ހުޅުމާލޭގައި ހުންނަ އަލް ސާނީ (ގުއްބު) މިސްކިތުގެ މަރާމާތުގެ މަސައްކަތްތައް ކުރިއަށް އޮތް ބަރަކާތްތެރި ރަމަޟާން މަހުގެ ކުރިން ނިންމުމަށް އިސްލާމީ ކަންތައްތަކާ ބެހޭ މިނިސްޓްރީން ބާރުއަޅަމުންދާ ކަމަށް އެ މިނިސްޓްރީން ހާމަކޮށްފިއެވެ.

މިކަމާ ގުޅޭގޮތުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މާލެ ސިޓީ ކައުންސިލުން އެ މިސްކިތުގައި ކުރިއަށްގެންދާ މަރާމާތުގެ މަސައްކަތްތައް ލަސްވަމުންދާތީ، ރަމަޟާން މަހަށް ވެސް އެމަސައްކަތް ނުނިމިދާނެތީ އާންމު ރައްޔިތުންގެ މެދުގައި ބޮޑެތި ކަންބޮޑުވުންތަކެއް ހުރިކަން މިނިސްޓްރީގެ ސަމާލުކަމަށް އައިސްފައިވާ ކަމަށެވެ. އެހްނކަމުން މި މަސައްކަތް އަވަހަށް ނިންމާ، ރޯދައިގެ ކުރިން މިސްކިތް ހުޅުވާލުމަށް މިނިސްޓްރީއިން ބާރުއަޅަމުން ގެންދަވާނެކަމަށްވެސް މިނިސްޓަރ ވިދާޅުވިއެވެ. 

ޑރ. ޝަހީމް އިތުރަށް ވިދާޅުވި ގޮތުގައި، މިނިސްޓްރީގެ ވެސް އުންމީދަކީ ވީ އެންމެ އަވަސް މުއްދަތެއްގެ ތެރޭގައި ސިޓީ ކައުންސިލުން އެ މިސްކިތުގެ މަރާމާތު ނިންމައި، އާންމުންނަށް އަޅުކަން ކުރެވޭނެހެން ހުޅުވައިދިނުމެވެ.

ގުއްބު މިސްކިތަކީ ހުޅުމާލޭގެ ގިނަ ބަޔަކު ނަމާދުކުރުމަށް ބޭނުންކުރާ މިސްކިތެކެވެ. އަދި ރަމަޟާން މަހަކީ މިސްކިތްތަކަށްދާ މީހުންގެ އަދަދު އިތުރުވާ މަހަކަށްވާތީ، މިސްކިތުގެ މަރާމާތު އަވަހަށް ނިންމުމަކީ ސަރުކާރުންވެސް ހާއްސަ އިސްކަމެއް ދޭ ކަމެކެވެ.