ސަރުކާރުން ތައާރަފް ކުރި "ބޯހިޔާވަހިކަން އެންމެންނަށް" ސިޔާސަތުގެ ދަށުން ގޯއްޗާއި ފްލެޓަށް އެދި މިހާތަނަށް 3,600 އަށްވުރެ ގިނަ މީހުން ފޯމު ހުށަހަޅާފައިވާކަމަށް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުالله މުއްޠަލިބް ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަފުޅު ދައްކަވަމުން ވަޒީރު ވިދާޅުވީ، އާއިލީ ބޯހިޔާވަހިކަމުގެ ސްކީމުގެ ދަށުން މިހާތަނަށް 3,651 އެޕްލިކޭޝަނެއް ފުރިހަމަކޮށް ހުށަހަޅާފައިވާ ކަމަށެވެ. އަދި މީގެ އިތުރުން 10,000 އެއްހާ އެޕްލިކޭޝަން ފޯމު ފުރުމުގެ މަރުހަލާގެ މަސައްކަތް ކުރަމުންދާކަމަށެވެ. އަދި ހުށަހަޅާފައިވާ ފޯމުތަކަށް ބަލާއިރު، ގޯއްޗަށްވުރެ ބޮޑަށް ފްލެޓަށް އޮތް ޑިމާންޑު ބޮޑުކަން ވެސް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ މި ސަރުކާރުން އެންމެ އިސްކަމެއް ދީގެން ކުރާ އެއް މަސައްކަތަކީ ރައްޔިތުންނަށް ބޯހިޔާވަހިކަން ކަށަވަރުކޮށްދިނުން ކަމަށެވެ. އެގޮތުން ކުރީގެ "ބިންވެރިޔާ" ސްކީމުގެ ދަށުން ނުހިއްކާ ހުރި ބިންތަކުން ދޫކޮށްފައިވާ ތަންތަން ވެސް މިހާރު ވުޖޫދަށް ގެނެސް، 3،800 އަށް ވުރެ ގިނަ ފަރާތްތަކަށް އެގްރީމެންޓު ކުރެވި، 3،600 އަށް ވުރެ ގިނަ ފަރާތްތަކަށް ތަޅުދަނޑި ހަވާލުކުރެވިފައިވާކަމަށް ވެސް ވަޒީރު ފާހަގަ ކުރެއްވިއެވެ. 

މީގެ އިތުރުން ވަޒީރު ވިދާޅުވީ 'ބޯހިޔާވަހިކަން އެންމެންނަށް' ނަމުގައި މި ސަރުކާރުން މި ފެށި ސިޔާސަތަކީ ވަރަށް ހަރުދަނާ ސިޔާސަތެއްކަމަށެވެ. އެގޮތުން، މި ސްކީމުގެ ދަށުން ފްލެޓާއި ގޯތި ލިބޭ ޝަރުތުތަށްވެސް ހަރުދަނާކުރެވި، ވީހާވެސް ގިނަ ބަޔަކަށް ބޯހިޔާވަހިކަން ލިބޭނެ މަގުފަހި ކުރުމަށޤ މުހިންމު ފިޔަވަޅުތަކެއް އެޅިފައިވާކަމަށްވެސް ވަޒީރު ވިދާޅުވިއެވެ. 

ސަރުކާރުގެ މި މަޝްރޫއުގެ ދަށުން މާލެ ސަރަހައްދުން 7,900 ފްލެޓާއި، މާލެ ސަރަހައްދާއި ރަސްމާލެ ހިމެނޭހެން 15,000 ގޯތި ދޫކުރުމަށް ވަނީ ނިންމާފައެވެ. މި ފްލެޓްތަކުގެ ތެރެއިން 4,000 ފްލެޓަކީ މާލޭގެ ރަށްވެހިންނަށް ޚާއްޞަ، އަދި 1،500 ފްލެޓަކީ މާލޭގައި ދިރިއުޅޭ އެހެން ރަށްރަށުގެ މީހުންނަށް ހާއްސަކޮށްފައިވާ ފްލެޓްތަކެކެވެ. މީގެ އިތުރުން، 2,400 ފްލެޓް ކަނޑައަޅާފައި ވަނީ ޚާއްޞަ އިސްކަންދޭ ކެޓަގަރީތަކަކަށެވެ. 

ގޯތި ދޫކުރުމުގައިވެސް މާލޭގެ ރަށްވެހިންނަށް 10,000 ގޯތި، މާލޭގައި ދިރިއުޅޭ އެހެން ރަށްރަށުގެ މީހުންނަށް 3,000 ގޯތި، އަދި މައިމުޅަވެފައިވާ މީހުންނަށް 500 ގޯތި ވަނީ ޚާއްޞަކޮށްފައެވެ. މީގެ އިތުރުން މާލޭގެ ހަނި ގޯޅިތަކުގައި ހުރި ގޯތިތަކާއި ލާޖައްސައިގެން ގޯތި ބަދަލުކުރާ ފަރާތްތަކަށްވެސް 1,500 ގޯތި ވަނީ ކަނޑައަޅާފައެވެ. 

ސަރުކާރުގެ "ބޯހިޔާވަހިކަން އެންމެނަށް" ސިޔާސަތުގެ ދަށުން ބޯހިޔާވަހިކަމުގެ ފުރަތަމަ ސްކީމް، މިދިޔަ ނޮވެންބަރު މަހުގެ 16 ވަނަ ދުވަހު، ގޯތި އަދި ފްލެޓް ދޫކުރުމުގެ އުސޫލާއި އެކު ވަނީ އާއްމުކޮށްފައެވެ. އެއަށްފަހު، ފްލެޓާއި ގޯއްޗަށް އެދި ހުށަހެޅުމުގެ ފުރުޞަތު ހުޅުވާލީ ޖަނަވަރީ މަހުގެ 18 ވަނަ ދުވަހުއެވެ. މި ސްކީމްގެ ދަށުން ގޯއްޗަށް އެދި ހުށަހެޅޭނީ އަންނަ މާރިޗު މަހުގެ 4 އަދި ފްލެޓަށް އެދި ހުށަހެޅޭނީ އެޕްރީލް މަހުގެ 17 ވަނަ ދުވަހުގެ ނިޔަލަށެވެ.