މޯލްޑިވްސް ޒަކާތު ހައުސްއިން މިދިޔަ ޑިސެންބަރު މަހު ބޭސްފަރުވާއަށް އެހީގެ ގޮތުގައި 2.1 މިލިޔަން ރުފިޔާ ޚަރަދުކޮށްފިއެވެ.

ޒަކާތު ހައުސްއިން އާންމުކޮށްފައިވާ 2025 ވަނަ އަހަރުގެ ޑިސެންބަރު މަހުގެ ތަފާސްހިސާބުގައިވާ ގޮތުން، ޑިސެންބަރު މަހު ބޭސްފަރުވާގެ އެހީ ޖުމްލަ 185 ފަރާތަކަށް ވަނީ ހަމަޖައްސައިދީފައެވެ. ބޭސްފަރުވާއަށް އެހީ ދޫކުރެވުނު ދާއިރާތަކަށް ބަލާއިރު، އެންމެ ބޮޑު ހޭދައެއް ކޮށްފައިވަނީ ކެންސަރު ބަލީގެ ފަރުވާއަށެވެ. އެ ބައްޔަށް 301,075.50 ރުފިޔާ ޚަރަދުކޮށްފައިވެއެވެ.

މީގެ އިތުރުން، ސިކުނޑީގެ ބަލިތަކަށް 114,810.00 ރުފިޔާ، ކިޑްނީގެ ބަލިތަކަށް 36,083.50 ރުފިޔާ، ހިތުގެ ބަލިތަކަށް 68,967.00 ރުފިޔާ އަދި ފުއްޕާމޭގެ ބަލިތަކަށް 67,676.00 ރުފިޔާ ޚަރަދުކޮށްފައިވެއެވެ. ޓްރާންސްޕްލާންޓްގެ ފަރުވާތަކަށް 25,443.00 ރުފިޔާ ހޭދަކޮށްފައިވާއިރު، އެހެނިހެން ބަލިތަކަށް އެހީގެ ގޮތުގައި 865,310.85 ރުފިޔާ ވަނީ ދޫކޮށްފައެވެ.

ފަޤީރުންނާއި މިސްކީނުންގެ ބައިން ބޭސްފަރުވާގެ އިތުރުން، ސޯޝަލް ހައުސިންގ ފްލެޓްތަކުގެ ޑައުންޕޭމަންޓް ދެއްކުމަށް 91,000.00 ރުފިޔާ ވަނީ ޚަރަދުކޮށްފައެވެ.

"ފީސަބީލިالله" ބައިގެ ދަށުން ކުރެވުނު މަސައްކަތްތަކަށް ބަލާއިރު، ޤުރްއާން ހިތްދަސްކުރުމާއި ޤުރްއާންގެ ޢިލްމު ފެތުރުމަށް 521,733.43 ރުފިޔާ ވަނީ ޚަރަދުކޮށްފައެވެ. އަދި ދީނީ އެކިއެކި ޕްރޮގްރާމްތައް ހިންގުމަށް 420,698.09 ރުފިޔާ އަދި ފޮތް ތަރުޖަމާކުރުމަށް 401,950.00 ރުފިޔާ ވަނީ ހޭދަކޮށްފައެވެ. މީގެ އިތުރުން މަތީ ތަޢުލީމުގެ ކޯސްތަކަށް 16,443.00 ރުފިޔާ ވަނީ ޚަރަދުކޮށްފައެވެ.

ޒަކާތުގެ ކަންކަން ބަލަހައްޓާ ޢާމިލުންގެ ބައިން އިދާރީ މުވައްޒަފުންގެ އުޖޫރައަށް 284,518.55 ރުފިޔާ ޚަރަދުކޮށްފައިވާއިރު، މުވައްޒަފުން ތަމްރީނުކުރުމަށް 22,995.00 ރުފިޔާ ވަނީ ހޭދަކޮށްފައެވެ.

ޒަކާތު ހައުސްއިން ފާހަގަކޮށްފައިވާ ގޮތުގައި، ޑިސެންބަރު މަހުގެ ޚަރަދުތަކުގެ ތެރޭގައި ކުރީގެ މަސްތަކުގައި އެހީ ހަމަޖެހިފައިވާ ފަރާތްތަކަށް ކުރެވުނު ޚަރަދުތައްވެސް ހިމެނެއެވެ.