ތިމަންނާއަށް ވަހީ އަންނަ ކަމަށް ބުނެ، އިސްލާމީ އަގީދާއަށާއި ކީރިތި ރަސޫލާއަށް ތައުހީނުވާ ގޮތަށް ޓިކްޓޮކްގައި ވާހަކަދެއްކި މީހެއްގެ މައްސަލަ ކަމާބެހޭ އިދާރާތަކުން ބަލަން ފަށައިފިއެވެ.

އިސްލާމިކް މިނިސްޓްރީން ބުނި ގޮތުގައި، އިސްލާމްދީނުގެ އަސްލުތަކާ ހިލާފަށް ވާހަކަދައްކައި، ދީނަށް ފުރުއްސާރަކުރި މި މީހާގެ މައްސަލަ ބަލައި ގާނޫނީ ފިޔަވަޅު އެޅުމަށް ކަމާބެހޭ އިދާރާތަކުގައި އެ މިނިސްޓްރީން އެދިފައިވަނީ މިދިޔަ އާދިއްތަ ދުވަހުއެވެ.

މީސް މީޑިއާ މަންސައެއް ކަމަށްވާ ޓިކްޓޮކްގައި ލައިވްވެ، މި މީހާ ވަނީ އިސްލާމްދީނާއި ކީރިތި ގުރުއާނަށް ނިސްބަތްކޮށް ވަރަށް ދަށު ދަރަޖައިގެ ބަސްތަކުން ފުރުއްސާރަކޮށްފައެވެ.

އަދި ވަހީ އިއްވާނީ ހަމައެކަނި ރަސޫލާއަށް ނޫން ކަމަށާއި، އޭނާއަށް ވެސް ވަހީ އަންނަ ކަމަށް ބުނެ ދީނުގެ އަސާސްތަކާ ހިލާފު ބާތިލް ވާހަކަތަކެއް އޭނާ ވަނީ ދައްކާފައެވެ.

މި މައްސަލަ ފެންމަތިވެފައިވަނީ މިދިޔަ ހުކުރު ދުވަހުއެވެ. އެގޮތުން އޭރު މި މީހާ އާންމުކޮށްފައިވާ ވީޑިއޯތަކުން އެނގޭ ގޮތުގައި އޭނާއަކީ ނ. ކުޑަފަރީއަށް ނިސްބަތްވާ މީހެކެވެ.

އިސްލާމްދީނަށާއި ކީރިތި ރަސޫލާއަށް ފުރުއްސާރަކުރުމަކީ ދިވެހިރާއްޖޭގެ ގާނޫނުތަކުގެ ދަށުން ބޮޑު ކުށެކެވެ. ނަމަވެސް މިފަދަ ކަންކަން ކުރާ މީހުންނާމެދު އާއްމުކޮށް ފިޔަވަޅު ނޭޅޭ ސަބަބެއް ކަމުގައި އިދާރާތަކުން ބުނަނީ އެމީހުން ރާއްޖެއިން ބޭރުގައި ދިރިއުޅުމެވެ. މި މައްސަލާގައި ހިމެނޭ މީހާއަކީވެސް  ބޭރުގައި އުޅޭ މީހެއް ކަމަށް ވެއެވެ.