ކުޅިވަރަކީ ހަމައެކަނި ހަށިހެޔޮކަމާއި މުނިފޫހިފިލުވުމެއް ނޫނެވެ. އެއީ އިންސާނާގެ ނަފްސާނީ ދުޅަހެޔޮކަމާއި، އަމިއްލަ ނަފްސަށް އޮންނަ އިތުބާރު ވަރުގަދަކޮށްދޭ މުހިންމު ވަސީލަތެކެވެ. އެއީ ވަކި ބަޔަކަށް ޚާއްސަ އެއްޗެއް ނޫނެވެ. އެކަމުގެ ހުނަރާއި ޝައުގުވެރިކަން ހުރި ކޮންމެ މީހަކަށްވެސް  އެކަން ކުރެވޭނެއެވެ.  އެއީ ކުޅެދޭ މީހެއް ނަމަވެސް، ނުކުޅެދޭ މީހެއް ނަމަވެސްމެއެވެ. 

އެކަން މި ދިވެހިރާއްޖެއިންވެސް މިހާރު އަންނަނީ ފެންނަމުންނެވެ. އެގޮތުން މުޖުތަމައުގައި ތިބި ނުކުޅެދުންތެރިކަން ހުންނަ ފަރާތްތަކަކީވެސް ކުޅިވަރުގެ މައިދާނުގައި ފާހަގަކޮށްލެވޭ ފަދަ ކާމިޔާބީތަކެއް ހޯދިދާނެ ބައެއްކަން  އެފަރާތްތަކުން ސާބިތުކޮށްދެމުންދާއިރު، އެ ފަރާތްތަކުގެ ހިތްވަރާއި، ސާބިތުކަމާއި އަދި ކާމިޔާބީގެ ފަހަތުގައިވާ އެއް ފަރާތަކީ، "ޕެރަ ސްޕޯޓްސް ކްލަބް"އެވެ. އެ ކްލަބުގެ ނަމޫނާ އަދި ބުރަ މަސައްކަތެވެ. 

ޕެރަ ސްޕޯޓްސް އަކީ ޖިސްމާނީ ނުކުޅެދުންތެރިކަން ހުންނަ ފަރާތްތަކާއި، ލޮލުގެ ފެނުމުން މަހްރޫމްވެފައިވާ ނުވަތަ ފެނުމުގެ ތަފާތު ހުންނަ ފަރާތްތަކަށް ޚާއްޞަކޮށްގެން ފަރުމާކުރެވިފައިވާ ކުޅިވަރުތަކެވެ. މި ކުޅިވަރުތަކުގެ ސަބަބުން މިފަދަ ފަރާތްތަކަށް މުޖުތަމައުގެ ހަރަކާތްތަކުގައި ބައިވެރިވުމުގެ ފުރުސަތު ފަހިވެގެންދެއެވެ.

ޕެރަ ސްޕޯޓްސް ކްލަބަކީ ނުކުޅެދުންތެރިކަން ހުންނަ ފަރާތްތަކަށް ކުޅިވަރުގެ ތަމްރީނުތަކާއި ކަސްރަތު ޕްރޮގްރާމްތައް މުޅިން ހިލޭ ފޯރުކޮށްދޭ ކްލަބެކެވެ. މި ކްލަބުން އެންމެ ޚާއްޞަ އިސްކަމެއް ދެނީ އެތުލެޓިކްސްގެ ދާއިރާއިން ނުކުޅެދުންތެރިކަން ހުންނަ ފަރާތްތައް ތަމްރީނު ކުރުމަށެވެ.

މި ކްލަބްގެ މަސައްކަތްތައް އެންމެ ފުރަތަމަ ފެށިފައިވަނީ 2008 ވަނަ އަހަރުގައެވެ. ނަމަވެސް، ރަސްމީކޮށް ސްޕޯޓްސް ކޮމިޝަންގައި ރެޖިސްޓްރީ ކުރެވިފައިވަނީ 2019 ވަނަ އަހަރުގައެވެ.

މިފަދަ ކްލަބެއް އުފެއްދުމުގެ އަސްލު ހިތްވަރަކީ 2005 ވަނަ އަހަރު ސައުދީ އަރަބިއްޔާގައި ބޭއްވުނު ފުރަތަމަ "އިސްލާމިކް ސޮލިޑަރިޓީ ގޭމްސް" ކަމަށް ކްލަބްގެ ފައުންޑަރުން ބުނެއެވެ. އެގޮތުން، އެ މުބާރާތުގެ ހުޅުވުމުގެ ރަސްމިއްޔާތުގެ ތެރެއިން ބައްދަލުވި ލޯފަން އެތުލީޓުންގެ ފަރާތުން ލިބުނު ހިތްވަރާއި ފެނުނު ކުޅަދާނަކަމަކީ މި މަސައްކަތް ފެށުމަށް ލިބުނު އެންމެ ބޮޑު ހިތްވަރު ކަން ކްލަބުން ފާހަގަކުރެއެވެ.

ކްލަބްގެ މައިގަނޑު އެއް އަމާޒަކީ ނުކުޅެދުންތެރިކަން ހުންނަ ފަރާތްތަކަށް ފިޒިކަލް ތަމްރީނުދީ، އެމީހުންގެ އަމިއްލަ ނަފްސަށް އޮންނަ އިތުބާރު ބޮޑުކުރުމެވެ. މި މަސައްކަތުގެ ނަތީޖާ މިހާރުވެސް ފެންނަމުންދެއެވެ. 

