ކުޅުދުއްފުށި ސިޓީގައި ދެމުންގެންދާ ބަހުގެ ޚިދުމަތް އިތުރަށް ހަރުދަނާކުރުމުގެ ގޮތުން، އެ ސިޓީގެ އެކި ސަރަޙައްދުތަކުގައި 26 ބަސް ހުއްޓި ނިޝާން ބޯޑު ހަރުކުރުމުގެ މަސައްކަތް ކާމިޔާބުކަމާއެކު ނިންމާލައިފިއެވެ.
މި މަސައްކަތަކީ ރޯޑް ޑިވަލޮޕްމަންޓް ކޯޕަރޭޝަން (އާރްޑީސީ) ގެ އިޖްތިމާޢީ ޒިންމާގެ ދަށުން ކުރިއަށް ގެންދިޔަ މަޝްރޫޢެކެވެ. އާރްޑީސީން މި މަސައްކަތް ކުރިއަށް ގެންގޮސްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ އެދުމުގެ މަތިންނެވެ.
މި މަޝްރޫޢުގެ ދަށުން ކުޅުދުއްފުށީގެ ބޮޑެތި މަގުތަކާއި، އާންމުން ގިނައިން އެއްވެއުޅޭ ސަރަޙައްދުތައް ހިމެނޭހެން ޖުމްލަ 26 ސަރަޙައްދެއްގައި ވަނީ ބަސް ހުއްޓިތައް ފާހަގަކުރުމަށް ބޯޑުތައް ހަރުކޮށްފައެވެ. މީގެ ސަބަބުން ބަހުގެ ޚިދުމަތް ހޯދާ ފަރާތްތަކަށް ބަސް ހުއްޓާނެ ސަރަޙައްދުތައް ދެނެގަތުމަށް ފަސޭހަވެ، ޚިދުމަތުގެ ފެންވަރު ރަނގަޅުވެގެންދާނެއެވެ.
ކުޅުދުއްފުށި ސިޓީގެ މަގުތައް ހެދުމުގެ މަސައްކަތްވެސް އާރްޑީސީން ކުރިއަށް ގެންދާއިރު، މިފަދަ އިޖްތިމާޢީ މަސައްކަތްތަކަކީ ރަށުގެ އުމްރާނީ ތަރައްޤީއަށާއި ރައްޔިތުންނަށް ފޯރުކޮށްދޭ ލުއިފަސޭހައެއްގެ ގޮތުގައި އެ ކޯޕަރޭޝަނުން ފާހަގަކުރެއެވެ.
މި ސަރުކާރުގެ އަމާޒަކީ އަތޮޅުތެރޭގެ ބޮޑެތި ސިޓީތަކުގައި ދަތުރުފަތުރުގެ ނިޒާމު ހަރުދަނާކޮށް، ރައްޔިތުންނަށް ފަސޭހަކަމާއެކު ޚިދުމަތް ލިބޭނެ މަގު ފަހިކޮށްދިނުމެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، ކުޅުދުއްފުށީގެ ތަރައްޤީއަށް ގިނަ މަޝްރޫޢުތަކެއް މިހާރުވެސް ދަނީ ހިނގަމުންނެވެ.
Advertisement
This content is created and paid for by advertisers and does not involve Voice Journalists
