މުއްސަނދިކަމާއި ތަނަވަސްކަން ދެއްވުން އެދި ދުޢާކޮށްދިނުމަށް ރަސޫލާ އަށް ދެންނެވި މީހާއަށް އާޚިރުގައި ވީ ގޮތުގެ ވާހަކަ ޝެއިޚް މުޙައްމަދު އިބްރާހިމް (ނައިފަރީ) ކިޔައިދެއްވައިފިއެވެ.

”ކަލަކުވޭ ބިރުވެތިވޭ“ ސީރީޒްގެ ދަށުން ”الله ގެ ނިޔާއަށް ރުހުން“ މައުޟޫއަށް ޝެއިޚް ނައިފަރީ ރޭ ދެއްވި ދަރުހުގައި ޝެއިޚް މިވާހަކަ ކިޔައި ދެއްވީ މާތް الله ދެއްވި ނިޢުމަތްތަކަށް ރުހި އެކަމަށް ޝުކުރުވެރިވުމުގެ މުހިންމުކަމަށް އަލިއަޅުވާލައި ވާހަކަދައްކަވަމުންނެވެ. 

އެގޮތުން ޝެއިޚް ވިދާޅުވީ، ބައެއް މީހުން ގަބޫލު ކުރާ ގޮތުގައި މުއުމިނުންނަށް މުސީބާތްތަކާއި ދަތި އުނދަގޫތަކެއް ނުޖެހޭނެއެވެ. އެހެން ނަމަވެސް އަޅާއަށް އިމްތިހާން ތަކާއި ކުރިމަތިލާންޖެހޭނީ މާތް الله އަށް އީމާންވުމުން ކަމަށް ޝެއިޚް ވިދާޅުވިއެވެ. އަދި އެކަން ކީރިތި ޤުރުއާނާއި ރަސޫލާ ﷺ ގެ ޙަދީޘް ބަސްފުޅުތަކުންވެސް އެނގޭކަން، ޝެއިޚް ފާހަގަކުރެއްވިއެވެ. 

މިއާއެކު ޝެއިޚް ވިދާޅުވީ، މުއުމިނު އަޅާ އިމްތިހާން ކުރައްވަނީ އީމާންކަމުގައި ތެދުހަދާ މީހުންނާއި ދޮގު ހަދާ މީހުން ބައްލަވައި އިމްތިހާން ކުރެއްވުމަށް ކަމަށާ، އެންމެ ބޮޑެތި އިމްތިހާން ތަކާއި ކުރިމަތިލައްވަންޖެހިވަޑައިގަތީ ނަބީބޭކަލުންނަށަ  ކަމަށެވެ. އެހެނީ އަޅާގެ އީމާންކަން ވަރުގަދަވީ ވަރަކަށް އިމްތިހާންތައް ވަރުގަދަ ވާނެކަމަށެވެ. 

ސުވަރުގެ ވަށައިގެންވަނީ މުސީބާތްތަކާއި އިމްތިހާނު ތަކާއި، އިންސާނާގެ ހިތް ނޭދޭ ކަންކަމުން ކަން ފާހަގަކުރައްވައި ޝެއިޚް އިތުރަށް ވިދާޅުވީ، އެކަން ދަނެ އެކަމާމެދު އަހަރެމެން އަގީދާ ވަރުގަދަ ވާންޖެހޭނެ ކަމަށެވެ. އަދި ފަގީރު މީހާ ފަގީރު ވަނީވެސް އޭގައި ޙިކުމަތެއް އޮވެގެންކަމަށާ އެކަން ރަސޫލާ ﷺ ގެ ޒަމާނުގައި ހިނގައިދިޔަ ހާދިސާއަކުންވެސް ހާމަވެގެންދިޔަކަމަށް ޝެއިޚް ވިދާޅުވިއެވެ. އެ ހާދިސާ ޝެއިޚް ވަނީ ދަރުސްގައި ކިޔައި ދެއްވާފައެވެ.

އެގޮތުން ވިދާޅުވީ، އެއްދުވަހަކު ވަރަށް ފަގީރު ޞަޙާބީބޭކަލަކު ނަބިއްޔާ ﷺ އަރިހަށް ވަޑައިގެން، އެބޭކަލަށް ތަނަވަސްކަންދެއްވުން އެދި ދުޢާ ކުރެއްވުމަށް ދެންނެވި ކަމަށެވެ. 

