ނިއުރޭޑިއަންޓާ ދެކޮޅަށް ކުޅެންއޮތް މެޗް ގްރީން ސްޓްރީޓްސް އިން ދޫކޮށްލި މައްސަލާފައި އެފްއޭއެމުން ނިންމި ނިންމުން ބަލައި ނުގަންނާނޭކަމަށް ވެލެންސިއާއިން ބުނެފިއެވެ.

މިކަމާ ގުޅޭގޮތުން ވެލެންސިއާއިން ނެރުނު ބަޔާނުގައި ބުނީ، ނިއު ގްރީސް ސްޓްރީޓްސް ބައްދަލުކުރަން އޮތްމެޗް ނުކުޅެ ގަސްދުގައި ދޫކޮށްލުމުން އެފްއޭއެމްގެ ޑިސިޕްލިނަރީ ކޮމިޓީން މިއަދު ނިންމާފައިވާ ނިންމުން ވެލެންސިއާއިން ގަބޫލުނުކުރާނޭކަމަށެވެ. ވެލެންސިއާއިްނ ނެރުނު ބަޔާނުގައި ވަނީ 4 ކަމެއް ފާހަގަކޮށްފައެވެ.

އެއްސަބަބެއްގެ ގޮތުގައި ވެލެންސިއާއިން ބުނެފައިވަނީ މެޗެއް ނުކުޅެ ނަތީޖާ ކަނޑައެޅުމާއި މެޗެއްކުޅެ ނަތީޖާ ކަނޑައެޅުމަކީ މުޅިން ތަފާތު ދެ ހާލަތެއްކަން ފާހަގަކުރަމުން އެ ކްލަބުން ބުނީ، މެޗް ނުކުޅެ ގަސްދުގައި ދޫކޮށްލި މައްސަލަ ނިންމުމުގެ ގޮތުން ގްރީން ސްޓްރީޓްސް ޖޫރިމަނާކުރުމުގެ އިތުރުން އެ ކްލަބަށް ޓްރާންސްފާ ބޭންއެއް ދިނުމުން އެނގެނީ ގަސްދުގައި މެޗެއް ދޫކޮށްލައިގެން މެޗް ފިކްސިން ފަދަ ފުޓްބޯޅައިން ބޮޑެތި އަދަބުތައްދޭފަދަ ބޮޑު ކުށެއް ގްރީން ސްޓްރީޓްސް އިން  ކޮށްފައިވާކަން އެފްއޭއެމުން ގަބޫލުކުރާކަމެވެ.

ވެލެންސިއާއިން ބުނީ މިފަދަ ބޮޑު މައްސަލައެއްގައި ޓްރާންސްފާ ބޭންއެއް ދީފައިވަނީ ހަމަޖެހޭ އުސޫލަކުން ނޫންކަމަށެވެ. ސަބަބަކީ ކުރިއަށްއޮތް ޓްރާންސްފާ ޕީރިއަޑް އޮތީ މެއި ނުވަތަ ޖޫންމަހަށް ވެފައި މިހާރު ތިބި ހުރިހާ ކުޅުންތެރިްނގެ ކޮންޓްރަކްޓް އާކޮށް ރަޖިސްޓްރީ ކުރުމުގެ ފުރުސަތު އެ ކްލަބަށް ލިބިދީފައި އޮތުމެވެ.

ވެލެންސިއާއިން ފާހަގަކުރާގޮތުގައި އެފްއޭއެމުން ގްރީން ސްޓްރީޓްސް އަށް ދީފައިވަނީވަރަށް ހާލަތަށް ބަލައި ވަރަށް އާދައިގެ އަދަބެކެވެ. 

ވެލެންސިއާއިން ބުނީ ގްރީން ސްޓްރީޓްސްއަށް އަދަބުދިނުމުގައި ވެލެންސިއާއިން ހުށަހެޅި އެއްވެސް ކަމަކަށް ބަލާފައިނުވާކަމަށާއި، މައްސަލަ އިސްތިއުނާފް ކުރަންވެސް ކްލަބަށް ފުރުސަތު ދީފައި ނުވާކަމަށެވެ.

މެޗް ފިކްސިންގައި މައްސަލަތަކުގައި ޕޮއިންޓް އުނިކުރުން ނުވަތަ ރެލިގޭޓްކުރުން ފަދަ ފިޔަވަޅެއް ގްރީން ސްޓްރީޓަށް އަޅާފައިނުވަނީ ނުފޫޒުންކަމަށް ވެލެންސިއާއިން ވަނީ ތުހުމަތުކޮށްފައެވެ. މި މައްސަލަތައް ފީފާ އަދި އޭއެފްސީއާ ހިއްސާކޮށްފައިވާނޭކަމަށް އެ ކްލަބުން ވަނީ ބުނެފައެވެ.

ލީގްގައި އެންމެފަހުން ވެލެންސިއާ އީގަލްސް ބައްދަލުކުރިމެޗުން ވެލެންސިއާ ބަލިވީ 0-2 ގެ ނަތީޖާއަކުންނެވެ. މި މެޗްގެ ނަތީޖާއަށް ބަލައި ވެލެންސިއާއަށް ރެލިގޭޝަނަސް ނުގޮސް ސަލާމަތްވާން އޮތީ ގްރީން ސްޓްރީޓްސް އާއި ނިއުރޭޑިއަންޓް ބައްދަލުކުރާމެޗުން 4-0 ގެ ނަތީޖާއަކުން ނިއު މޮޅުވެގެންނެވެ. ނިއު މިހާރު އޮތް ފޯމަށް ބަލައިރު، އެ ނަތީޖާއިން ގްރީން ބަލިކުރުމުގެ ފުރުސަތު އޮތްކަމަށް ބައެއް ފަރާތްތަކުން ވަނީ ދެކެއެވެ.

ކަން އެގޮތަށް އޮއްވައި ގްރީން ސްޓްރީޓުން ވަނީ ނިއުމެޗަށް ހާޒިރުނުވެ ގަސްދުގައި މެޗް ދޫކޮށްލާފައެވެ. ލީގް ގަވައިދު ބުނާގޮތުން މެޗަށް ހާޒިރު ނުވެއްޖެނަމަ، ހާޒިރުވި ޓީމް މޮޅުވިކަމަށް ކަނޑައަޅަނީ ދެ ލަނޑުގެ ތަފާތަކުންނެވެ.