އިމިގްރޭޝަންގެ ތެރޭގައި ހިންގި ހިޔާނާތާއި މަގާމުގެ ނުފޫޒު ބޭނުންކުރި މައްސަލާގައި ދައުވާ އުފުލި އިމިގްރޭޝަންގެ އޮފިސަރު އިބްރާހީމް އަހުމަދުގެ މައްޗަށް 11 މަހުގެ ޖަލު ހުކުމެއް އިއްވައިފި އެވެ.

އިމިގްރޭޝަންގެ ކުރީގެ ކޮންޓްރޯލާ ޝަމްއާން ވަހީދާއި އިތުރު ބައެއްގެ މައްޗަށް ދައުވާ އުފުލީ މަގާމުގެ ނުފޫޒު ނަހަމަ ގޮތުގައި ބޭނުންކޮށްގެން ބިދޭސީންގެ އަތުން ނާޖާއިޒު މަންފާ ނެގި މައްސަލާގަ އެވެ. 

އިބްރާހިމްގެ މައްޗަށް ތިން ދައުވާއެއް އުފުލި އެވެ. އެއީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ އާއި ފޭރުމުގެ ދައުވާގެ އިތުރުން އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމުގެ ދައުވާ އެވެ. މި ދައުވާތަކާއި ގުޅިގެން އޭނާ ވަނީ ޕީޖީ އޮފީހާއެކު އިއުތިރާފްގެ އެއްބަސްވުމެއް ހަދާފަ އެވެ.

ތިން ދައުވާއަށްވެސް އޭނާ ވަނީ އިއުތިރާފުވެފަ އެވެ. އެހެން ކަމުން އިއްވީ 11 މަހުގެ ޖަލު ހުކުމެކެވެ.

* ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ - ދެ މަހަށް ޖަލަށް, 62,400ރ ޖޫރިމަނާ

* ފޭރުމުގެ ދައުވާ - ހަތް މަހަށް ޖަލަށް, 130،800ރ. އިން ޖޫރިމަނާ

* އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމުގެ ދައުވާ - ދެ މަހަށް ޖަލަށް, 62,400ރ ޖޫރިމަނާ

މީގެ އިތުރުން ބިދޭސީ މީހާއަށް ލިބުނު ގެއްލުމަށް 50,000ރ ދިނުމަށާއި އިތުރު 3,500 ޑޮލަރު ދިނުމަށް ވަނީ އަމުރުކޮށްފަ އެވެ.