މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ރާއްޖޭގެ ވައިގެ ދަތުރުފަތުރުގެ ސިނާއަތަށް ހާއްސަކޮށްގެން "ވެލާނާ އެވޯޑްސް"ގެ ނަމުގައި އަގުވަޒަންކުރުމުގެ ޝަރަފުވެރި އެވޯޑެއް ފުރަތަމަ ފަހަރަށް ތައާރަފުކޮށްފިއެވެ.
އެމްއޭސީއެލް އިން ބުނިގޮތުން، މި އެވޯޑަކީ ވެލާނާ އިންޓަރނޭޝަނަލް އެއަރޕޯޓް (ވީއައިއޭ) މެދުވެރިކޮށް ދަތުރުފަތުރުގެ ގުޅުންތައް ވަރުގަދަކުރުމަށާއި، ހިދުމަތުގެ ފެންވަރު މަތިކުރުމަށް މަސައްކަތްކުރާ ފަރާތްތަކުގެ އަގުވަޒަންކުރުމަށް ތައާރަފުކުރި އެވޯޑެކެވެ.
މީގެ އިތުރުން ދަތުރުވެރިންނާއި ވިޔަފާރިވެރިންގެ މެދުގައި ރާއްޖެއަކީ މަގުބޫލު މަންޒިލެއްގެ ގޮތުގައި ދެމެހެއްޓުމަށް އެމްއޭސީއެލްގެ ޕާޓްނަރުން ކުރަމުންދާ އަގުހުރި މަސައްކަތްތައް ފާހަގަކުރުމަކީވެސް މި އެވޯޑުގެ މައިގަނޑު އެއް މަގުސަދު ކަމަށާ، ކޮންމެ އަހަރަކުވެސް މި އެވޯޑް ދެމުން ގެންދިއުމަށް ނިންމާފައިވާ އެ ކުންފުނިން ބުނެފިއެވެ.
މިއަހަރުގެ "ވެލާނާ އެވޯޑްސް" ގައި ތިން ދާއިރާއަކުން ޖުމްލަ 22 އެވޯޑެއް ދިނުމަށް ވަނީ ހަމަޖެހިފައެވެ. އެވޯޑް ދިނުމަށް ހަމަޖެހިފައިވާ މައިގަނޑު ކެޓަގަރީތަކަކީ:
ޕަސެންޖާ އެވޯޑްސް
ކާގޯ އެވޯޑްސް
ލައުންޖް އެވޯޑްސް
މި ތިން ދާއިރާގެ އިތުރުން، އަހަރުގެ އެންމެ ފާހަގަކޮށްލެވޭ އެއާލައިން ހޮވައި، އެ ފަރާތަކަށް ހާއްސަ އެވޯޑެއް ދިނުމަށްވެސް ވަނީ ނިންމާފައެވެ.
އެމްއޭސީއެލް އިން މައުލޫމާތު ދޭ ގޮތުގައި، މި އަހަރުގެ އެވޯޑް ހަފުލާ ބޭއްވުމަށް ހަމަޖެހިފައިވަނީ މި މަހުގެ 12 ވާ ބުރާސްފަތި ދުވަހުގެ ރޭ ކްރޮސްރޯޑްސް މޯލްޑިވްސްގައެވެ. މި ރަސްމިއްޔާތުގައި އޭވިއޭޝަން ދާއިރާގެ އިސް ބޭފުޅުންނާއި އެމްއޭސީއެލްގެ ޕާޓްނަރުން ބައިވެރިވެވަޑައިގަންނަވާނެއެވެ.
Advertisement
This content is created and paid for by advertisers and does not involve Voice Journalists
