ދިވެހިރާއްޖޭގެ ޤައުމީ ޔުނިވަރސިޓީއާއި މައުމޫން ފައުންޑޭޝަނާ ދެމެދު އިލްމީ ދާއިރާ ކުރިއެރުވުމަށާއި، ފިކުރީ ތަރިކަ ރައްކާތެރިކުރުމުގެ އިތުރުން މުޖުތަމައުގައި ދީނީ އަދި އިޖުތިމާއީ ރޫހު އާލާކުރުމަށް ގުޅިގެން މަސައްކަތްކުރުމުގެ ފަހުމުނާމާއެއްގައި ސޮއިކޮށްފިއެވެ.

ދިވެހިރާއްޖޭގެ ޤައުމީ ޔުނިވަރސިޓީގައި ބޭއްވުނު ޚާއްޞަ ރަސްމިއްޔާތެއްގައި، މައުމޫން ފައުންޑޭޝަންގެ ފަރާތުން މި އެއްބަސްވުމުގައި ސޮއިކުރެއްވީ އެ ފައުންޑޭޝަންގެ ވައިސް ޗެއާމަން އަޙްމަދު ފާރިޝް މައުމޫން އެވެ. ޔުނިވަރސިޓީގެ ފަރާތުން ސޮއިކުރެއްވީ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް އެވެ.

މި ރަސްމިއްޔާތުގައި ވާހަކަދައްކަވަމުން ފައުންޑޭޝަންގެ ވައިސް ޗެއާމަން އަޙްމަދު ފާރިޝް މައުމޫން ވަނީ، މެދުކެނޑުމަކަށްފަހު ފައުންޑޭޝަންގެ ސްކޮލަރޝިޕް ޕްރޮގްރާމް އަލުން ފަށާފައިވާކަން އިއުލާނުކުރެއްވިއެވެ.

އަދި ފައުންޑޭޝަނުން އާކައިވްއެއް ހެދުމުގެ މަސައްކަތް ކުރަމުންދާ ކަމަށާއި، މިކަމުގައި ޔުނިވަރސިޓީގެ ފަންނީ އެހީތެރިކަން ލިބޭނެކަން އޭނާ ފާހަގަކުރެއްވިއެވެ. މީގެ އިތުރުން، ޔުނިވަރސިޓީގެ ފަރާތުން ވަރަށް ކުރު މުއްދަތެއްގެ ތެރޭގައި އެއްބަސްވުމަށް މަގުފަހިކޮށްދެއްވި ކަމަށްޓަކައި ޚާއްޞަ ޝުކުރެއް އަދާކުރެއްވިއެވެ.

ޔުނިވަރސިޓީގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމްގެ ވާހަކައިގައި މި ފަހުމުނާމާއަކީ، އިލްމީ ދާއިރާ ކުރިއެރުވުމަށާއި ފިކުރީ ތަރިކަ ރައްކާތެރިކުރުމަށް އެޅުނު މުހިންމު ބިންގަލެއް ކަމުގައި ސިފަކުރެއްވިއެވެ. ރައީސް މައުމޫން ލިޔުއްވާފައިވާ އަދަބީ، ތާރީޚީ އަދި އިލްމީ ފޮތްތަކަކީ ޤައުމީ ޚަޒާނާއެއް ކަމަށާއި، އެ ފޮތްތައް ޔުނިވަރސިޓީގެ ކުތުބުޚާނާއަށް ހަދިޔާކުރެއްވުމަކީ ލިބުނު ބޮޑު ކުރިއެރުމެއް ކަމުގައި އެކަމަނާ ވިދާޅުވިއެވެ.

ވައިސް ޗާންސެލަރ އިތުރަށް ވިދާޅުވީ، މި އެއްބަސްވުމުގެ ދަށުން "Master of Education in Leadership" ކޯހަށް ސްކޮލަރޝިޕްގެ ފުރުޞަތު ހުޅުވާލެވޭނެ ކަމަށެވެ. އަދި މި ގުޅުމުގެ ސަބަބުން ދަރިވަރުންގެ އަޚުލާޤީ ސިފަތަކާއި މަދަނީ ޒިންމާތައް އަށަގެންނެވުމަށް މަގުފަހިވާނެކަމަށް އުއްމީދުކުރައްވާ ކަމަށްވެސް ވިދާޅުވިއެވެ.