ގުޅިގެންވެސް އަޒީޒާ ވަނީ އޭނާގެ ހާލު ބަލާފައެވެ. އަދި އެޕްސްޓީންގެ އެހީތެރިއަކު އަޒީޒާއަށް ޑީއެންއޭ ޓެސްޓް ކުރާ ކިޓެއް ފޮނުވާފައިވާކަންވެސް އީމެއިލްތަކުން އެނގެއެވެ.

ހަމައެއާއެކު، އެފްބީއައި އިން ދާދިފަހުން އާންމުކުރި މެމޯއެއްގައި ބުނެފައިވަނީ، އެޕްސްޓީންއަކީ އެމެރިކާ އާއި އިސްރާއީލުގެ ޖާސޫސީ އިދާރާތަކާ ގުޅިގެން މަސައްކަތްކުރި މީހެއް ކަމަށެވެ. އަދި އޭނާ އިސްރާއީލުގެ ކުރީގެ ބޮޑުވަޒީރު އިހޫދު ބަރާކްގެ ދަށުން ޖާސޫސެއްގެ ގޮތުގައި ތަމްރީނުވެފައިވާ ކަމަށްވެސް އެ ރިޕޯޓުގައި ބުނެފައިވެއެވެ.