ކުރިއަށް އޮތް ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރާ ކެންޑިޑޭޓުންގެ ނަންތައް ތަރުތީބު ކުރުމަށްޓަކައި ބާއްވާ ގުރުއަތުލުން މިއަދު ބާއްވާއިފިއެވެ.

މިއަދު ހެނދުނު 10:00 ގައި ފެށި މި ގުރުއަތުލުމުގައި، އެންމެ ބޮޑު ވާދަވެރިކަމެއް އޮތް މޭޔަރު ކަމުގެ ގޮނޑިއަށް ވާދަކުރައްވާ ކެންޑިޑޭޓުންގެ ނަންބަރުތައް ވަނީ ކަނޑައެޅިފައެވެ.

އެގޮތުން، ސަރުކާރު ހިންގާ މައި ޕާޓީ، ޕީއެންސީގެ ފަރާތުން މޭޔަރު ކަމަށް ވާދަކުރައްވާ މޫސާ އަލީ ޖަލީލަށް ލިބިވަޑައިގަތީ ކެންޑިޑޭޓް ނަންބަރު 4 އެކެވެ. އަދި އިދިކޮޅު މައި ޕާޓީ އެމްޑީޕީގެ ފަރާތުން ވާދަކުރައްވާ މިހާރުގެ ވެސް މޭޔަރު އާދަމް އާޒިމަށް ލިބިވަޑައިގަތީ ކެންޑިޑޭޓް ނަންބަރު 3 އެކެވެ.

މިފަހަރުގެ އިންތިހާބުގައި ޖުމުލަ 2,993 ކެންޑިޑޭޓުން ވާދަކުރާއިރު، އޭގެ ތެރޭގައި ހަ ސިޔާސީ ޕާޓީއެއްގެ ކެންޑިޑޭޓުން ހިމެނެއެވެ. މި އިންތިޚާބުގައި ރަށު ކައުންސިލްތަކަށް 626 ކައުންސިލަރުން އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރުމަށް ވަނީ ހަމަޖެހިފައެވެ. މީގެ އިތުރުން، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވެސް އެ އަދަދަށް މެމްބަރުން އިންތިޚާބު ކުރާނެއެވެ.

އިލެކްޝަންސް ކޮމިޝަނުން ހާމަކޮށްފައިވާ ތަފާސްހިސާބުތަކަށް ބަލާއިރު، މި އިންތިޚާބުގައި ވޯޓުލުމުގެ ޙައްގު ޖުމުލަ 294,937 މީހުންނަށް ލިބިގެންވެއެވެ. މީގެ ތެރޭގައި ހިމެނެނީ 144,527 އަންހެނުންނާއި 150,410 ފިރިހެނުންނެވެ.

ލޯކަލް ކައުންސިލް އިންތިޚާބުގެ ބޭއްވުމަށް ހަމަޖެހިފައިވަނީ އޭޕްރީލް މަހުގެ 4 ވަަނަ ދުވަހުއެވެ.