ސަޢޫދީ ޢަރަބިއްޔާގެ ހުރިހާ ސަރަޙައްދެއްގައި އަންނަ ބުރާސްފަތި ދުވަހު އިސްތިސްޤާ ނަމާދު ކުރުމަށް އެ ޤައުމުގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސަޢުދު ގޮވާލައްވައިފިއެވެ.

ސަޢޫދީ ރޯޔަލް ކޯޓުން ނެރުނު ބަޔާނެއްގައި ބުނެފައިވަނީ، ބުރާސްފަތި ދުވަހު މުޅި ސަޢުދީގައި އިސްތިސްޤާ ނަމާދު ކުރިއަށް ގެންދިއުމަށް ރަސްގެފާނު އިރުޝާދު ދެއްވާފައިވާ ކަމަށެވެ.

މި ބަޔާނުގައި ރަސްގެފާނު ވަނީ މާތް اللهُ އަށް ތައުބާވެ، ފާފަ ފުއްސެވުމަށް އެދި ދުޢާކޮށް، އިސްތިޣްފާރު ކުރުން، ގިނަކުރުމަށް ރައްޔިތުންނަށް އިލްތިމާސްކުރައްވާފައެވެ.

މީގެ އިތުރުން، ހެޔޮ އަމަލުތައް ކުރުމާއި، އިޙްސާންތެރިވުމާއި، ސުންނަތް ނަމާދުތައް ކުރުން އިތުރުކުރުމަށްވެސް ރަސްގެފާނުގެ ބަޔާނުގައި ބާރުއަޅުއްވާފައިވެއެވެ. އަދި اللهُ ގެ ރަޙްމަތުން ބަރަކާތްތެރި ވާރޭ ވެއްސަވައިދެއްވުން އެދި ދުޢާކުރުމަށްވެސް އެދިވަޑައިގެންފައިވެއެވެ.

އިސްތިސްޤާ ނަމާދަކީ ވާރޭ ނުވެހި ގިނަދުވަސްވެ، ހަނަފަސްކަން ބޮޑުވާ ޙާލަތްތަކުގައި، އެކަލާނގެ ޙަޟްރަތުން ވާރޭއަށް އެދި ދެ ރަކުޢަތުގެ ސުންނަތް ނަމާދެކެވެ. ސަޢޫދީ ޢަރަބިއްޔާގައި އާންމުކޮށް މިފަދަ ހަނަފަސް ދުވަސްވަރު އިސްތިސްޤާ ނަމާދު ކުރަމުން ގެންދެއެވެ.