ޅ. އަތޮޅުގައި ޙާފިޒުން އިމްތިޙާން ކުރާނެ ޚާއްޞަ ކޮމިޓީއެއް މިއަހަރުގެ ތެރޭގައި އެކުލަވާލުމަށް ނިންމާފައިވާކަން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އިޢުލާން ކުރައްވައިފިއެވެ.
ވަޒީރު މިކަން ހާމަކުރެއްވީ އެކްސްގައި ކުރެއްވި ޕޯސްޓެއްގައެވެ.
ވަޒީރު ވިދާޅުވީ، މާލެ ފިޔަވައި ފުވައްމުލައް ސިޓީއާއި އައްޑޫ ސިޓީގައި މިހާރުވެސް މިފަދަ ކޮމިޓީތައް އޮންނަ އިރު، ދެން އެންމެ ގިނައިން ޙާފިޒުން އުފެދެނީ ޅ. ނައިފަރުގައި ކަމަށްވާތީ، އެ ސަރަހައްދުގެ ދަރިވަރުންނަށް ލުޔެއް ހޯދައިދިނުމަކީ މި ނިންމުމުގެ މައިގަނޑު ބޭނުން ކަމަށެވެ.
މީގެ އިތުރުން، ރާއްޖޭގައި ހަދާ ޙާފިޒުކަމުގެ އިމްތިޙާނަކީ ވަރަށް އިތުބާރު ހުރި ގޮތަކަށް ކުރިއަށްގެންދާ އިމްތިޙާނެއްކަން ފާހަގަކުރައްވަމުން ވަޒީރު ވިދާޅުވީ، މި ކޮމިޓީތަކުގައި ތިއްބަވަނީ ތަޖުރިބާކާރު ޙާފިޒުން ކަމަށެވެ. އަދި އިމްތިޙާނުގައި ކޮންމެ ދުވަހަކު މަދުވެގެން އެއް ފޮތް ނުވަތަ ދެ ފޮތް ހިތުން ކިޔައިދީ، މުޅި ޤުރުއާން އެއްކޮށް ކިޔައިދީ ނިންމަންޖެހޭނެއެވެ. މިވަގުތު މާލޭގައި މި އިމްތިޙާން ކުރިއަށްގެންދަނީ ކީރިތި ޤުރުއާނާ ބެހޭ މަރުކަޒާއި އިސްލާމީ ޔުނިވަރސިޓީގައެވެ.
މިއަހަރަކީ ރާއްޖޭގެ ތާރީޚުގައިވެސް އެންމެ ގިނަ ޢަދަދަކަށް ޙާފިޒުން ދަސްވެނިވާ އަހަރުކަން ފާހަގަކުރައްވަމުން ޑރ. ޝަހީމް ވިދާޅުވީ، މިއަހަރު އަލަށް 31 ޙާފިޒުން ދަސްވެނިވާނެ ކަމަށެވެ. އަދި ޙާފިޒުން ދަސްވެނިވުމުގެ ޝަރަފްވެރި ޙަފްލާގެ އެންމެހައި ކަންކަން މިހާރު ފުރިހަމަ ކުރެވިފައިވާ ކަމަށްވެސް ވަޒީރު ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގައި ޙާފިޒުންގެ އަދަދު އިތުރުކުރުމަށް ވަރަށް ޚާއްޞަ އިސްކަމެއް ދެއްވާކަން ފާހަގަކުރައްވައި، ވަޒީރު ވަނީ މި ދާއިރާއިން ރާއްޖެއަށް ލިބެމުންދާ ކުރިއެރުމަށްޓަކައި މާތް الله އަށް ޙަމްދުކުރައްވާފައެވެ. އަދި ހާފިޒުން އުފެއްދުމަށް ސަރުކާރާއި އަމިއްލަ ފަރާތްތަކުން ކުރަމުންދާ މަސައްކަތުގައި ބަރަކާތްލެއްވުމަށް އެދި ވަޒީރު ދުޢާ ކުރެއްވިއެވެ.
Advertisement
This content is created and paid for by advertisers and does not involve Voice Journalists
