ގެދޮރުވެރިޔާ ސްކީމުގެ ދަށުން ހުޅުމާލޭ ފޭސް ދޭކުން މާލޭ ރައްޔިތުންނަށް ދޫކުރި ބައެއް ގޯތިތަކުގައި ގަވާއިދާ ހިލާފަށް ބައެއް ފަރާތްތަކުން ވިޔަފާރިކުރަން ފަށައިފިއެވެ.

ބައެއް މީހުން ބިދޭސީން ލައްވައި ވިޔަފާރިކުރަން ފަށާފައިވާއިރު، ދެތިން ގެވަޅެއްގައި އިމްޕޯޓް މުދާ ވިއްކާތަން ވޮއިސްގެ ނޫސްވެރިންނަށް ވަނީ ފެނިފައެވެ. އެގޮތުން އެތަންތަނުގައި ފިޔާ، އަލުވި ބިސް އަދި އިންޑިއާ ކަރާ ވިއްކަމުންދިޔަކަން ފާހަގަކޮށްލެވެއެވެ. އެތަންތަނުގައި ސޭޓުންގެ ގޮތުގައި ތިބީ ބިދޭސީންނެވެ. 

ބިންވެރިޔާ ސްކީމުން ދޫކުރި ބައެއް ގެވަޅުތަކުގައި ބިދޭސީން ލައްވައި ވިޔަފާރި ކުރަން ފަށާފައިވާއިރު، ގޯތިތައް ލިބިފައިވާ ބައެއް މީހުންގެ ގޯތިތައް ބޮޑުއަގުގައި ގުދަން ހެދުމަށް ކުއްޔަށް ދީފައިވާކަންވެސް ފާހަގަކޮށްލެވެއެވެ.

ފޭސްދޭއްގެ ގެވަޅެއްގައި ތަކެތި ވިއްކުމަށް ބަހައްޓާފައި... ފޮޓޯ: ވޮއިސް

އަދި ބައެއް ފަރާތްތަކުން ލިބިފައިވާ ގޯތިތަކުގައި އޮޑިހަރުގެ އާއި ބައު ދަގަނޑުތައް ވެއްދުމަށް ހާއްސަ ތަންތަން ހަދާފައިވާކަން ފާހަގަކޮށްލެވެއެވެ. ބިންވެރިޔާ ސްކީމުގެ ދަށުން ހުޅުމާލެ ފޭސް ދޭއް އަދި ފޭސް ތިނަކުން ގޯތިތައް ދޫކޮށްފައިވަނީ ބަންޑާރަ ގޯތި ދޭ އުސޫލުންނެވެ. މާނައަކީ އެތަންތަނުން ކުލީގެ ގޮތުގައި އެއްވެސް އެއްޗެއް ސަރުކާރަށް ދައްކަން ނުޖެހޭކަމެވެ.

ފޭސް ދޭކުން ދޫކުރި ބައެއް ގޯތިތަކުގައި އުސޫލާ ހިލާފަށް ބައެއް ކަންކަން ކުރަމުންދާއިރު، މިކަމުގައި ސަރުކާރުގެ ކަމާބެހޭ އިދާރާއިން އަދި ވަކި އެއްޗެއް ބުނެފައެއް ނުވެއެވެ.