10 ރިސޯޓްގައި ރަލާއި އޫރުމަސް ނުވިއްކައި ދިވެއްސަކަށް 400 ޑޮލަރު ދެވޭނެކަމަށް ގަބޫލެއް ނުކުރެވޭ: މައުރޫފް
ދިވެހިންގެ ނަމުގައި މި ސަރުކާރުން ހަދާ 10 ރިސޯޓްގައި ރަލާއި އޫރުމަސް ނުވިއްކައި ކޮންމެ ދިވެއްސަކަށް 400 ޑޮލަރު ދެވޭނެކަމަށް ބުއްދި ގަބޫލުނުކުރާ ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ދިވެހީންގެ ނަމުގައި މަދުވެގެން 10 ރިސޯޓް ތަރައްގީކޮށް ކޮންމެ އަހަރަކު ހުރިހާ ދިވެހީންނަށް ފައިދާ ބަހަން ނިންމާ އެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެ ދެއްވި ރިޔާސީ ބަޔާނުގައި ވަނީ އިއުލާނު ކުރައްވައިފައެވެ.
ރޭ އެމްޑީޕީން ބޭއްވި ހަރުގެ ޖަލްސާގައި އެކަމަށް ފާޑުވިދާޅު ވާހަކަދައްކަވަމުން މައުރޫފް ވަނީ ރައީސުލްޖުމްހޫރިއްޔާގެ ރިޔާސީ ބަޔާނުގައި ހަލާލް ޓޫރިޒަމްގެ ވާހަކަދައްކަވާފައިވާ ކަމަށެވެ. އަދި ހަލާލް ޓޫރިޒަމް އަށް ހިންގާ ރިސޯޓް ތަކުގައި ރަލާއި އޫރުމަސްވެސް ނުވިއްކާނެ ކަމަށާ، އެހެން ކަމަށް ވާނަމަ، އެ ރިސޯޓް ތަކުން ކޮންމެ ދިވެއްސަކަށް 400 ޑޮލަރު ބެހޭ ވަރަށް ފައިދާ ލިބޭނެކަމަށް އޭނާ ގަބޫލުނުކުރައްވާ ކަމަށް ވިދާޅުވިއެވެ.
ދިހަ ރިސޯޓް ހަދާފައި އަހަރަކު 400 ޑޮލަރު ދޭނަމޭ. ހަލާލް ޓޫރިޒަމްގެ ވާހަކަވެސް ދެއްކެވި. ވަރަށް ބޮޑަށް. އަޅުގަނޑު ހިތަށް އަރަނީ، މިބޭފުޅާ މި ހައްދަވާ ރިސޯޓްތަކުގައި ހަމަ ގައިމުވެސް ރަލާއި އޫރު މަހެއް ނުވިއްކާނެއޭ. ނުވިއްކާ، 10 ރިސޯޓް ހަދައިގެން ކޮންމެ ދިވެހި ރައްޔިތަކަށް އޭގެން 400 ޑޮލަރު ދޭނެ ގޮތެއް އަޅުގަނޑުގެ ބުއްދިއަކަށެއް ފަހުމެއް ނުވޭ
މައުރޫފް ޒާކިރު
މީގެ އިތުރުން، މައުރޫފް ވަނީ މިފަހަރުގެ ރިޔާސީ ބަޔާނުން ފެނުނު މަންޒަރަކީ ކުރިން ހަދާފައިވާ ދޮގުތައް ތަކުރާރުކުރެއްވުން ކަމަށާ އެ ދޮގުތަކަށްވެސް ފޮނިތޮށި ކާފޫރުތޮޅި އަޅާފައިވާ ކަމަށެވެ. އަދި ރައްޔިތުންނަށް ވެފައިވާ ވައުދުތައް ފުއްދުމުގެ ރޫހެއް މި ސަރުކާރުގެ ނެތް ކަަމަށް މައުރޫފް ވިދާޅުވި އެވެ.
އިއްޔެގެ ރިޔާސީ ބަޔާން ދެއްވަމުން ރައީސް މުޢިއްޒު ވިދާޅުވީ، މި ރާއްޖޭގެ ފަޅުތަކާއި ރަށްތަކާއި ގިރިތަކާއި އެ ނޫން ކޮންމެ ތަނަކީ ހުރިހާ ދިވެހީންގެ މިލްކުވެރިކަން އޮތް ތަންތަން ކަމަށެވެ. އެހެން ކަމުން ފަތުރުވެރިކަމުން ދިވެހި ހުރިހާ ރައްޔިތުންނަށް ހަމަހަމަ ކަމާއެކު މަންފާ ލިބެން ޖެހޭ ކަމުގައި ވިދާޅުވި އެވެ.
އެކަމަށް މަގު ފަހި ކުރުމުގެ ގޮތުން ދިވެހީންގެ ނަމުގައި މަދުވެގެން 10 ރިސޯޓް ތަރައްގީކޮށް ކޮންމެ އަހަރަކު ހުރިހާ ދިވެހީންނަށް ފައިދާ ބަހަން ނިންމާފައިވާ ކަމުގައި ރައީސް ވިދާޅުވި އެވެ.
"ސަރުކާރުގެ ކުންފުންޏެއް މެދުވެރިކޮށް ކުރިއަށް އޮތް ތިން އަހަރު ދުވަހުގެ ތެރޭގައި މަދުވެގެން 10 ރިސޯޓް ތަރައްޤީކޮށް އެ ރިސޯޓްތަކުން ލިބޭ ފައިދާގެ ބޮޑު ބައެއް ހަމަ އެއްވެސް ރައްޔިތަކު ބާކީ ނުކޮށް ރާއްޖޭގެ ކޮންމެ ރައްޔިތެއްގެ ބޭންކު އެކައުންޓަށް ހަމަހަމަ ކަމާއެކު އަހަރަކު އެއް ފަހަރު ބޭރު ފައިސާއިން ޖަމާކޮށްދޭން,"
ރައީސް މުޢިއްޒު
ރައީސް ވިދާޅުވި ގޮތުގައި މި ގޮތަށް ތަރައްގީކުރާ ހުރިހާ ރިސޯޓެއްގެ ހިއްސާ ދިވެހި ހުރިހާ ރައްޔިތުންނަށް ލިބޭ ގޮތަށް ގާނޫނުގައި އެކަން ކަނޑައަޅުއްވާނެ ކަމުގައި ރައީސް ވިދާޅުވި އެވެ.
އަދި ރިސޯޓްތައް ތަަރައްގީކޮށް ކުރިއަށް އޮތް 2030 ވަނަ އަހަރުން ފެށިގެން ފައިދާ ޖަމާކުރަން ފެށޭނެ ކަމަށް އުންމީދު ކުރައްވާ ކަމުގައި ރައީސް ވިދާޅުވި އެވެ.
ރައީސް ވިދާޅުވި ގޮތުގައި އަންދާޒާ އަކީ އަހަރަކު ކޮންމެ ރައްޔިތެއްގެ އެކައުންޓަށް 400 ޑޮލަރު ޖަމާވުން ކަމަށެވެ. އަދި ވިދާޅުވީ އެ އުންމީދު ހަގީގަތަކަށް ހެދުމަށް ވަރަށް ހަލުވިކަމާއެކު މަސައްކަތް ކުރައްވާނެ ކަމަށް ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
