1447 ވަނަ އަހަރުގެ ބަރަކާތްތެރި ރަމަޟާން މަސް ފެށޭނީ  ވަނަ މި އަހަރުގެ ފެބްރުއަރީ މަހުގެ 19 ވާ ބުރާސްފަތި ދުވަހު ކަމަށް، އޮމާންގެ މިނިސްޓްރީ އޮފް އެންޑޯމެންޓްސް އެންޑް ރިލިޖަސް އެފެއާޒްގެ ހަނދު ބަލާ މަރުކަޒީ ކޮމެޓީން، ރަސްމީކޮށް އިޢުލާންކޮށްފިއެވެ.

މި ތާރީޚު ކަނޑައަޅާފައިވަނީ ފަލަކީ ހިސާބުތަކަށާއި ހަނދުގެ ދައުރުވުމަށް ބަލައި، އިސްލާމީ އުޞޫލުތަކާ އެއްގޮތްވާ ގޮތުގެ މަތިންނެވެ.

މި ނިންމުން ނިންމާފައިވަނީ ޝަޢުބާން މަސް ނިމި ރަމަޟާން މަހުގެ ހަނދު ފެނުމާ ގުޅޭގޮތުން ކުރެވުނު ދިރާސާތަކަށް ބިނާކޮށެވެ. ފަލަކީ ހިސާބުތަކުން ދައްކާ ގޮތުގައި ފެބްރުއަރީ 17 ވާ އަންގާރަ ދުވަހު އޮމާނަށް ހަނދު ފެނުމުގެ ފުރުޞަތެއް ނެތެވެ. އެހެންކަމުން، ޝަޢުބާން މަސް 30 ދުވަހަށް ފުރިހަމަވާނީ ފެބްރުއަރީ 18 ވާ ބުދަ ދުވަހަށެވެ. މިއާއެކު، ރަމަޟާން މަހުގެ ފުރަތަމަ ދުވަހަކީ ފެބްރުއަރީ 19 ވާ ބުރާސްފަތި ދުވަސް ކަމުގައި ވަނީ ނިންމާފައެވެ. 

މިހާ ކުރީބައިގައި މި ތާރީޚު އިޢުލާން ކުރުމުގެ މަޤްޞަދަކީ އާއިލާތަކާއި، ވިޔަފާރިތަކާއި، އަދި ދީނީ މުއައްސަސާތަކަށް ރަމަޟާން މަހުގެ އަޅުކަންތަކަށް ފުރިހަމައަށް ތައްޔާރުވުމަށް ފުރުޞަތު ދިނުން ކަމަށް އެގައުމުން ބުނެއެވެ. މީގެ އިތުރުން، ހަނދު ބެލުމުގައި ކަމާބެހޭ ފަރާތްތަކުގެ އިރުޝާދުތަކަށް ތަބާވުމުގެ މުހިންމުކަންވެސް ކަމާބެހޭ ފަރާތްތަކުން ވަނީ ހަނދާންކޮށްދީފައެވެ.

އޮމާނަކީ ގަލްފުގެ ޤައުމުތަކުގެ ތެރެއިން އެންމެ ކުރިން ރަމަޟާން މަސް ފެށޭ ތާރީޚު ކަނޑައެޅި އެއް ޤައުމަށް ވުމާއެކު، މިއީ އަވަށްޓެރި އެހެން ޤައުމުތަކަށްވެސް މިކަމުގައި ބަލާނެ މުހިންމު މަރުޖިޢަކަށް ވާނެއެވެ.