”الله ގެ ރަސޫލާ އޭނާއަށް ނަޞޭޙަތްތެރިވީ. الله ގެ ނިޔާއަށް ރުހޭށޭ. އެކަމުގެ މައްޗަށް ކެތްތެރިވާށޭ. ނަޞޭހަތް ދެއްވާފައި އޭނާ ފޮނުވައިލެއްވީ އެދުވަހު. 

އަނެއް ދުވަހުވެސް އޭނާ އައިސްފި. އައިސްފައި ހަމަ އެގޮތަށް ދެންނެވީމާ، ރަސޫލާ އޭނާއަށް އެފަދައިން ނަޞޭޙަތް ދެއްވާފައި ފޮނުވައިލެއްވީ. 

ތިންވަނަ ދުވަހު އައީމާ އެކަލޭގެފާނު އޭނާއަށް ދުޢާ ކޮށްދެއްވީ. ދުޢާކޮށްދެއްވީމާ، އޭނާއަށް ބަކަރި ލިބި، ބަކަރިތައް ގިނަވެގެން އޭނާ ރަށްބޭރުން ބިމެއް ގަނެގެން އެ ބިމުގައި އޭނާ ބަކަރި ގެންގުޅެން ފަށައިފި. ބޮޑު މުއްސަންޖަކަށް ވެއްޖެ.

الله ގެ ނަބިއްޔާ ކޮންމެ ދުވަހަކު ބައްލަވާަ، އޭނާ މިސްކޮތަށް ނަމާދުގެ ޖަމާޢަތަށް ހާޒިރުވޭތޯ. އެކަލޭގެފާނަށް ފެނިވަޑައިގަތީ އޭނާ ނަމާދުތަކަށް ފަސްޖެހޭތަން. ޖަމާޢަތަށް ފަސްޖެހޭތަން. ފަސްޖެހެމުންގޮސް އެންމެ ފަހުން ނަމާދު އެޅެން ފަށައިފި އޭނާއަށް އެންމެ ފަހުންގޮސް އޭނާ ހުކުރަށްވެސް ނާންނަންފެށި. 

اللهގެ ނަބިއްޔާ އޭނާ ގެންނަވާފައި ދެއްނެވީ ،ތިބާއަށް މުއްސަނދިކަން ދެއްވީމާ ތިބާގެ މުޅި ދެދުނިޔެ އަބާއްޖަވެރިވެގެން ދިޔައީއޭ. އާޚިރަތް ބަރުބާދުވެގެން ދިޔައީއޭ. ތިބާ ފަގީރެއްގެ ގޮތުގައި ހުރިއިރު ބަރާބަރަށް ނަމާދުގެ ޖަމާއަތަށް ހާޒިރުވީމުއޭ. ދީނީ ކަންތައްތަކަށް ފަރުވާތެރިވީމުއޭ. އެކަމަކު ތިބާއަށް މުއްސަނދިކަން ލިބުނީމާ އެހުރިހާ ކަމެއް ހަނދާންނެތިގެން ދިޔައީއޭ. އެކަމަށްޓަކައޭ މާތް الله  ތިބާއަށް އެ މުއްސަނދިކަން ނުދެއްވީ. ދުނިޔޭގައި ފަގީރެއްގެ ގޮތިގައި ހުރެ ތިބާއަށް ތިބާގެ އާޚިރަތް ކާމިޔާބުވެއްޖެ ނަމަ އެއީ ކިހާބޮޑު ބާއްޖަވެރިއެއް ހެއްޔޭ؟“

އެހެންކަމުން ދުނިޔޭގައި ކިތަންމެ ދަތިހާލުގައި އުޅުނު ނަމަވެސް އާޚިރަތް ބާއްޖަވެރިވެއްޖެ ނަމަ އެމީހަކީ ކާމިޔާބު މީހެއް ކަމުގައި ޝެއިޚް ވިދާޅުވިއެވެ. އެހެނީ ދުނިޔެއަކީ ވަގުތީ ތަނަކަށްވާއިރު އާޚިރަތުގެ ޙަޔާތަކީ އަބަދުގެ ޙަޔާތްކަމަށާ، އެތަނުގައި ކަންބޮޑުވުމެއް، ކަމަކާ ފިކުރުކުރުމެއް، ހިތާމައެއް އަދި ބަލިމަޑުކަމެއް ކުރިމަތިނުވާނެ ކަމަށް ޝެއިޚް ވިދާޅުވިއެވެ.