ޖަރުމަނުވިލާތުގެ ރައީސް ފްރޭންކް-ވޯލްޓަރ ސްޓައިންމަޔަރގެ ދަޢުވަތަކަށް، 2026 ފެބުރުވަރީ 9 އިން 13 އަށް އެ ޤައުމަށް ކުރައްވާ ރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ފުރާވަޑައިގެންފިއެވެ.

ރާއްޖެއާއި ޖަރުމަނުވިލާތާއި މެދު ސިޔާސީ ގުޅުން ރަސްމީކޮށް ޤާއިމުކުރެވުނީ 5 ޖުލައި 1966 ގައެވެ. އެހެންކަމުން، މި ދަތުރުފުޅަކީ ދިވެހިރާއްޖެއާއި ޖަރުމަނުވިލާތާ ދެމެދު އޮތް ބައިނަލްއަޤްވާމީ ގުޅުމަށް 60 އަހަރު ފުރުން ފާހަގަކުރާ މުހިންމު ދަނޑިވަޅެއްގައި ކުރައްވާ ދަތުރުފުޅެކެވެ.

މި ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޖަރުމަނުގެ ރައީސް ސްޓައިންމަޔަރއާއި އެ ޤައުމުގެ ސަރުކާރުގެ އިސް ބޭފުޅުންނާ ބައްދަލުކުރައްވައި، ދެ ޤައުމުގެ މަސްލަހަތު ހިމެނޭ އެކި ދާއިރާތަކުން ގުޅުން ބަދަހިކުރުމާ ގުޅޭގޮތުން މަތީ ފަންތީގެ މަޝްވަރާތައް ބޭއްވުމަށް ވަނީ ހަމަޖެހިފައެވެ. މީގެ އިތުރުން، ދެ ޤައުމުގެ މެދުގައި ވިޔަފާރިއާއި އިންވެސްޓްމަންޓްގެ ފުރުޞަތުތައް ފަހިކުރުމަށާއި އިޤްތިޞާދީ ގުޅުން ހަރުދަނާކުރުމަށް އަމާޒުކޮށްގެން ބާއްވާ ބިޒްނަސް ފޯރަމެއްގައިވެސް ރައީސް ބައިވެރިވެވަޑައިގަންނަވާނެއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ބާލިންގެ ހަމްބޯލްޓް ޔުނިވަރސިޓީއަށާއި ޖަރުމަނުގެ ކައުންސިލް އޮން ފޮރިން ރިލޭޝަންސްއަށް ޒިޔާރަތްކުރައްވައި، ތަޤްރީރު ކުރެއްވުމަށް ވެސް ވަނީ ހަމަޖެހިފައެވެ. މި ތަޤްރީރުތަކުގައި، މޫސުމަށް އަންނަ ބަދަލުތަކަށް ހޭނުމުގައި ރާއްޖެއަށް ކުރެވިފައިވާ ތަޖުރިބާތަކާއި، ޚާރިޖީ ސިޔާސަތުގައި ކަނޑުފަޅުތަކުގެ މުހިންމުކަމާ ގުޅޭގޮތުން ރާއްޖެއިން ދެކޭގޮތުގެ މައްޗަށް އެމަނިކުފާނު އަލިއަޅުއްވާލައްވާނެއެވެ.

މި ދަތުރުފުޅުގެ ސަބަބުން ތަޢުލީމީ ދާއިރާއާއި، މޫސުމީ ބަދަލުތަކާ ދެކޮޅަށް ކުރާ މަސައްކަތްތަކުގެ އިތުރުން، ބައިނަލްއަޤްވާމީ ސިޔާސީ މަޝްވަރާތަކުގައި ދެ ޤައުމުގެ އެއްބާރުލުން އިތުރަށް ފުޅާވެ، ޒަމާންވީ ގުޅުން އައު ހަރުފަތަކަށް ގެންދިއުމަށް މަގުފަހިވެގެންދާނެއެވެ.