ކުދި ޤައުމުތަކުގެ ސަލާމަތާއި ހާރިޖީ ސިޔާސަތްތަކާ ގުޅޭގޮތުން މޯލްޑިވްސް ނެޝަނަލް ޔުނިވަރސިޓީ އާއި ފޮރިން ސަރވިސް އިންސްޓިޓިއުޓް އޮފް މޯލްޑިވްސް (ފޯސިމް) ގުޅިގެން ބާއްވާ ހާއްސަ ސެމިނަރ މިއަދު ކުރިއަށް ގެންގޮސްފި އެވެ.

ޤައުމީ ޔުނިވަރސިތީގެ އޮޑިޓޯރިއަމްގައި ކުރިއަށްދިޔަ މި ސެމިނަރ އަކީ ޤައުމީ އަދި ސަރަހައްދީ ސަލާމަތާ ގުޅޭގޮތުން  ފުޅާދާއިރާއެއްގައި އިލްމީގޮތުން މަޝްވަރާކޮށް ހޭލުންތެރިކަން އިތުރުކުރުމަށް އެމްއެންޔޫއިން ކުރިއަށްގެންދިޔަ ހަރަކާތެކެވެ. މި ސެމިނާގައި ސިޔާސަތުތައް ކަނޑައަޅާ ބޭފުޅުންނާއި، އިލްމީ މާހިރުންގެ އިތުރުން ދަރިވަރުން ބައިވެރިވިއެވެ.

ސެމިނާގައި ދުނިޔޭގެ މަޝްރަހަށް ކުރިމަތިވާ އެލިއެކި ލޮޅުންތަކުގެ ސަބަބުން ރާްޖެ ފަދަ ކުދި ޤައުމުތަކުން މައުނަވީ ހިކުމަތްތެރިގޮތެއްގައި އަމަލުކުރާނޭ ގޮތްތަކާ ބެހޭގޮތުން ވަނީ ހިޔާލުބަދަލުކޮށް މަޝްވަރާތައްކޮށްފައެވެ. މީގެ ތެރޭގައި ސިޔާސީގޮތުން ކުރިމަތިވާ ކަންކަމާއި، މުސުމީ ބަދަލުތަކުގެ އިތުރުން، ކަނޑުމަތީގެ ނުރައްކާތެރިކަމާ ގުޅިގެން ޤައުމީ މަސްލަހަތު ހިމާޔަތްކުރުމަށް ހުރި ގޮންޖެހުންތަކާ ބެހޭގޮތުން ވާހަކަތައް ދެކެވުނެވެ.

މިއަދުގެ ޕްރޮގްރާމް ފައްޓަވައިދެއްވީ އެމް.އެން.ޔޫގެ ވައިސް ޗާންސެލަރ ޑރ. އާއިޝަތު ޝެހެނާޒް އާދަމެވެ. ސެހެނާޒްގެ ވާަކަފުޅުގައި ވަނީ ރާއްޖެއަށް މުހިންމު ސަލާމަތީ އަދި ޚާރިޖީ ދާއިރާތަކުން ސިޔާސަތުތައް ބައްޓަންކުރުމަށް ބޭނުންވާ އިލްމީ ދިރާސާތައް ކުރުމާއި، އެކަންކަމާ ގުޅޭގޮތުން މަޝްވަރާތައްކުރުމުގައި ޤައުމީ ޔުނިވަރސިޓީގެ ދައުރު ފާހަގަކުރައްވާފައެވެ.

ސެމިނާގައި ތަގުރީރު ކުރެއްވީ ބޭފުޅުންގެ ތެރޭގައި ސްްރީލަންކާގެ ބަންޑާރަނައިކަ ސެންޓަރ ފޯ އިންޓަރނޭޝަނަލް ސްޓަޑީޒްގެ ޑައިރެކްޓަރ އޮފް އެޑިއުކޭޝަން ޑރ. ބާގްޔާ ސެނަރަ ފާހަގަކޮށްލެވެއެވެ. އެކަމަނާގެ ވާހަކަފުޅުގައި ވަނީ ކުދި ޤައުމުތަކަށް ބަސްބުނެ ނިންމުންތައް ނިންމުމުގެ ބާރު އޮތުމުގެ މުހިންމުކަން ފާހަގަކުރައްވައި، އިންޑިއާ ކަނޑުގެ ޤައުމުތަކުގެ ސަރަހައްދީ އެއްބާރުލުން މިހާރަށްވުރެ ބޮޑުވުމުގެ މުހިންމުކަމާ ގުޅޭގޮތުން ވާހަކަދައްކަވާފައެވެ.

މިއަދުގެ މި ސެމިނާގައި ވަނީ ބައިނަލްއަޤްވާމީ ކަންކަމުގައި ކުދި ޤައުމުތަކުން އަދާކުރަމުންދާ ދައުރު އިތުރުވަމުން އަންނަކަން ފާހަގަކޮށް ހަރުދަނާ ސަލާމަތީ އަދި ޚާރިޖީ ސިޔާސަތުތަކެއް ބައްޓަންކުރުމަށްޓަކައި، އިލްމީ މުއައްސަސާތަކާއި ސިޔާސަތު ކަނޑައަޅާ އިދާރާތަކާ ދެމެދު އޮންނަ ގުޅުން ވަރުގަދަކަމުގެ މުހިންމުކަން ފާހަގަކޮށްފައެވެ.