އީރާނުގެ ނިއުކްލިއާ މައްސަލައިގައި އާ އެއްބަސްވުމަކަށް އައުމަށްޓަކައި، އެމެރިކާއިން އެއް މަސްދުވަހުގެ ނުރަސްމީ މުހުލަތެއް ކަނޑައަޅައި އީރާނަށް ދެމުްނދާ ފިއްތުންތައް ވަރުގަދަކޮށްފިއެވެ.

އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދޭގޮތުގައި، އަވަސް މުއްދަތެއްގެ ތެރޭގައި އެއްބަސްވުމަކަށް ނާދެވިއްޖެނަމަ، އޭގެ ނަތީޖާ ވަރަށް ހިތިވެ، މެދުއިރުމަތީގައި އޮތް ނުތަނަވަސްކަން އިތުރަށް ބޮޑުވެގެންދާނެއެވެ. މި ހަފުތާގައި ވޮޝިންގޓަންގައި ނޫސްވެރިންނާ ވާހަކަދައްކަވަމުން ޓްރަމްޕް ބުނެފައިވަނީ، މި އެއްބަސްވުމާއި ގުޅޭ މަޝްވަރާތައް ބާރު ސްޕީޑުގައި ކުރިއަށް ގެންދަންޖެހޭ ކަމަށާއި، ކުރިއަށް އޮތް މަސްދުވަހުގެ ތެރޭގައި މިކަމަށް ކުރިއެރުމެއް ލިބެންޖެހޭނެ ކަމަށެވެ. އަދި މަޝްވަރާތައް ނާކާމިޔާބުވެއްޖެނަމަ، އީރާނަށް ވަރަށް ނުރައްކާތެރި ނަތީޖާއަކާ ކުރިމަތިލާން ޖެހިދާނެ ކަމަށްވެސް އޭނާ ބުނެފައިވެއެވެ. 

އީރާނުގެ ނިއުކްލިއާ މަޝްރޫޢާ ގުޅިގެން ދެ ޤައުމުގެ ދެމެދުގައި އުފެދިފައިވާ ގުޅުން ގޯސްވެފައިވާތާ އަހަރުތަކެއް ވެފައިވާއިރު، މި ނުތަނަވަސްކަން އިތުރަށް ގޯސްވިޔަނުދީ ހިފެހެއްޓުމަށް އެތައް މަސައްކަތްތަކެއް ދަނީ ކުރެވެމުންނެވެ. އެމެރިކާގެ ވޮޝިންގޓަނުން ބާރުއަޅަނީ އީރާނުގެ ނިއުކްލިއާ ހަރަކާތްތައް ވަރަށް ބޮޑަށް ހަނިކުރުމަށާއި، މިސައިލް އުފެއްދުމާއި ސަރަޙައްދީ ސަލާމަތާ ގުޅުންހުރި އެހެނިހެން ކަންކަންވެސް އެއްބަސްވުމުގައި ހިމެނުމަށެވެ. ނަމަވެސް، އީރާނުން ބުނަމިން ދަނި އެގައުމުން ނިއުކްލިއާ ހަރަކާތްތައް ކުރިއަށްގެންދަނީ ނުހަނު ސަމާލުކަމާއި އެކުގައި ކަމަށެވެ. 

ޚާރިޖީ ގޮތުން ކުރާ މަސައްކަތްތަކުގެ އިތުރުން، އެމެރިކާއިން ދަނީ އެ ސަރަޙައްދުގައި އަސްކަރީ ފިއްތުންތައްވެސް ބޮޑުކުރަމުންނެވެ. އެގޮތުން، މަޝްވަރާތައް ނާކާމިޔާބުވެއްޖެ ހާލަތެއްގައި ތައްޔާރަށް ތިބިކަން ހާމަކުރުމުގެ ގޮތުން، އިތުރު މަތިންދާބޯޓު އުފުލާ މަނަވަރުތައް އެ ސަރަޙައްދަށް ފޮނުވުމަށްވެސް ދަނީ މަޝްޗަރާކުރަމުންނެވެ. ކަމާއި ބެހޭ މާހިރުން ބުނާ ގޮތުގައި، މިފަދަ ހަރުކަށި މުހުލަތުތަކާއި އަސްކަރީ ބާރު ދެއްކުމުގެ ބޭނުމަކީ، އީރާނުން ދޫދިނުން އަވަސްކުރުމަށް މަޖުބޫރުކުރުވުމާއި، އީރާނުގެ ނިއުކްލިއާ ބާރާއިމެދު އެމެރިކާގެ ކަންބޮޑުވުން ކުޑަކުރުމެވެ. މި ކަމާއި ގުޅިގެން އީރާނުގެ ވެރިން ބުނަމުންދަނި މަޝްވަރާތައް ކުރިއަށް ގެންދަން ބޭނުންވާ ކަމަށް ކަމަށެވެ. ނަމަވެސް އެ މަޝްވަރާތައް ކުރިއަށްދާންވާނީ އެއްވެސް ބިރުދެއްކުމެއް ނުވަތަ މަޖުބޫރުކުރުމެއް ނެތި ކަމަށެވެ.

އެގޮތުން، ކުރިއަށް އޮތް ހަފުތާތަކުގައި ބާއްވާ މަޝްވަރާތަކަށް ދެ ގައުމުންވެސް ތައްޔާރުވަމުންދާއިރު، ޚާރިޖީ މާހިރުންނާން އިންޒާރު ދެނީ މި މަޝްވަރާތަކުގެ ނަތީޖާއަކީ މުޅި ސަރަޙައްދުގެ ހަމަޖެހުމާ ގުޅިފައިވާ ކަމެއް ކަމަށެވެ. އެގޮތުން، މަޝްވަރާތައް ކާމިޔާބުވެއްޖެނަމަ ނުތަނަވަސްކަން ކުޑަވާނެ ކަމަށާއި، ނާކާމިޔާބުވެއްޖެނަމަ އާ ކުރިމަތިލުންތަކަކަށް މަގުފަހިވެ، އަސްކަރީ ހަމަނުޖެހުމަކަށް ބަދަލުވެދާނެ ކަމުގެ ބިރު އެބައޮތް ކަމަށް އެފަރާތްތަކުން ފާހަގަކުރެއެވެ.