އެގޮތުން:

2013 އަދި 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (IOIG) ގައި ވަނީ ރާއްޖެއަށް މެޑަލް ހޯދައިދީފައި.

2020 ވަނަ އަހަރުގެ ޕެރަލިމްޕިކް ގޭމްސްގައި ރާއްޖެ ތަމްސީލުކޮށްފައިވޭ.

2019 ވަނަ އަހަރުން ފެށިގެން މި ކްލަބްގެ އެތުލީޓުން އަންނަނީ ބައިނަލްއަގުވާމީ އެކި މުބާރާތްތަކުގައި ރާއްޖެ ތަމްސީލުކުރަމުން.

ޕެރަ ސްޕޯޓްސް ކުލަބުގެ މި އަހަރުގެ އެންމެ ބޮޑު އެއް އަމާޒަކީ އޭޝިއަން ގޭމްސްއަށް ޓީމު ތަމްރީނު ކުރުމެވެ. މީގެ އިތުރުން، އާންމުން ހޭލުންތެރިކުރުވުމުގެ ގޮތުން ހުޅުމާލޭގައި "ބްލައިންޑްފޯލްޑް ރަން" (Blindfold Run) އެއް ބޭއްވުމަށްވެސް ވަނީ ރޭވިފައެވެ.

މިފަދަ ކަންކަމުގެ ތެރެއިން ނުކުޅެދުންތެރިކަން ހުންނަ ފަރާތްތަކާމެދު އާއްމުން ދެކޭގޮތް ބަދަލުވެ، އެމީހުންނަކީވެސް މުޖުތަމައި ބަލައިގަންނަ މުޖުތަމައުއަށް ފައިދާ ކުރާ ބަޔަކަށް ހެދުމަކީ ކުލަބުގެ އުއްމީދެވެ. 

ނުކުޅެދުންތެރިކަން ހުންނަ ފަރާތްތަކަށް ޚާއްސަކޮށްގެން މިފަދަ މަސައްކަތްތަކެއް ކުރެވެމުންދާއިރު، ދިމާވާ އެންމެ ބޮޑު އެއް ގޮންޖެހުމަކީ ޖިސްމާނީ ނުކުޅެދުންތެރިކަން ހުންނަ ފަރާތްތަކާމެދު އާއްމުން ދެކޭ ގޮތެވެ. އެގޮތުން އެފަދަ ފަރާތްތަކަށް ކުޅިވަރު ކުޅެވިދާނެކަން މުޖުތަމައުގެ ބައެއް ފަރާތްތަކަށް އަދިވެސް ގަބޫލުކުރަން ދައްޗެވެ.

މީގެ އިތުރުން، މިފަދަ ކުޅިވަރުތަކަށް ބޭނުންވާ ޚާއްޞަ އިކުއިޕްމަންޓް ހޯދުމާއި، އެ ތަކެތި ރައްކާތެރިކަމާއެކު ބެހެއްޓޭނެ އިންތިޒާމެއް ނެތުމަކީވެސް ބޮޑު ގޮންޖެހުމެއްކަން އެ ކްލަބުން ފާހަގަކުރެއެވެ.

މިފަދަ ގޮންޖެހުން ތަކާއެކުވެސް ފަހަތަށް ޖެހުމެއްނެތި ކުރިއަށް ދެވެނީ ގިނަ ބައެއްގެ އެހީއާއި މަދަދު މި ކްލަބަށް ލިބޭތީކަން އެ ކްލަބުން ފާހަގަ ކުރެއެވެ. އެގޮތުން، ނުކުޅެދުންތެރިކަން ހުންނަ މީހުންނަށްވެސް ކުޅިވަރު ކުޅެވޭނެކަން ގަބޫލުކޮށް، މި ދަތުރުގައި ބައިވެރިވެ އެހީތެރިކަން ފޯރުކޮށްދޭ ހުރިހާ ފަރާތްތަކަށް ކްލަބްގެ ފަރާތުން ޝުކުރު އަދާކުރެއެވެ.

ކްލަބްގެ ފަރާތުން ނުކުޅެދުންތެރިކަން ހުންނަ ފަރާތްތަކާއި އެފަދަ ފަރާތްތަކުގެ ބެލެނިވެރިންނަށް ދޭން އޮތް އެންމެ މުހިންމު އެއް މެސެޖަކީ، ނުކުޅެދުންތެރިކަން ހުންނަ ފަރާތްތައް ގޭގައި ނުބައިތިއްބާ ކްލަބާ ހަމައަށް ގެނެސްދިނުމެވެ. 

”މިއީ އާދަޔާ ޚިލާފު ހުނަރުވެރި ކުދިންތަކެކެވެ. އެކުދިންގެ ހުނަރު ތަރައްގީކުރުމުގެ ފުރުސަތު ދެއްވާ." ޕެރަ ސްޕޯޓްސް ކްލަބުން ބުނެފައިވެއެވެ. 

އެ ކުލަބުގެ އަމާޒަކީ އެއްވެސް ކުއްޖަކު ބާކީނުކޮށް، ކުޅިވަރުގެ ތެރެއިން އެންމެނަށް ހަމަހަމަ ފުރުސަތުތަކެއް ހޯދައިދިނުމެވެ. އެންމެން ގުޅިގެން މަސައްކަތް ކޮށްފިނަމަ، މިއީ ގައުމަށް ރީތި ނަން ހޯދައިދޭނެ ފަހުރުވެރި ދަރިންތަކަކަށް ވާނެކަން ޔަގީނެވެ.