ދިވެހީންގެ މެދުގައި އެންމެ މަގުބޫލު އިލްމުވެރީންގެ ތެރޭގައި ހިމެނޭ އެއް ބޭފުޅަކީ އައްޝައިހް އަބްދުއްސަލާމް ބިން ދާއޫދެވެ. އުތުރުގެ ހއ. ތަކަންދޫއަށް ނިސްބަތްވާ ޝެއިހް ސަލާމްގެ ދަރުސްތަކަކީ ގިނަ ބަޔަކު ވަރަށް އިންތިޒާރު ކުރާ ދަރުސްތަކެކެވެ. ދީނީ އިލްމު އުނގެނޭން ފެށި ހިސާބުން ވެސް ޝެއިހް ސަލާމް އަކީ ދިވެހީންގެ މެދުގައި ވަރަށް މަގުބޫލު ބޭފުޅަކަށްވި އެވެ. އެއީ ވަރަށް ގިނަ ދަރިވަރުންގެ އިސްލާމް މުދައްރިސެކެވެ. މަޖީދިއްޔާއިން ކިޔެވި ވަރަށް ގިނަ ދަރިވަރުންގެ ވަރަށް މަގުބޫލު މުދައްރިސެކެވެ.

ކިޔެވުމަށް މަދީނާގައި ހޭދަކުރި ދުވަސްތަކުގައި ވެސް ޗުއްޓީއަށް ރާއްޖެ އައިސް ސަލާމްގެ އަޑުން ރެކޯޑްކޮށް އާންމުކުރަމުންދިޔަ "އިބްރަތްތެރި ވާހަކަ" ތަކަކީ އާންމުންގެ ވަރަށް ބޮޑު ޝައުގުވެރިކަމާއި ސަމާލު ކަމެއް ލިބުނު ވާހަކަ ތަކެކެވެ. އޭރު އެއީ އެންމެންގެ "ސަލާމްބެ" އެވެ. ހާއްސަކޮށް ކުޑަކުދީންނާއި ޒުވާނުންނެވެ. ދީނީ ކަންކަން އޮޅުން ފިލުވާ, ދީނުގެ މަގުގައި ކުރިއަށް ދެވޭތޯ މަސައްކަތްކުރަމުން އައި ޒުވާނުންގެ މެދުގައި އެންމެ ހާއްސަ ލީޑަރަކީ ސަލާމްބެ އެވެ.

ވާހަކަތައް ހުށައަޅައިދިނުމުގެ ފުރިހަމަ ކަމާއި ވަރަށް އަސަރާއެކު ގެނެސްދޭ ގޮތުން ސަލާމްބެ ފުރަތަމަ މަޝްހޫރުވީ ދީނީ ވާހަކަ ކިޔައިދޭ މުޖްތަމައު ހޭލުންތެރި ކުރުވި ބޭފުޅެއްގެ ގޮތުގަ އެވެ. ކިޔެވުން ފުރިހަމަކޮށް ރާއްޖެ ވަޑައިގެން ދައުވަތުގެ މަސައްކަތް ފެއްޓެވި އެވެ. އެއާއެކު ޝެއިހް ސަލާމް ވެގެންދިޔައީ ދިވެހީންގެ މެދުގައި އެންމެ މަގުބޫލު އެއް އިލްމުވެރިޔާ އަށެވެ.

ދަރުސްތައް ހުށައަޅައިދޭ ގޮތާއި ފުރިހަމަ އަސަރާއެކު ވާހަކަތައް ބަޔާންކޮށް ދެމުން ދިއުން ވެގެން ދިޔައީ ގިނަ ބަޔަކަށް ވަރަށް ޝައުގުވެރިވި ކަމަށެވެ. އެހެން ކަމުން ރަށްރަށުން ދަރުސްތަކަށް ގެންނަން އެންމެ ބޮޑު ޑިމާންޑެއް އޮންނަ އެއް އިލްމުވެރިއަކީ ޝެއިހް ސަލާމްއަށް ވެގެން ދިޔަ އެވެ. ހާއްސަކޮށް ރޯދަ މަހުގެ ކުރިއާ ރޯދައިގެ ތެރޭގައި އޮންނަ ދަރުސްތަކަށެވެ.

ނަމަވެސް މި ފަހަރު އަޅުގަނޑުމެންނަށް އެ ފުރުސަތު ނުލިބުނެވެ. ޝެއިހްްގެ އާއިލާގެ ކައިރިއަށް ރާއްޖެެއިން ބޭރަށް ދާން ޖެހުމުންނެވެ. 

މި އަހަރުގެ ރޯދަ މަސް ފެށިގެން އައީ ޝެއިހް, އާއިލާއާއެކު އޮސްޓްރޭލިއާގައި ހުއްޓަ އެވެ. އޮސްޓްރޭލިއާގައި ޝެއިހް ދިރިއުޅޭ ސަރަޙައްދުގައި ހުރި ބޮޑެތި މިސްކިތްތަކުގެ ތެރެއިން އެއް މިސްކިތުގައި ފުރަތަމަ ތަރާވީހް ނަމާދު އިމާމުވެ ކުރެއްވީ ޝެއިހް ސަލާމް އެވެ.

މިއީ ޝެއިހަށް ވަރަށް ހާއްސަ ކަމަކަށް ނުވި ނަމަވެސް އޮސްޓްރޭލިއާގައި ދިރިއުޅޭ ދިވެހީންނާއި އަޅުގަނޑުމެން ދިވެހީންނަށް ވަރަށް ހާއްސަ ކަމެކެވެ. ދިވެހި އިލްމުވެރިއަކު ބޭރު ގައުމެއްގެ މިސްކިތެއްގައި އިމާމުވެ ތަރާވީހު ކުރުމާއި އެ ގައުމުގައި ދިރިއުޅޭ ދިވެހީންނަށް ނަސޭހަތާއި ދަރުސް ދެއްވަން ހުންނެވުމަކީ ކުޑަ އުފަލެއްް ނޫނެވެ. އެއީ އެފަދަ ގައުމުތަކުގައި ދިރިއުޅޭ ދިވެހީންނަށް މަދުން ނޫނީ ނުލިބޭނެ ފުރުސަތެވެ.

އެކަން އޮސްޓްރޭލިއާގައި ދިރިއުޅޭ ބައެއްް ދިވެހީން ވަނީ ފާހަގަވެސް ކޮށްފަ އެވެ. ޝެއިހް ސަލާމް އަކީ ވަރަށް ރީތިކޮށް ކީރިތި ޤުރުއާން ވެސް ކިޔަވާ ބޭފުޅެކެވެ. 

މި ފަހަރުގެ ރޯދައިގެ ކުރީން އަތޮޅުތަކާއި މާލޭގައި ޝެއިހް ސަލާމްގެ ދަރުސްތަކާއި އަދި ރޯދައިގެ ކުރީކޮޅު ރާއްޖޭގެ މިސްކިތެއްގައި އިމާމުވެ ތަރާވީހް ނަމާދު ނުކުރެވުނު ނަމަވެސް އެ ފުރުސަތު އެހެން ގައުމެއްގައި އެހެން ގައުމެއްގެ ރައްޔިތުންނަށް މިވަނީ ފަހިވެފަ އެވެ.