މާލޭގެ ބޮޑުތަކުރުފާނު މަގު ތަރައްޤީކުރުމުގެ ދެވަނަ ފިޔަވަހީގެ ދަށުން، ބާޒާރުމަތި ހިމެނޭ ސަރަޙައްދުގައި ތާރު އެޅުމުގެ މަސައްކަތުގެ ބޮޑު ބައެއް ނިންމާލައިފިއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނާ ގޮތުގައި އަންނަ ހަފްތާގެ ތެރޭގައި އެ ސަރަޙައްދު އާންމު ދަތުރުފަތުރަށް ހުޅުވާލާނެއެވެ. 

މި މަގު ހެދުމުގެ އަމަލީ މަސައްކަތް ފެށީ މިދިޔަ ޑިސެމްބަރު މަހުގެ މެދުތެރޭގައެވެ. މި މަޝްރޫއުގެ ދަށުން ލޯކަލް މާރުކޭޓުން ފެށިގެން ނޯތު ހާބަރު ފެށޭ ހިސާބަށް ތާރު އަޅާނެއެވެ. އެގޮތުން 260 މީޓަރުގެ ސަރަޙައްދުގައި މިހާރު ވަނީ ތާރު އަޅާ ނިންމާފައެވެ. އެމްޓީސީސީން މަޢުލޫމާތު ދިން ގޮތުގައި ތާރު އަޅާ ނިމުމާއެކު ދެން ކުރިއަށްދާނީ މަގުގައި ޓްރެފިކް ނިޝާންތައް ކުރެހުމާއި، ބޯޑުތައް ހަރުކުރުމުގެ އިތުރުން ޔުޓިލިޓީ ނެޓްވޯކްގެ ބައެއް މަސައްކަތްތަކެވެ.

ބޮޑުތަކުރުފާނުމަގު ފުޅާކުރުމުގެ މަސައްކަތުގެ ތެރެއިން-- ފޮޓޯ/ ވޮއިސް

މި މަގު ތަރައްގީ ކުރުމަށް ހަމަޖެހިފައިވަނީ ޒަމާނީ ފެންވަރަށެވެ. އެގޮތުން، އެ މަގު 4 ލޭނަށް ފުޅާކުރުމަށް، އެ ސަރަޙައްދުގެ ބަނދަރުގެ އެއްގަމު ތޮށި ވަނީ ގާތްގަނޑަކަށް 6 މީޓަރަށް ބޭރަށް ޖައްސާފައެވެ. މިއާއެކު ކުރިން އޮތް މަގުގެ ފުޅާމިން 14 މީޓަރަށް އިތުރުވެފައެވެ. 

މި ސަރަހައްދަކީ ރޯފަ މަހާއި ދިމާކޮށް ވަކިން ހާއްސަކޮށޤ ބާރުބޮޑުވާ ސަރަހައްދެކެވެ. ސަބަބަކީ، މިއީ ލޯކަލް މާރުކޭޓާއި، މަސް މާރުކޭޓު، ދަތުރުވެރިންގެ މާރުކޭޓު އަދި އަތޮޅުތަކަށް މުދާ އުފުލާ ބޯޓުފަހަރާއި މަސްދޯނިފަހަރު ގާތްކުރާ، ސަރަހައްދަށް ވުމުންނެވެ. އެހްނކަމުން، މި މަގުގެ މަސައްކަތް އެއްކޮށް ނިމުމުން، މި ކަމަށް ބޮޑު ލުއި ފަސޭހަކަމެއް ލިބިގެންދާނެއެވެ.