ކުޑަކުދިންނަށް ޖިންސީ ގޯނާ ކުރުމުގެ ކުށުގައި ޖަލަށްލި، ޖެފްރީ އެޕްސްޓީން އާ ގުޅޭ ސުވާލެއް އެމެރިކާގެ ރައީސް ޑޮނަލްޑް ޓްރަމްޕް އާ ކުރުމުން، ސީ.އެން.އެންގެ ނޫސްވެރިޔާ ކޭޓްލިން ކޮލިންސްއާ ދިމާކޮށްލައިފިއެވެ.
ވައިޓް ހައުސްގައި އަންގާރަ ދުވަހު އޮތް ނޫސްވެރިންގެ ބައްދަލުވުމެއްގައި، ޖެފްރީ އެޕްސްޓީންގެ ފަރާތުން އަނިޔާ ލިބުނު މީހުންނަށް އިންސާފު ނުލިބޭ ކަމަށް އެމީހުންނަށް އިހުސާސް ކުރެވޭތީ އެކަމާ ގުޅޭގޮތުން ކޮލިންސް ސުވާލު ކުރުމުން، ޓްރަމްޕް ވަނީ އޭނާގެ ވާހަކަ މެދުކަނޑާލައިފައެވެ.
އެގޮތުން ނޫސްވެރިޔާއަށް ހުރަސް އަޅަމުން ޓްރަމްޕް ބުނީ ކޮލިންސް އަކީ އެންމެ ދަށު ދަރަޖައިގެ ނޫސްވެރިޔާ ކަމަށާއި، އޭނާ ފަދަ މީހުންގެ ސަބަބުން ސީ.އެން.އެންގެ ރޭޓިންގް ދަށަށް ގޮސްފައިވާ ކަމަށެވެ. އަދި އެތައް އަހަރެއް ވަންދެން ކޮލިންސް ދަންނަ އިރު، އޭނާގެ މޫނުމަތިން ދުވަހަކުވެސް ހިނިތުންވުމެއް ފެނިފައިނުވާ ކަމަށް ބުނެ ޓްރަމްޕް ވަނީ ޒާތީ ގޮތުން ފާޑުކިޔާފައެވެ.
"އަހަރެންނަށް ކަލޭ އެނގޭތާ 10 އަހަރުވެއްޖެ. މިވީ 10 އަހަރުވެސް ކަލޭ ހިނިތުންވެފައި ހުރިތަނެއް ނުފެނޭ. ކަލޭ ހިނިތުންނުވަނީ ކީއްވެގެންކަން އެނގޭތަ؟ އެއީ ތެދު ބަހުން ވާހަކަ ނުދައްކާތީ. ސީއެންއެންވެސް ކަލޭއާމެދު ލަދުގަންނަން ޖެހޭނެ،" ޓްރަމްޕް ބުންޏެވެ.
މިކަމާ ގުޅިގެން ސީ.އެން.އެން އިން ނެރުނު ބަޔާނެއްގައި ބުނެފައިވަނީ ކޮލިންސް އަކީ ހުނަރުވެރި އަދި އާންމުންގެ އިތުބާރު ލިބިފައިވާ ފާހަގަކޮށްލެވޭ ނޫސްވެރިއެއް ކަމަށެވެ.
ނަމަވެސް ވައިޓް ހައުސްގެ ތަރުޖަމާނު އަބީގޭލް ޖެކްސަން ބުނީ، ޓްރަމްޕަކީ ކަންކަން ފޮރުވުމެއް ނެތި ސީދާ ބުނެދޭ މީހެއް ކަމަށާއި، މިއީ އަންހެނަކަށް ވީތީ ކުރި ކަމެއް ނޫން ކަމަށެވެ. އަދި މިއީ މީޑިއާއަށް އޮންނަ އިތުބާރު ކުޑަވުމުގެ ނަތީޖާ ކަމަށްވެސް އޭނާ ބުންޏެވެ.
މިއީ ފަހަކަށް އައިސް އަންހެން ނޫސްވެރިންނާ މެދު ޓްރަމްޕް މިފަދަ ހަރުކަށި ބަސްތަކެއް ބޭނުންކުރި ފުރަތަމަ ފަހަރެއް ނޫނެވެ. މީގެ ކުރިން ބްލޫމްބާގްގެ ނޫސްވެރިޔާ ކެތަރިން ލޫސީއާއި، އޭ.ބީ.ސީ ނިއުސްގެ މޭރީ ބްރޫސްގެ އިތުރުން ސީ.ބީ.އެސް ނިއުސްގެ ނޭންސީ ކޯޑްސްއަށްވެސް ޓްރަމްޕް ވަނީ އެކި ކަހަލަ ބަހުގެ ހަމަލާތައް އަމާޒުކޮށްފައެވެ.
Advertisement
This content is created and paid for by advertisers and does not involve Voice Journalists
