ސައިންސްގެ ދާއިރާގައި އަންހެނުންނާއި އަންހެން ކުދިންގެ ހިއްސާ އިތުރުކުރުމަކީ ދުނިޔެއަށް ބޭނުންތެރި ސައިންންޓިފިކް މަސައްކަތްތަކެއް ކުރުމަށް އެޅޭ އެންމެ މުހިންމު ބިންގާ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ބައިނަލްއަޤުވާމީ ފެންވަރުގައި މިއަދު ފާހަގަކުރަމުންދާ އިންޓަރނޭޝަނަލް ޑޭ އޮފް ވިމެން އެންޑް ގަރލްސް އިން ސައިންސް ނުވަތަ ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދީންގެ ދުވަހުގެ މުނާސަބަތުގައި ފޮނުއްވި މެސެޖުގައި ވިދާޅުވީ، ރާއްޖޭގެ ތަރައްޤީގެ ދަތުރު ބިނާވެފައިވަނީ ފަންނީ ދާއިރާތަކުން އަންހެނުން ބާރުވެރިކުރުވުމުގެ މައްޗަށްކަމުގައެވެ.
ރައީސުލްޖުމްހޫރިއްޔާގެ މެސެޖުގައި، މޫސުމީ ބަދަލުތަކުން ރައްކާތެރިވުމާއި، ސިއްހީ ދާއިރާ، ހަކަތަ، ސައިބަރ ސެކިއުރިޓީ އަދި އާޓިފިޝަލް އިންޓެލިޖެންސް ފަދަ ދުނިޔެއަށް ކުރިމަތިވެފައިވާ ބޮޑެތި ގޮންޖެހުންތަކަށް ހައްލު ހޯދުމުގައި އަންހެނުންގެ ދައުރު މުހިންމުކަން ފާހަގަކުރެއްވިއެވެ. އަދި ހުރިހާ އެންމެންނަށް ފައިދާހުރި ސައިންސެއް ބިނާކުރުމަށްޓަކައި އަންހެނުންގެ ހަމަހަމަ ބައިވެރިވުން ކޮންމެހެން ބޭނުންތެރިކަމަށް އެމަނިކުފާނު ވިދާޅުވިއެވެ.
ހަމަމިއާއެކު މަތީ ތަޢުލީމާއި، ސްކޮލަރޝިޕް އަދި ފަންނީ ތަމްރީނުތަކަށް އަދުގެ ސަރުކާރުން ދެއްވާ އިސްކަމުގެ ނަތީޖާއެއްގެ ގޮތުން، ސައިންސް، ޓެކްނޯލޮޖި، އިންޖިނިއަރިންގ އަދި މެތަމެޓިކްސް (ސްޓެމް)، އައި.ސީ.ޓީ އަދި މެރިން ސައިންސް ފަދަ ދާއިރާތަކަށް ދިވެހި އަންހެނުން ޝައުޤުވެރިވެ، މިދާއިރާއަށް ވަންނަ މިންވަރު އިތުރުވަމުންދާތީ އެކަން ފާހަގަކުރައްވައި، އެކަމަށްވެސް އެމަނިކުފާނުގެ މެސެޖުގައި ތައުރީފު ކުރައްވާފައިވެއެވެ.
މީގެ އިތުރުން، ރައީސުލްޖުމްހޫރިއްޔާގެ މެސެޖުގައި ސައިންސްގެ ދާއިރާގައި ހުރި ހުރަސްތައް ނައްތާލައި، ކޮންމެ އަންހެން ކުއްޖަކަށްވެސް އެކުއްޖެއްގެ ހުނަރާއި ޝައުގުވެރިކަން ހުރި ދާއިރާއަކުން ކުރިއަށް ދިއުމަށް ބޭނުންވާ ތައުލީމާއި އެހީތެރިކަން ފޯރުކޮށްދިނުމަށް ސަރުކާރުން މަސައްކަތް ކުރާނެ ކަމުގެ ޔަގީންކަން ދެއްވިއެވެ.
އެގޮތުން، ދިރާސާކުރުމުގެ ޤާބިލުކަން އިތުރުކުރުމަށާއި، ޑިޖިޓަލް ހުނަރުތައް ތަރައްޤީކުރުމަށް ސަރުކާރުން ދޭ އިސްކަމުގެ ތެރެއިން، ރާއްޖޭގެ ހުރިހާ ކަންކޮޅުތަކެއްގައި ދިރިއުޅޭ ޒުވާން އަންހެނުންނަށް އައު ފުރުޞަތުތަކެއް ފަހިވެގެންދާނެ ކަމަށް އެމަނިކުފާނު ވިދާޅުވިއެވެ. ހަމަމިއާއެކު، ޤައުމުގެ އީޖާދީ، އަދި ޓެކްނޮލޮޖީގެ ކުރިއެރުންތަކުގައި އަންހެންކުދިންނަކީ އިސް ސަފުގައި ޙަރަކާތްތެރިވާ ބަޔަކަށް ހެދުމަށް މި ސަރުކާރުން މަސައްކަތް ކުރައްވަމުން ގެންދަވާ ކަމަށް އެމަނިކުފާނު ވިދާޅުވިއެވެ.
ކޮންމެ އަހަރެއްގެ ފެބްރުއަރީ މަހުގެ 11 ވަނަ ދުވަހަކީ އދ. ގެ އާންމު މަޖިލީހުން ކަނޑައަޅާފައިވާ، ސައިންސްގެ ދާއިރާގައި އަންހެނުންނާއި އަންހެން ކުދިންގެ ބައިވެރިވުން އިތުރުކުރުމަށް ބާރުއަޅާ ބައިނަލްއަގުވާމީ ދުވަހެވެ.
Advertisement
This content is created and paid for by advertisers and does not involve Voice Journalists
