ހުޅުމާލެ ފޭސް 2 ގެ ހިޔާ ފްލެޓު ސަރަހައްދުގައި ހިންގި އޮޕަރޭޝަނެއްގައި 10 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނުން މައުލޫމާތު ދީފައިވާ ގޮތުގައި، އިއްޔެ ހިންގި މި އޮޕަރޭޝަނަކީ ހިޔާ ފްލެޓު ސަރަހައްދުގައި ހިންގަމުންދާ ވިޔަފާރިތަކަށް އަމާޒުކޮށްގެން ހިންގި އޮޕަރޭޝަނެކެވެ.
މި އޮޕަރޭޝަނުގެ މަގްސަދަކީ އެ ސަރަހައްދުގައި ހިންގާ ކެފޭ، ރެސްޓޯރެންޓު އަދި ފިހާރަތަކުގައި މަސައްކަތްކުރާ ބިދޭސީންނަކީ ސައްހަ ލިޔެކިޔުން އޮތް ބައެއްތޯ ކަށަވަރު ކުރުމެވެ.
މި އޮޕަރޭޝަނުގެ ތެރެއިން އެ ސަރަހައްދުގައި މަސައްކަތް ކުރަމުންދިޔަ ޖުމްލަ 95 ބިދޭސީއެއްގެ ލިޔެކިޔުންތައް އިމިގްރޭޝަން އޮފިސަރުން ވަނީ ބަލައިފާސްކޮށްފައެވެ.
އަދި މީގެ ތެރެއިން އިމިގްރޭޝަންގެ ބެލުމުގެ ދަށަށް ގެނެވުނު 10 ބިދޭސީންނަކީ ގަވާއިދާ ހިލާފަށް މަސައްކަތް ކުރަމުންދިޔަ ފަރާތްތަކެއް ކަމަށް އިމިގްރޭޝަނުން ހާމަކުރެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަކީ ގައުމީ ސަލާމަތާ ގުޅިފައިވާ މުހިންމު ކަމެއްގެ ގޮތުގައި ކަނޑައަޅުއްވާފައެވެ.
މައްސަލަ ހައްލުކުރުމަށް އިމިގްރޭޝަނާއި ފުލުހުން ގުޅިގެން މާލެ ސަރަހައްދުގައި ގަވާއިދާ ހިލާފަށް ވިޔަފާރިކުރާ އަދި އުޅޭ ބިދޭސީން ހޯދުމުގެ މަސައްކަތް ވަނީ ވަރަށް ބޮޑަށް ވަރުގަދަކޮށްފައެވެ.
Advertisement
This content is created and paid for by advertisers and does not involve Voice Journalists
