ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް އާޓްސްއިން އިންތިޒާމުކޮށްގެން ބޭއްވި "އޯޝަން ގަވަރނަންސް ސިމްޕޯޒިއަމް" މިއަދު ހެނދުނު ބާއްވައިފިއެވެ.
މިއީ ދިވެހިރާއްޖޭގެ ޤައުމީ ޔުނިވަރސިޓީގެ ކިޔަވައިދިނުމާއި ދިރާސާކުރުމުގެ ޤާބިލުކަން އިތުރުކުރުމުގެ މަޤްޞަދުގައި، ޖަޕާނުން ދިވެހިރާއްޖެއަށް ކަނޑައަޅާފައި ހުންނަ އެމްބަސީގެ ދީލަތި އެހީތެރިކަމާއެކު ބޭއްވުނު މިފަދަ ދެވަނަ ސިމްޕޯޒިއަމްއެވެ. މި ސިމްޕޯޒިއަމްގެ މައިގަނޑު މަޤްޞަދުތަކުގެ ތެރޭގައި ކަނޑުފަޅުތަކުގެ ނިޒާމީ ހިންގުން ނުވަތަ "އޯޝަން ގަވަރނަންސް" އާ ގުޅޭގޮތުން ސަރަޙައްދީ ފެންވަރުގައި މަސައްކަތްކުރުމަށް ބާރުއެޅުމާއި، މި ދާއިރާއަށް ކުރިމަތިވަމުންދާ އާ ގޮންޖެހުންތަކުން އަރައިގަންނާނެ ގޮތްތައް ދެނެގަތުން ހިމެނެއެވެ.
ކަނޑުފަޅުތަކުގެ ހިންގުމާ ގުޅޭ ހަރުދަނާ ޤައުމީ ޤާނޫނީ އޮނިގަނޑެއް ނެތުމާއި، އަދި މިކަމަށް ޚާއްޞަ ކުރެވިފައިވާ ގުޅިފައިވާ ޕްލޭނެއް ނުވަތަ ނިޒާމެއް ނެތުމުގެ ސަބަބުން، "އޯޝަން ގަވަރނަންސް" އަކީ ދިވެހިރާއްޖޭގައި އަދިވެސް ދިރާސާކުރުމުގެ ދާއިރާއިން ކުރިއަރުވަން ބޭނުންވާ މުހިންމު ދާއިރާއެކެވެ.
މި ސިމްޕޯޒިއަމް އިފްތިތާޙުކޮށްދެއްވީ މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް، އަލްފާޟިލް އަޙްމަދު ޝިޔާމެވެ. މީގެ އިތުރުން، އިފްތިތާޙީ ރަސްމިއްޔާތުގައި ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ، ޑޮކްޓަރ ޢާއިޝަތު ޝެހެނާޒް އާދަމާއި، ޖަޕާނުން ދިވެހިރާއްޖެއަށް ކަނޑައަޅާފައި ހުންނަ ސަފީރު، ހަރ އެކްސެލެންސީ އިޝިގާމީ ރުމީކޯ ވާހަކަފުޅު ދެއްކެވިއެވެ.
ސިމްޕޯޒިއަމްގެ މައިގަނޑު ތަޤުރީރު (ކީނޯޓް އެޑްރެސް) ދެއްވީ ސަސަކާވާ ޕީސް ފައުންޑޭޝަންގެ އޯޝަން ޕޮލިސީ ރިސާޗް އިންސްޓިޓިއުޓްގެ ސީނިއަރ ރިސާޗް ފެލޯ، ޑޮކްޓަރ މަސަނޯރީ ކޮބަޔާޝީއެވެ.
ދިވެހިރާއްޖޭގެ ޤައުމީ ޔުނިވަރސިޓީގެ އެކި ފެކަލްޓީތަކާއި، ކޮލެޖުތަކާއި ސެންޓަރުތަކުގެ އިތުރުން، "ކަނޑުފަޅުތައް ހިންގުމުގައި ސަރަޙައްދީ އުޞޫލުތައް" މި މައުޟޫޢަށް 6 މުއައްސަސާއަކުން ކަރުދާސް ހުށަހެޅިއެވެ. މީގެ ތެރޭގައި ހިމެނެނީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް، މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް އެނަރޖީ، މިނިސްޓްރީ އޮފް ޓްރާންސްޕޯޓް އެންޑް ސިވިލް އެވިއޭޝަން، މިނިސްޓްރީ އޮފް ފޮރިން އެފެއާޒް، އެޓަރނީ ޖެނެރަލްގެ އޮފީސް އަދި މޯލްޑިވްސް ނޭޝަނަލް ޑިފެންސް ފޯސްގެ ކޯސްޓްގާޑެވެ.
މީގެ އިތުރުން، އިންޑިއާ ކަނޑާ ގުޅިފައިވާ ސަރަޙައްދީ ހަތަރު ޤައުމެއް ކަމަށްވާ ބަންގްލަދޭޝް، އިންޑިއާ، ޕާކިސްތާން، އަދި ސްރީލަންކާގެ މަންދޫބުން ބައިވެރިވެ، ދިރާސާ ކަރުދާސްތައް ހުށަހެޅިއެވެ. އަދި މަދަނީ ޖަމްޢިއްޔާއެއް ކަމަށްވާ "ޕާލޭ މޯލްޑިވްސް" އިން ވެސް މި ސިމްޕޯޒިއަމްގައި ކަރުދާހެއް ހުށަހަޅާފައިވެއެވެ.
މި ސިމްޕޯޒިއަމް މެދުވެރިކޮށް، ސިޔާސަތު ކަނޑައަޅާ ފަރާތްތަކާއި، އެކަޑަމީ ދާއިރާގެ ބޭފުޅުންނާއި، ދާއިރާގެ ތަޖުރިބާކާރުންނާއި، ސަރަޙައްދީ މާހިރުން އެއްތަންވެ، އެންމެންނަށް ކުރިމަތިވާ ގޮންޖެހުންތަކާ މެދު މަޝްވަރާކޮށް، ދިވެހިރާއްޖެއާއި ދެކުނު އޭޝިއާ ސަރަޙައްދުގައި ކަނޑުފަޅުތަކުގެ ހިންގުން ހަރުދަނާކުރުމަށް ގުޅިގެން މަސައްކަތްކުރެވޭނެ ގޮތްތަކާ ގުޅޭގޮތުން ފުޅާ ދާއިރާއެއްގައި ވަނީ ޚިޔާލު ބަދަލުކުރެވިފައެވެ.
Advertisement
This content is created and paid for by advertisers and does not involve Voice Journalists
